ទីក្រុងឡុងដ៍ៈ ការគាំទ្ររបស់ធនាគារ HSBC ដែលជាស្ថាប័នហិរញ្ញវត្ថុផ្តោតលើទីផ្សារហិរញ្ញវត្ថុនៅតំបន់អាស៊ី ចំពោះច្បាប់សន្តិសុខហុងកុងដ៏ចម្រូងចម្រាសរបស់ប្រទេសចិនមិនត្រូវបានសាទរក្នុងប្រទេសអង់គ្លេសដែលជាអតីតអ្នកគ្រប់គ្រងទីក្រុងហុងកុងនោះទេ។
ស្ថាប័នហិរញ្ញវត្ថុផ្តល់ប្រាក់កម្ចីដែលមានទីស្នាក់ការនៅទីក្រុងឡុងដ៍នេះកាលពីសប្តាហ៍កន្លងទៅបានបង្ហាញការគាំទ្រចំពោះសំណើច្បាប់ដ៏ចម្រូងចម្រាសរបស់ទីក្រុងប៉េកាំងសម្រាប់ទីក្រុងហុងកុងដែលក្រុមអ្នករិះគន់បារម្ភថានឹងត្រូវបានប្រើប្រាស់ដើម្បីកម្ចាត់ចោលក្រុមប្រឆាំងក្នុងទីក្រុងនេះ។
សេចក្តីប្រកាសរបស់ធនាគារ HSBC បានធ្វើឲ្យមជ្ឈដ្ឋានធុរកិច្ច និងនយោបាយនៅអង់គ្លេសខឹងសម្បាដែលអង់គ្លេសបានប្រគល់អតីតតំបន់អាណានិគមទៅកាន់ការគ្រប់គ្រងរបស់ចិនវិញក្នុងឆ្នាំ ១៩៩៧។
ការសម្រេចចិត្តរបស់ធនាគារនេះបានរាំងមុខអនុសញ្ញាដែលចែងអំពីការចៀសវាងការអន្តរាគមន៍ផ្នែកនយោបាយ។
ទោះជាយ៉ាងណាលោក Peter Wong នាយកជាន់ខ្ពស់ប្រចាំអាស៊ីនៃ HSBC បានចុះហត្ថលេខាលើញត្តិគាំទ្រច្បាប់នោះ។
ក្រៅពីនោះធនាគារ Standard Chartered ដែលបានចុះបញ្ជីនៅទីក្រុងឡុងដ៍ដែលផ្តោតជាចម្បងលើទីផ្សារហិរញ្ញវត្ថុតំបន់អាស៊ីដែរនោះ ក៏បានគាំទ្រទីក្រុងប៉េកាំងចំពោះច្បាប់នេះ។
លោក David Madden អ្នកវិភាគទីផ្សារនៅក្រុមហ៊ុន CMC បានមានប្រសាសន៍ថា៖ «ធនាគារដែលបានចុះបញ្ជីនៅចក្រភពអង់គ្លេសបានគាំទ្រប្រទេសចិន ព្រោះវាច្បាស់ណាស់ថា ពួកគេចង់រួមរស់ជាមួយប្រទេសមានសេដ្ឋកិច្ចធំទី ២ នៅលើពិភពលោក»។
HSBC បានទទូចថា វិធានការរបស់ចិននឹងជួយឲ្យហុងកុងមានស្ថិរភាព និងធ្វើឲ្យសេដ្ឋកិច្ចទីក្រុងនេះដើរតួសំខាន់។
ការគាំទ្ររបស់ HSBC បានកើតឡើងបន្ទាប់ពីលោក Leung Chunying អតីតមេដឹកនាំហុងកុងដែលគាំទ្រក្រុងប៉េកាំង បានរិះគន់ធនាគារដែលមិនបានគាំទ្រច្បាប់នោះជាសាធារណៈ ខណៈដែលទទួលប្រាក់ចំណេញពីផលប្រយោជន៍ពាណិជ្ជកម្មចិន។
ទីផ្សារតំបន់អាស៊ីនៅតែសំខាន់ចំពោះ HSBC ពីព្រោះធនាគារនេះបង្កើតផលចំណេញភាគច្រើនក្នុងតំបន់នេះ។
នាយកប្រតិបត្តិធនាគារនេះលោក Noel Quinn បានប្រកាសផែនការដើម្បីកាត់បន្ថយការងារចំនួន ៣៥ ០០០ កន្លែងនៅឆ្នាំនេះ ខណៈដែល HSBC ពង្រឹងការផ្តោតលើទីផ្សារហិរញ្ញវត្ថុអាស៊ី និងកាត់បន្ថយបន្ទុកពីសកម្មភាពចំណេញតិចតួចនៅអឺរ៉ុប និងសហរដ្ឋអាមេរិក។
ធនាគារ HSBC ដែលជាអក្សរកាត់មកពីពាក្យ «the Hong Kong & Shanghai Banking Corporation» មានទំនាក់ទំនងយ៉ាងជិតស្និទ្ធនឹងប្រវត្តិនៃទឹកដីអាណានិគមរបស់អង់គ្លេស៕ RR