ក្រុងប៉េកាំងៈ ក្រុមហ៊ុន Huawei កាលពីថ្ងៃអង្គារមិនខ្វល់ខ្វាយនឹងការពន្យារពេលរយៈពេល ៣ ខែទៀតដែលផ្តល់ឲ្យដោយទីក្រុងវ៉ាស៊ីនតោនចំពោះការហាមឃាត់ក្រុមហ៊ុនអាមេរិកមិនឲ្យលក់ផលិតផលរបស់ខ្លួនទៅឲ្យក្រុមហ៊ុនបច្ចេកវិទ្យាចិនមួយនេះ និងបានឲ្យដឹងថា ការសម្រេចចិត្តនេះនឹងមិនផ្លាស់ប្តូរការពិតដែលថា ខ្លួនត្រូវបាន «គេប្រព្រឹត្តមកលើដោយអយុត្តិធម៌» នោះទេ។
ក្រសួងពាណិជ្ជកម្មអាមេរិកបានពន្យារពេលជាលើកទី ២ ចំពោះវិធានការហាមឃាត់ដ៏តឹងរ៉ឹងនេះដែលការហាមឃាត់នេះបើមិនត្រូវបានពន្យារពេលទេនោះនឹងបញ្ឈប់ការលក់គ្រឿងផ្គុំ និងសេវាទៅឲ្យក្រុមហ៊ុនទូរគមនាគមន៍ឈានមុខគេ Huawei និងហាមឃាត់ការទិញឧបករណ៍ពីក្រុមហ៊ុនចិននេះ។
ប៉ុន្តែក្រសួងពាណិជ្ជកម្មអាមេរិកក៏បានឲ្យដឹងដែរថា ក្រសួងនឹងបន្ថែមក្រុមហ៊ុនចំនួន ៤៦ បន្ថែមទៀតទៅក្នុងបញ្ជីរបស់ក្រសួងដែលជាបញ្ជីឈ្មោះក្រុមហ៊ុនបុត្រសម្ព័ន្ធ និងក្រុមជាប់ពាក់ព័ន្ធនឹងក្រុមហ៊ុន Huawei ដែលក្រុមហ៊ុនក្នុងបញ្ជីនេះនឹងត្រូវបានគ្របដណ្ដប់ដោយការហាមឃាត់នេះ ប្រសិនបើវិធានការនេះត្រូវបានអនុវត្តពេញលេញដែលធ្វើឲ្យចំនួនក្រុមហ៊ុនសរុបនៅលើបញ្ជីនេះកើនឡើងដល់ជាង ១០០ ក្រុមហ៊ុន។
ការហាមឃាត់ដើមត្រូវបានប្រកាសកាលពីដើមឆ្នាំនេះ ដោយអាជ្ញាធរអាមេរិក ដែលបញ្ជាក់ថាក្រុមហ៊ុននេះផ្ដល់ព័ត៌មានសម្ងាត់សម្រាប់សេវា ព័ត៌មានចារកម្មរបស់ប្រទេសចិនជាអ្វីដែលក្រុមហ៊ុននេះបដិសេធ។
ក្រុមហ៊ុន Huawei បានឆ្លើយតបនៅក្នុងសេចក្ដីប្រកាសព័ត៌មានមួយថា៖ «វាច្បាស់ណាស់ថា ការសម្រេចចិត្តនេះដែលបានធ្វើឡើងក្នុងពេលវេលាជាពិសេសនេះគឺជាហេតុផលនយោបាយ និងមិនជាប់ទាក់ទងជាមួយនឹងសន្ដិសុខជាតិអាមេរិកនោះទេ»។ ក្រុមហ៊ុន Huawei បន្ថែមថាវិធានការជាច្រើន «រំលោភលើគោលការណ៍មូលដ្ឋាននៃការប្រកួតប្រជែងទីផ្សារសេរី»។
ក្រុមហ៊ុន Huawei បានឲ្យដឹងថា៖ «ពួកគេមិនចាប់អារម្មណ៍ទៅនឹងក្រុមហ៊ុនណាមួយនោះទេ ដែលរួមទាំងក្រុមហ៊ុនអាមេរិកផងដែរ។ ការប៉ុនប៉ងក្នុងការបង្ក្រាបអាជីវកម្មរបស់ក្រុមហ៊ុន Huawei នឹងមិនជួយដល់អាមេរិកសម្រេចបានភាពនាំមុខគេផ្នែកបច្ចេកវិទ្យាឡើយ»។ ក្រុមហ៊ុន Huawei បន្តថា៖ «ការពន្យារពេលអាជ្ញាប័ណ្ណទូទៅបណ្ដោះអាសន្ន (TG-L) មិនផ្លាស់ប្តូរការពិតដែលថា ក្រុមហ៊ុន Huawei ត្រូវបានគេប្រព្រឹត្តមកលើដោយអយុត្តិធម៌នោះឡើយ»។
ចំណាត់ការដែលធ្វើឡើងកាលពីថ្ងៃចន្ទនេះមានន័យថាក្រុមហ៊ុន Huawei អាចបន្តទិញឧបករណ៍ពាក់កណ្ដាលចម្លងដែលផលិតនៅអាមេរិក និងសម្ភារផ្សេងទៀតដែលមានសារៈសំខាន់សម្រាប់ទូរស័ព្ទ និងឧបករណ៍បណ្ដាញរបស់ខ្លួន និងថា ក្រុមហ៊ុនទូរគមនាគមន៍អាមេរិកអាចបន្តទិញឧបករណ៍បណ្ដាញរបស់ក្រុមហ៊ុន Huawei ផងដែរ។
ក្រុមហ៊ុន Huawei ដែលត្រូវបានចាត់ទុកជាក្រុមហ៊ុននាំមុខគេលើពិភពលោកផ្នែកឧបករណ៍ 5G ល្បឿនលឿនបំផុត និងជាក្រុមហ៊ុនផលិតទូរស័ព្ទស្មាតហ្វូនលំដាប់លេខ ២ របស់ពិភពលោកកាលពីខែឧសភាត្រូវបានជាប់ពាក់ព័ន្ធនៅក្នុងសង្គ្រាមពាណិជ្ជកម្មកាន់តែជ្រៅរវាងទីក្រុងប៉េកាំង និងទីក្រុងវ៉ាស៊ីនតោនដែលបានបង្កឲ្យមានការដកហូតពន្ធនាំចូលពិន័យទៅលើពាណិជ្ជកម្មទ្វេភាគីក្នុងតម្លៃច្រើនពាន់លានដុល្លារ។
ការផ្អាកអនុវត្តការហាមឃាត់នេះមិនផ្ដល់សញ្ញានៃផ្លាស់ប្តូរក្តីបារម្ភរបស់សហរដ្ឋអាមេរិកថា ឧបករណ៍របស់ក្រុមហ៊ុន Huawei បង្កការគំរាមសន្ដិសុខជាតិ ឬលុបចោលការហាមឃាត់ទូទៅលើការប្រើប្រាស់ប្រព័ន្ធ 5G របស់ក្រុមហ៊ុន Huawei នៅអាមេរិកនោះទេ៕ LA