ភ្នំពេញៈ ប្រធានមូលនិធិអន្តរជាតិសម្រាប់ការអភិវឌ្ឍកសិកម្ម (IFAD) របស់អង្គការសហប្រជាជាតិនឹងជួបជាមួយថ្នាក់ដឹកនាំរដ្ឋាភិបាលកម្ពុជាអំឡុងដំណើរទស្សនកិច្ច រយៈពេល ៣ ថ្ងៃ មកកម្ពុជា ដើម្បីពិភាក្សាពីការវិនិយោគវិស័យកសិកម្ម។ នេះបើតាមសេចក្តីប្រកាសព័ត៌មានដែលភ្នំពេញប៉ុស្តិ៍ទទួលបានកាលពីម្សិលមិញ។
ក្នុងដំណើរទស្សនកិច្ចរយៈពេល ៣ ថ្ងៃ ចាប់ពីថ្ងៃទី ២៥ ដល់ ២៧ ខែកក្កដានេះ លោក Gilbert F. Houngbo ប្រធាន IFAD នឹងជួបពិភាក្សាជាមួយលោក ហ៊ុន សែន នាយករដ្ឋមន្ត្រី និងមន្រ្តីជាន់ខ្ពស់រដ្ឋាភិបាលមួយចំនួនទៀត រួមមាន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីក្រសួងអភិវឌ្ឍន៍ជនបទ ដើម្បីពិភាក្សាអំពីវិស័យកសិកម្មនៅកម្ពុជាដែលផ្តោតលើតួនាទីកសិករខ្នាតតូចនៅតំបន់ជនបទ។
លោក Houngbo បានលើកឡើងនៅក្នុងសេចក្តីប្រកាសព័ត៌មានថា ក្នុងជំនួបនោះនឹងមានការពិភាក្សាអំពីសន្តិសុខស្បៀង និងអាហារូបត្ថម្ភ ការបង្កើតការងារ និងការកាត់បន្ថយផលប៉ះពាល់ពីការប្រែប្រួលអាកាសធាតុនៅតាមជនបទផងដែរ។
លោកបានបញ្ជាក់ថា៖ «IFAD ជាដៃគូអភិវឌ្ឍន៍ប្រកបដោយបទពិសោធ ដែលធ្វើការជាមួយរដ្ឋាភិបាលដើម្បីផ្លាស់ប្តូរនៅតំបន់ជនបទ កាត់បន្ថយភាពក្រីក្រ ភាពអត់ឃ្លាន និងលើកកម្ពស់ជីវភាពកសិករខ្នាតតូចនៅក្នុងតំបន់»។
លោក Houngbo បន្តថា នៅក្នុងប្រទេស កម្ពុជា និងឡាវ កសិករភាគច្រើនប្រកបការចិញ្ចឹមជីវិតផ្អែកលើកសិកម្មខ្នាតតូច តែពួកគេមានសក្តានុពលក្នុងការអភិវឌ្ឍកសិកម្មពួកគេទៅជាលក្ខណៈអាជីវកម្ម បើពួកគេទទួលបានការគាំទ្រផ្នែកហិរញ្ញវត្ថុ ការបណ្តុះបណ្តាលបច្ចេកវិទ្យា និងទីផ្សារ។
បើតាម IFAD នៅកម្ពុជាភាពក្រីក្របានបន្តប៉ះពាល់ខ្លាំងដល់គ្រួសារនៅតាមជនបទ ដោយ ២ ភាគ ៣ នៃប្រជាជន ១,៦ លានគ្រួសារ កំពុងប្រឈមកង្វះអាហារតាមរដូវកាល។
IFAD បានចាប់ផ្តើមប្រតិបត្តិការនៅកម្ពុជាតាំងពីឆ្នាំ ១៩៩៦ ហើយបានអនុវត្តគម្រោងចំនួន ៩ ដោយវិនិយោគ ១៥២ លានដុល្លារ និងផ្តល់អត្ថប្រយោជន៍ដល់ប្រជាជនប្រមាណ ១ ៣៣៨ ៥០០ គ្រួសារ។ បច្ចុប្បន្នមានគម្រោងផ្តល់ប្រាក់កម្ចីចំនួន ៣ និងគម្រោងជំនួយឥតសំណងចំនួន ១ កំពុងដំណើរការ។
ក្នុងអំឡុងទស្សនកិច្ច Gilbert F. Houngbo នឹងទៅពិនិត្យកម្មវិធីសេវាកម្មកសិកម្មសម្រាប់ការច្នៃប្រឌិត និងភាពធន់ទៅនឹងការប្រែប្រួលអាកាសធាតុដែលគាំទ្រពីអង្គការ IFAD ដោយនឹងជួបជាមួយអ្នកចូលរួមគម្រោងដើម្បីមើលពីវឌ្ឍនភាពដែលពួកគេបានធ្វើ បន្ទាប់ពីពួកគេទទួលបានការបណ្តុះបណ្តាល ការពង្រីកសេវា និងកែលម្អហេដ្ឋារចនាសម្ព័ន្ធ (ផ្លូវ ប្រព័ន្ធធារាសាស្រ្ត ទីផ្សារ) នៅក្នុងការគាំទ្រដល់ផលិតផលកសិកម្ម៕