.jpg)
លោក ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារអន្តរក្រសួងរៀបចំការចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ថ្លែងនាពេលកន្លងមក។ រូបថត FN
ភ្នំពេញ: In Hai Decoration (Cambodia)Co., Ltd គឺជាក្រុមហ៊ុនដំបូងគេបានចុះបញ្ជីអាជីវកម្មតាមប្រព័ន្ធបច្ចេកវិទ្យាព័ត៌មានដោយជោគជ័យចាប់តាំងពីដាក់ឲ្យដំណើរការជាផ្លូវការកាលពីពាក់កណ្តាលខែមិថុនា។
លោក មាស សុខសេនសាន្ត អ្នកនាំពាក្យក្រសួងសេដ្ឋកិច្ច និងហិរញ្ញវត្ថុប្រាប់ភ្នំពេញប៉ុស្តិ៍កាលពីថ្ងៃចន្ទថា ក្រុមហ៊ុននេះបានចុះបញ្ជីអាជីវកម្មនៅថ្ងៃទី ២២ ខែមិថុនា ហើយទទួលបានការអនុម័តពីក្រសួងពាណិជ្ជកម្ម ក្រសួងការងារ និងបណ្តុះបណ្តាលវិជ្ជាជីវៈ និងអគ្គនាយកដ្ឋានពន្ធដារនៅថ្ងៃទី ២៥ ខែមិថុនា ដោយចំណាយពេលត្រឹមតែ ៤ ថ្ងៃប៉ុណ្ណោះ ដើម្បីទទួលបានអាជ្ញាប័ណ្ណអាជីវកម្ម។
លោកថ្លែងថា៖ «ក្រសួងនឹងធ្វើការពង្រីកការចុះបញ្ជីអាជីវកម្មតាមប្រព័ន្ធបច្ចេកវិទ្យាព័ត៌មានទៅតាមក្រសួង និងស្ថាប័នពាក់ព័ន្ធផ្សេងទៀតនៅពេលអនាគត ដើម្បីសម្រួលដល់ការចុះបញ្ជីអាជីវកម្មកាន់តែមានភាពងាយស្រួល»។
លោក ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារអន្តរក្រសួងរៀបចំការចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានបានថ្លែងក្នុងពិធីប្រកាសដាក់ឲ្យដំណើរការជាផ្លូវការនូវប្រព័ន្ធចុះបញ្ជីអាជីវកម្មថ្មីនេះកាលពីថ្ងៃទី ១៥ មិថុនា ថាប្រព័ន្ធចុះបញ្ជីថ្មីនេះនឹងតម្រូវឲ្យក្រុមហ៊ុនបំពេញទម្រង់ចុះបញ្ជីអាជីវកម្មតែ ១ លើកគត់ដោយចំណាយពេលយ៉ាងយូរត្រឹម ៨ ថ្ងៃប៉ុណ្ណោះ។
លោកបន្តថា រាល់ទិន្នន័យរបស់ក្រុមហ៊ុនចុះបញ្ជីអាជីវកម្មនឹងបញ្ជូនទៅដោយស្វ័យប្រវត្តិទៅក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម ក្រសួងមហាផ្ទៃ ក្រសួងការងារ អគ្គនាយកដ្ឋានពន្ធដារ និងក្រុមប្រឹក្សាអភិវឌ្ឍន៍កម្ពុជា ដើម្បីត្រួតពិនិត្យ និងអនុម័ត។
លោកថ្លែងថា៖ «រាល់ដំណើរការទាំងអស់នឹងធ្វើឡើងទាំងស្រុងតាមអនឡាញ ពុំមានការប្រើប្រាស់ឯកសាររូបីទេ ការបង់ថ្លៃសេវាក៏ត្រូវធ្វើឡើងតាមអនឡាញដែរ ហើយឯកសារវិញ្ញាបនបត្រដែលចេញដោយក្រសួងសា្ថប័នក៏នឹងផ្តល់ជូនជាទម្រង់ឌីជីថលដែលអាចបោះពុម្ពដោយខ្លួនឯងយកទៅប្រើប្រាស់ជាផ្លូវការ»។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុថ្លែងថា កំណែទម្រង់នេះនឹងរួមចំណែកលើកកម្ពស់ភាពទាក់ទាញរបស់កម្ពុជានឹងប្រែក្លាយកម្ពុជាទៅជាទិសដៅវិនិយោគប្រកបដោយសក្តានុពល។
លោកថ្លែងថា៖ «ខ្ញុំសូមស្នើ និងលើកទឹកចិត្តឲ្យធុរជនប្រើប្រាស់ និងទាញយកប្រយោជន៍ពីប្រព័ន្ធ និងយន្តការនៃការចុះបញ្ជីអាជីវកម្មថ្មីនេះឲ្យអស់ពីសក្តានុពល»។
ការចុះបញ្ជីក្នុងយន្តការថ្មីនេះគឺក្រសួងពាណិជ្ជកម្មបានកាត់បន្ថយការចំណាយ ៤០ ភាគរយ ការបង់ពន្ធប៉ាតង់សម្រាប់ឆ្នាំដែលធ្វើការចុះបញ្ជីបានកាត់បន្ថយ ៥០ ភាគរយ ហើយការបង់ពន្ធប្រថាប់ត្រានៃឯកសារចុះបញ្ជីថ្មីនេះត្រូវបានលើកលែង និងមិនតម្រូវឲ្យធុរជនថតរូបស្កេម្រាមដៃ ក្រោយពីចុះបញ្ជីអាជីវកម្មភ្លាមៗឡើយ។ នេះបើតាមលោក ផល្លា៕ LA
