.jpg)
ក្រុមកម្មករកំពុងដើរប្រមូលផលម្រេចពីដើមដាក់ក្នុងកញ្ជើនាពេលកន្លងមក។ ភ្នំពេញប៉ុស្តិ៍
ភ្នំពេញ: Hyundai Mao Legacy Co., ដែលជាក្រុមហ៊ុនកូរ៉េខាងត្បូងនឹងពង្រីកការនាំចេញផលិតផលម្រេច គ្រាប់ស្វាយចន្ទី និងស្ករសពីកម្ពុជាទៅកាន់ទីផ្សារកូរ៉េបន្ថែមទៀត បន្ទាប់ពីក្រុមហ៊ុននេះទទួលបានជោគជ័យពីការនាំចេញផ្លែស្វាយស្រស់ និងផលិតផលកសិកម្មមួយចំនួនទៀត។
លោក ឡុង ឌីម៉ង់ ឯកអគ្គរាជទូតកម្ពុជាប្រចាំនៅប្រទេសកូរ៉េខាងត្បូងប្រាប់ភ្នំពេញប៉ុស្តិ៍កាលពីថ្ងៃអង្គារថា កាលពីសប្តាហ៍មុនលោក ខាត់ ចិន អនុព័ន្ធពាណិជ្ជកម្មនៃស្ថានទូតកម្ពុជាប្រចាំនៅកូរ៉េបាននាំយកគំរូផលិតផលកសិកម្មមួយចំនួនរបស់កម្ពុជារួមមាន ស្ករស គ្រាប់ស្វាយចន្ទី និងម្រេចទៅឲ្យក្រុមហ៊ុន Hyundai Mao Legacy Co., ពិនិត្យមុននឹងឈានដល់ការចុះកិច្ចព្រមព្រៀងទិញលក់ជាមួយក្រុមហ៊ុនរបស់កម្ពុជា។
លោកថ្លែងថា៖ «ក្រោយពីពិនិត្យគំរូផលិតផលកសិកម្មកម្ពុជារួច ក្រុមហ៊ុនកំពុងពិចារណាកិច្ចការនេះ»។
ក្រុមហ៊ុន Hyundai Mao Legacy Co., គឺជាក្រុមហ៊ុនវិនិយោគរួមគ្នាដោយក្រុមហ៊ុន Hyundai Corporation របស់កូរ៉េខាងត្បូងដែលវិនិយោគលើដំណាំស្វាយ និងរោងចក្រវេចខ្ចប់ផ្លែស្វាយនៅក្នុងខេត្តកំពង់ស្ពឺ។
លោកបន្តថា បច្ចុប្បន្នក្រុមហ៊ុននេះបាននាំចូលរួចហើយនៃផលិតផលកសិកម្មកម្ពុជាដែលមានផ្លែស្វាយស្រស់ គល់ស្លឹកគ្រៃ ស្លឹកចេក ត្រយូងចេក និងរំដេង ជាដើមទៅកាន់ប្រទេសកូរ៉េ។ លោកបន្ថែមថា៖ «ក្រៅពីផលិតផលទាំងនេះ ក្រុមហ៊ុនក៏កំពុងពិនិត្យមើលលើការនាំចូលកង្កែប ត្រីក្រហម ត្រីរ៉ស់ ត្រីអណ្ដែង ត្រីប្រា ពីប្រទេសកម្ពុជាផងដែរ»។
កម្ពុជាបាននាំចេញផលិតផលកសិកម្មសរុបជាង ២,៦៨ លានតោនក្នុងរយៈពេល ៧ ខែដើមឆ្នាំនេះ។ ក្នុងនោះម្រេច ចំនួន ៣ ៤៣០ តោន និងគ្រាប់ស្វាយចន្ទី ១៩៤ ៥២៥ តោន។
លោក ងួន ឡាយ ប្រធានសមាគមលើកកម្ពស់ម្រេចកំពតបានប្រាប់ភ្នំពេញប៉ុស្តិ៍កាលពីថ្ងៃអង្គារថា ការបង្ហាញគំរូផលិតផលរបស់កម្ពុជាឲ្យក្រុមហ៊ុនកូរ៉េនេះ គឺជាការខិតខំប្រឹងប្រែងរបស់រដ្ឋាភិបាលក្នុងការស្វែងរកទីផ្សារឲ្យផលិតផលកសិកម្មក៏ដូចជាផលិតម្រេចកំពត។ លោកបន្តថា សព្វថ្ងៃមានក្រុមហ៊ុនកូរ៉េខាងត្បូងតែ ១ គត់គឺក្រុមហ៊ុន Corem Green Co.,Ltd ដែលបានទិញម្រេចកំពតយកទៅទីផ្សាររបស់ប្រទេសកូរ៉េចន្លោះពី ៤ ទៅ ៥ តោនកាលពីឆ្នាំ ២០១៩។
លោកអះអាងថា ដោយសារការរីករាលដាលជំងឺកូវីដ១៩ ក្រុមហ៊ុននេះមិនទាន់មានការបញ្ជាទិញម្រេចកំពតជាថ្មីទៀតទេ។
លោក សុផល ឡៃគង់ អ្នកគ្រប់គ្រងប្រតិបត្តិការរោងចក្ររបស់ក្រុមហ៊ុន Santana Agro Products ដែលកំពុងប្រមូលផលស្វាយចន្ទីលើផ្ទៃដីប្រមាណ ៤០០ ហិកតាបាននិយាយថា ប្រទេសចិនគឺជាទីផ្សារធំជាងគេសម្រាប់គ្រាប់ស្វាយចន្ទី ហើយទីផ្សារធំទី ២ គឺប្រទេសកូរ៉េខាងត្បូង»។
យោងតាម ឡៃគង់ ក្រុមហ៊ុនរបស់លោកបាននាំចេញស្វាយចន្ទីជាង ៦០ តោន ក្នុងឆមាសទី ១ ឆ្នាំ ២០២០ នេះទៅកាន់ទីផ្សារ ចិន កូរ៉េខាងត្បូង ជប៉ុន និងសហភាពអឺរ៉ុប៕ LA
