The Phnom Penh Post Search

Search form




Logo of Phnom Penh Post newspaper Phnom Penh Post - H&M នឹង​បង្កើន​តម្លៃ​លក់រាយ​ដើម្បី​ជួយ​កម្មករ

H&M នឹង​បង្កើន​តម្លៃ​លក់រាយ​ដើម្បី​ជួយ​កម្មករ

H&M នឹង​បង្កើន​តម្លៃ​លក់រាយ​ដើម្បី​ជួយ​កម្មករ

131211_11
កម្មករកំពុងធ្វើការនៅក្នុងរោងចក្រកាត់ដេរសម្លៀកបំពាក់មួយនៅភ្នំពេញនាពេលកន្លងមក ភ្នំពេញ ប៉ុស្តិ៍

ភ្នំពេញៈ ក្រុមហ៊ុន​សម្លៀកបំពាក់​ដ៏​ធំ​គឺ H&M កំពុង​តែ​ពិចារណា​បង្កើន​តម្លៃ​លក់រាយ​របស់​ខ្លួន​ដើម្បី​ជួយ​បង់ ប្រាក់​ឈ្នួល​កាន់​តែ​ខ្ពស់​ដល់​កម្មករ​រោងចក្រ​នៅក្នុង​ប្រទេស ក្រីក្រ។

លោក Helena Helmersson ប្រធាន​ផ្នែក​និរន្តរភាព​នៅ​ក្រុមហ៊ុន​សម្លៀកបំពាក់​ប្រទេស​ស៊ុយអែត ប្រាប់​ភ្នាក់ងារ​សារព័ត៌មាន​បារាំង​កាលពី​ថ្ងៃ​ចន្ទ​នៅ​ទីក្រុង Stockholm ដែល​ក្រុមហ៊ុន​នេះ​បាន​ជួប​ប្រជុំ​ជាមួយ​ក្រុម​តស៊ូ​មតិ​ជាច្រើន​ថា នឹង​មិន​មាន​ការ​បង្កើន​តម្លៃ​ណា​មួយ​ទេ​នៅក្នុង​រយៈពេល​ខ្លី ប៉ុន្តែ​វា​អាច​ជា​លទ្ធភាព​មួយ​នា​ពេល​អនាគត​។

លោក ខេន លូ អគ្គលេខាធិការ​សមាគម​រោងចក្រ​កាត់ដេរ​នៅ​កម្ពុជា​(GMAC) ស្វាគមន៍​ដល់​ការ​ប្រកាស​នេះ​ថា ជា​ការ​ឆ្លើយតប​អាច​ទទួល​យក​បាន​ពី​យីហោ​មួយ​ក្នុង​ចំណោម​យីហោ​លេចធ្លោ​ជាង​គេ​បំផុត​ដែល​ទិញ​សម្លៀកបំពាក់​នៅ​កម្ពុជា​។

លោក​បាន បន្ត​ថា​៖ «​ដូច្នេះ​គេ​ត្រូវ​តែ​បញ្ចេញ​ប្រាក់​ពី​ហោប៉ៅ ឬ អតិថិជន​ត្រូវ​តែ​ចំណាយ​កាន់តែ​ច្រើន​»។ ប៉ុន្តែ​លោក​បាន​ព្រមាន​ជំទាស់​នឹង​ការ​ធ្វើឲ្យ​ងាយស្រួល​ពេក​ដល់ ចង្វាក់​ផ្គត់ផ្គង់​ដ៏​ស្មុគ្រស្មាញ​ទៅក្នុង​រូប​មន្ត​នៃ​តម្លៃ​ទំនិញ ប្រើប្រាស់​កាន់តែ​ខ្ពស់​ស្មើ​នឹង​ប្រាក់ខែ​កាន់តែ​ខ្ពស់​សម្រាប់​កម្មករ ។ លោក​បញ្ជាក់​ថា​៖ «​វា​មិនមែន​ជា​បញ្ហា​តម្លាភាព​ដែល​ចំណាយ “x” ហើយ​ទទួល​បាន “x” នោះ​ទេ​»។

លោក Dave Welsh នាយក​ប្រចាំ​ប្រទេស​នៅ​មជ្ឈមណ្ឌល​ពង្រឹង​ក្រុម​សិទ្ធិ​ការងារ​ (ACILS) មិន​សូវ ពេញចិត្ត​ជាមួយ​នឹង​ការ​ប្រកាស​នេះ​ទេ ដោយ​ចាត់​ទុក​ថា ប្រាក់​ចំណេញ​ដ៏ធំ​នោះ​កម្រ​បាន​ដល់​ដៃ​កម្មករ​។ លោក​បន្ត​ថា​៖ «​វា​មាន​ភាព​​គ្រប់គ្រាន់​រួច​ហើយ​នៅក្នុង​ចិត្ត​របស់​ខ្ញុំ​ក្នុង ការ​និយាយ​ថា យីហោ​ទាំងនោះ អាច​មាន​ការ​ជាប់​ពាក់ព័ន្ធ​ពិតប្រាកដ​ក្នុង​មធ្យោបាយ​នៃ​តម្លៃ បច្ចុប្បន្ន​នេះ​»។

