ប៉ារីសៈ ទីភ្នាក់ងារថាមពលអន្តរជាតិ (IEA) កាលពីថ្ងៃព្រហស្បតិ៍បានឲ្យដឹងថា កំណើនតម្រូវការប្រេងពិភពលោកត្រូវរំពឹងថា នឹងបន្តធ្លាក់ចុះដោយសារការចុះខ្សោយសេដ្ឋកិច្ច និងការរងផលប៉ះពាល់ពីភាពតានតឹងផ្នែកពាណិជ្ជកម្មរវាងប្រទេសអាមេរិក និងចិន។
IEA ដែលមានមូលដ្ឋាននៅទីក្រុងប៉ារីសបានឲ្យដឹងនៅក្នុងរបាយការណ៍ប្រចាំខែចុងក្រោយរបស់ខ្លួនថា៖ «ទំនាក់ទំនងពាណិជ្ជកម្មអន្តរជាតិកាន់តែអាក្រក់ខ្លាំងក្នុងរយៈពេល ២-៣ សប្ដាហ៍កន្លងមកនេះ ប៉ុន្តែមន្ដ្រីរបស់សហរដ្ឋអាមេរិក និងចិនបានប្រកាសថាពួកគេនឹងចាប់ផ្ដើមការចរចាពាណិជ្ជកម្មជាមួយគ្នាឡើងវិញនៅដើមខែតុលាខាងមុខនេះ»។
IEA បានបន្ថែមថា៖ «ជម្លោះពាណិជ្ជកម្ម និងការកើនឡើងភាពមិនច្បាស់លាស់អំពីផលប៉ះពាល់ដោយសារការចាកចេញរបស់ចក្រភពអង់គ្លេសពីសហភាពអឺរ៉ុបកំពុងកាត់បន្ថយកំណើនសេដ្ឋកិច្ចពិភពលោកតាមរយៈការធ្លាក់ចុះពាណិជ្ជកម្ម និងទំនុកចិត្តអតិថិជន ការវាយតម្លៃឡើងវិញនូវចង្វាក់ផ្គត់ផ្គង់ ការធ្លាក់ចុះការវិនិយោគ និងការកាត់បន្ថយដោយផ្ទាល់នៃការធ្វើពាណិជ្ជកម្ម»។
ក្នុងបរិបទនៃភាពមិនច្បាស់លាស់នេះ IEA បានរក្សាការព្យាករកំណើនតម្រូវការប្រេងរបស់ខ្លួនសម្រាប់ឆ្នាំ ២០១៩ និងឆ្នាំ ២០២០ ក្នុងចំនួន ១,១ លានបារ៉ែលក្នុង ១ ថ្ងៃ និង ១,៣ លានបារ៉ែលក្នុង ១ ថ្ងៃ។
IEA ក៏បានកត់សម្គាល់ថាកំណើនតម្រូវការក្នុងរយៈពេល ៦ ខែដំបូងនៃឆ្នាំនេះ មាន ០,៥ លានបារ៉ែល ក្នុង ១ ថ្ងៃ និងបានធ្លាក់ចុះ ០,២ លានបារ៉ែល ក្នុង ១ ថ្ងៃកាលពីខែមិថុនា។
IEA ឲ្យដឹងថា៖ «នៅឆមាសទី ២ ឆ្នាំនេះ យើងសន្មតថាមិនមានភាពអាក្រក់បន្ថែមទៀតក្នុងបរិយាកាសសេដ្ឋកិច្ច និងក្នុងជម្លោះពាណិជ្ជកម្មនោះទេ»។
បើតាម IEA ការផ្គត់ផ្គង់ប្រេងលើពិភពលោកកាលពីខែសីហាបានកើនឡើងពី ០,៥៣ លានបារ៉ែល ដល់ ១០០,៧ លានបារ៉ែលក្នុង ១ ថ្ងៃ។
IEA បានបន្តថាការផ្គត់ផ្គង់ពីក្រុមប្រទេសមិនមែន OPEC ដូចជាអាមេរិក ន័រវែស និងប្រេស៊ីលបានកើនឡើង។
ជាមួយគ្នានេះ IEA បានកត់សម្គាល់ថា កាលពីខែមិថុនាអាមេរិកបានវ៉ាដាច់ប្រទេសអារ៉ាប៊ីសាអ៊ូឌីតក្នុងការក្លាយជាប្រទេសនាំចេញប្រេងឈានមុខគេរបស់ពិភពលោក។
នាពេលនេះផងដែរគេក៏បានកត់សម្គាល់ពី «ព្រឹត្តិការណ៍នយោបាយដ៏សំខាន់មួយនៅក្នុងប្រទេសអារ៉ាប៊ីសាអ៊ូឌីត» គឺការតែងតាំងព្រះម្ចាស់ Abdulaziz bin Salman ជារដ្ឋមន្ដ្រីក្រសួងថាមពល ដែលព្រះអង្គគឺជាអ្នកមានបទពិសោធដ៏ច្រើនក្នុងវិស័យប្រេង»។
IEA ឲ្យដឹងថា៖ «តម្លៃគោលបច្ចុប្បន្នរបស់ប្រេងឆៅ Brent មានប្រហែល ៦១ ដុល្លារ និងប្រេងឆៅ WTI មានប្រហែល ៥៦ ដុល្លារ ក្នុង ១ បារ៉ែល។ តម្លៃប្រេងឆៅទាំង ២ បើធៀបនឹងឆ្នាំមុនគឺធ្លាក់ចុះប្រហែល ២០ ភាគរយ»៕ LA