.jpg)
លោកស្រី Sussie Ketit នាយកប្រចាំតំបន់ទទួលបន្ទុកក្រុមហ៊ុន Skiold A/S និងលោក Ong Jia Jing អ្នកគ្រប់គ្រងទូទៅ និងជានាយកប្រតិបត្តិក្រុមហ៊ុន Hong Lai Huat Group ក្នុងពិធីចុះ MoU។ រូបថត សហការី
ភ្នំពេញៈ ក្រុមហ៊ុនអចលនទ្រព្យ និងកសិកម្ម Hong Lai Huat Group Limited របស់សិង្ហបុរីដែលបច្ចុប្បន្នវិនិយោគលើការដាំដុះ និងរោងចក្រកែច្នៃម្សៅដំឡូងមីលើផ្ទៃដីជិត ១ ម៉ឺនហិកតា ក្នុងស្រុកឱរ៉ាល់ខេត្តកំពង់ស្ពឺកាលពីថ្ងៃទី ៧ ខែកញ្ញា បានចុះហត្ថលេខាលើអនុស្សរណៈនៃការយោគយល់ (MoU) ជាមួយ Skiold ដែលជាក្រុមហ៊ុនផ្គត់ផ្គង់ឧបករណ៍កសិកម្មមានមូលដ្ឋាននៅប្រទេសដាណឺម៉ាកក្នុងគោលបំណងសហការ អភិវឌ្ឍតំបន់សេដ្ឋកិច្ចពិសេស កសិកម្មកម្ពុជា-សិង្ហបុរី ជាមួយនឹងតម្លៃវិនិយោគប៉ាន់ប្រមាណ ១ ពាន់លានដុល្លារ។ នេះបើយោងតាមក្រុម Hong Lai Huat Group។
សេចក្ដីប្រកាសព័ត៌មានរបស់ក្រុមហ៊ុនបានឲ្យដឹងថា គោលបំណងនៃ MoU ដែលបានចុះហត្ថលេខារវាងក្រុមហ៊ុនទាំង ២ នឹងបង្កើតមូលដ្ឋាននៃវេទិកាក្នុងការផ្លាស់ប្តូរកិច្ចសហប្រតិបិត្តការទៅវិញទៅមកលើកដំបូង ដើម្បីលើកកម្ពស់កិច្ចសហប្រតិបត្តិការពាណិជ្ជកម្ម និងសេដ្ឋកិច្ច និងការផ្លាស់ប្តូរបច្ចេកទេសនៅក្នុងវិស័យចិញ្ចឹមសត្វ ដូចជា មាន់ទា និងគោក្របី ព្រមទាំងការកែច្នៃគ្រាប់ពូជផលិតផលកសិកម្មសម្រាប់ប្រទេសកម្ពុជា។
ក្រុមហ៊ុននេះបន្តថា នៅក្នុងរយៈពេល ៦ ខែ ពួកគេនឹងផ្ដោតការយកចិត្តទុកដាក់លើទិដ្ឋភាពខាងលើនេះជាមុនសិន មុនពេលការចុះហត្ថលេខាលើកិច្ចព្រមព្រៀងដែលត្រូវអនុវត្តជាចាំបាច់គឺគំនិតផ្តួចផ្ដើមបង្កើតការផលិតបសុសត្វ និងពូជផលិតផលកសិកម្មនៅក្នុងតំបន់សេដ្ឋកិច្ចកសិកម្មកម្ពុជា សិង្ហបុរីនេះ។
លោក Ong Jia Jing អ្នកគ្រប់គ្រងទូទៅ និងជានាយកប្រតិបត្តិក្រុមហ៊ុន Hong Lai Huat Group បានឲ្យដឹងថា៖ «យើងរីករាយខ្លាំងណាស់ដោយមាន MoU ជាមួយក្រុមហ៊ុន Skiold A/S លើកិច្ចសហប្រតិបត្តិការដ៏មានសក្ដានុពលនៃតំបន់សេដ្ឋកិច្ចពិសេសកសិកម្ម»។
លោកបានលើកឡើងទៀតថា នៅក្នុងពិភពលោកមួយដែលបានរងផលប៉ះពាល់យ៉ាងខ្លាំងដោយជំងឺកូវីដ ១៩ សន្ដិសុខស្បៀងអាហារគឺជាបញ្ហាសំខាន់ខ្លាំងបំផុតដែលប្រទេសទាំងអស់កំពុងស្វែងរកដំណោះស្រាយ។