លោកស្រី Helmersson នៅ​ក្រុមហ៊ុន H&M បាន​ប្រាប់ AFP ថា ក្រុមហ៊ុន​នេះ​អាច​ប្រើប្រាស់​ឥទ្ធិពល​របស់​ខ្លួន​ជាមួយ​នឹង​ក្រុមហ៊ុន​ផ្គត់ផ្គង់ និង​រដ្ឋាភិបាល​ដើម្បី​កែលម្អ​លក្ខខណ្ឌ​ការងារ និង​ដើម្បី​បញ្ចុះបញ្ចូល​សម្រាប់​ដំឡើង​ប្រាក់​ឈ្នួល​អប្បបរមា​។ លោកស្រី​បាន​ថ្លែង​ថា​៖ «​យើង​អាច​កំណត់​គោលដៅ​ក្នុង​ការ​ធានា​ឲ្យ​ប្រាកដ​ថា រចនាសម្ព័ន្ធ​ប្រាក់​ខែ​ត្រឹមត្រូវ​គឺ​កើតឡើង​ជាមួយ​នឹង​ក្រុមហ៊ុន​ផ្គត់ផ្គង់​របស់​យើង​»។

ការ​ដំឡើង​ប្រាក់​ឈ្នួល​អាច​ជា​បំណង​ចុងក្រោយ​បំផុត​របស់ H&M ក្នុង​ការ​រក​ទីតាំង​របស់​ខ្លួន​ក្នុង​ពិភពលោក​។

កាលពី​ខែ​តុលា​លោក Karl-Johan Persson អគ្គនាយក​ក្រុមហ៊ុន H&M បាន​ជួប​ជាមួយ​លោក​នាយករដ្ឋមន្ដ្រី ហ៊ុន សែន ក្នុង​ការ​ជំរុញ​ឲ្យ​មាន​ការ​ត្រួតពិនិត្យ​កម្មករ​កាត់ដេរ​ប្រចាំ​ឆ្នាំ និង​មុខងារ​ទាក់ទង​ផ្នែក​ឧស្សាហកម្ម​។ កាលពី​ខែ​វិច្ឆិកា ក្រុមហ៊ុន H&M បាន​ប្រាប់​ភ្នំពេញ​ប៉ុស្ដិ៍​ថា ពួកគេ​បាន​ចាប់​ដៃ​ជា​ក្រុម​មួយ​ក្រុមហ៊ុន​ផ្គត់ផ្គង់​របស់​ខ្លួន ដើម្បី​បង្កើត​«​គំរូ​រោងចក្រ​» នៅ​កម្ពុជា​ទោះ​បី​ជា​ទីតាំង​មិន​ត្រូវ​បាន​បង្ហាញ​ក៏​ដោយ។

លោក Elin Hallerby មន្ដ្រី​ព័ត៌មាន​របស់​ក្រុមហ៊ុន H&M បាន​និយាយ​នៅក្នុង​អ៊ីមែល​មួយ​កាលពី​ថ្ងៃ​ទី​១៣ ខែ​វិច្ឆិកា​ថា៖ « បំណង​របស់​យើង​គឺ​ដើម្បី​ធ្វើការ​ជាមួយ​ពួកគេ និង​បង្កើត​បទដ្ឋាន​សម្រាប់​ឧស្សាហកម្ម​របស់​យើង​នៅក្នុង​តំបន់​ជាច្រើន មាន​ដូចជា​គុណភាព និង​និរន្តរភាព ទាំង​បរិស្ថាន និង​ទិដ្ឋភាព​សង្គម​»។

លោក អាត់ ធន់ ប្រធាន​សហភាព​ប្រជាធិបតេយ្យ​កម្មករ​កាត់ដេរ​កម្ពុជា​ឲ្យ​ដឹង​ថា H&M ជា​អ្នក​ទិញ​ដ៏​ធំ​មួយ​សម្រាប់​កម្ពុជា​។

លោក​បន្ត​ថា​៖ «​ខ្ញុំ​ពិតជា​សង្ឃឹម​ថា អ្នក​បញ្ជា​ទិញ​ផ្សេង​ទៀត​គួរ​តែ​ធ្វើ​តាម​ពួកគេ​។ អ្នក​ប្រើប្រាស់ អាច​ឆ្លើយតប​ជា​វិជ្ជមាន​ចំពោះ​ការ​ប្រកាស​នេះ​។ ខ្ញុំ​ជឿ​ថា អតិថិជន​កាន់​តែ​ច្រើន​នឹង​ទិញ​ផលិតផល H&M បើ​ពួកគេ​យល់​ពី​ឆន្ទៈ​រួម​នឹង​ជួយ​បង្កើត​បទដ្ឋាន​នៃ​ជីវភាព រស់នៅ​របស់​កម្មករ​កាត់ដេរ​៕ PB

អត្ថបទគួរចាប់អារម្មណ៍