លោកអះអាងថា៖ «យើងជឿជាក់ថា ការសហការនេះនឹងមានន័យបំផុត និងជាជោគជ័យមួយសម្រាប់ក្រុមហ៊ុនរបស់យើងទាំង ២ ហើយនឹងអាចឲ្យពួកយើងរួមចំណែកដល់ការអភិវឌ្ឍប្រទេសកម្ពុជា ព្រមទាំងប្រទេសសិង្ហបុរីផងដែរ»។
លោកស្រី Sussie Ketit នាយកប្រចាំតំបន់ទទួលបន្ទុកក្រុមហ៊ុន Skiold A/S បានឲ្យដឹងថា ក្នុងរយៈពេលជាង ១៤០ ឆ្នាំនៃការអភិវឌ្ឍ ការព្យាករ និងការផលិតគ្រឿងចក្រទំនើបសម្រាប់កសិឧស្សាហកម្ម Skiold ជាក្រុមហ៊ុន ដែលមានបទពិសោធច្រើនបំផុតនៅក្នុងវិស័យទាំងនេះ ដែលផ្ដល់គម្រោងជាច្រើនប្រកបដោយភាពជោគជ័យជុំវិញពិភពលោក។
លោកស្រី Ketit បានឲ្យដឹងថា៖ «ការធ្វើជាក្រុមហ៊ុនមួយដែលមានជំនាញដ៏ទូលំទូលាយផ្នែកឧស្សាហកម្មចិញ្ចឹមសត្វ យើងមើលឃើញថា ការសហការនេះជាការតភ្ជាប់ដ៏ល្អបំផុត ហើយសង្ឃឹមថា យើងនឹងមើលឃើញលទ្ធផលវិជ្ជមានបានពីគំនិតផ្តួចផ្ដើមនេះ មិនគ្រាន់តែប្រទេសកម្ពុជាប៉ុណ្ណោះទេ ប៉ុន្តែថែមទាំងសម្រាប់ប្រទេសសិង្ហបុរីផងដែរ»។
លោកស្រី Ketit ថ្លែងថា៖ «យើងគិតថា តាមរយៈគំនិតផ្ដួចផ្ដើមនេះជាលទ្ធផលជួយប្រទេសសិង្ហបុរីសម្រេចបានតាមចក្ខុវិស័យឆ្នាំ ២០៣០»។
លោក វី សំណាង អភិបាលខេត្តកំពង់ស្ពឺបានឲ្យដឹងថា កិច្ចសហប្រតិបត្តិការនេះនឹងជួយអភិវឌ្ឍខេត្តនេះ បង្កើតការងារកាន់តែច្រើន និងទីផ្សារថ្មីៗសម្រាប់ផលិតផលកសិកម្ម។
លោក សំណាង បញ្ជាក់ថា៖ «ខ្ញុំស្វាគមន៍ និងគាំទ្រពួកគេ។ ខ្ញុំចង់ឲ្យពួកគេវិនិយោគនៅក្នុងខេត្តនេះ ដើម្បីជួយបង្កើនចង្វាក់ផលិតកម្ម ជាពិសេសស្វែងរកទីផ្សារសម្រាប់កសិករ»។
ក្រុមហ៊ុន Hong Lai Huat គឺជាប្រតិបត្តិករចម្ការដំឡូងមីឈានមុខគេមួយ និងជាក្រុមហ៊ុនផលិតម្សៅដំឡូងមីនៅក្នុងស្រុកឱរ៉ាល់ ខេត្តកំពង់ស្ពឺ ប្រទេសកម្ពុជាសម្រាប់អ្នកប្រើប្រាស់ឧស្សាហកម្មស្បៀងអាហារនៅអឺរ៉ុប និងអាស៊ីអាគ្នេយ៍។
ក្រុមហ៊ុននេះ គ្រប់គ្រងផ្ទៃដីដាំដុះដំឡូងមីប្រហែល ៩ ០០០ ហិកតា ដោយផលិតម្សៅដំឡូងមីដែលអាចកែច្នៃជាស្បៀងអាហារប្រហែល ៣៦ ០០០ តោន ក្នុង ១ ឆ្នាំ ហើយរួមជាមួយរោងចក្ររបស់ខ្លួនផ្សេងៗទៀត ក្រុមហ៊ុនមានលទ្ធភាពផ្គត់ផ្គង់ម្សៅដំឡូងមីរហូតដល់ ១០០ ០០០ តោន ក្នុង ១ ឆ្នាំ៕LA
