The Phnom Penh Post Search

Search form




Logo of Phnom Penh Post newspaper Phnom Penh Post - IFAD បង្ហាញ​គម្រោង $៥២ លាន​គាំទ្រ​វិស័យ​កសិកម្ម

IFAD បង្ហាញ​គម្រោង $៥២ លាន​គាំទ្រ​វិស័យ​កសិកម្ម

IFAD បង្ហាញ​គម្រោង $៥២ លាន​គាំទ្រ​វិស័យ​កសិកម្ម

ភ្នំពេញៈ មូលនិធិ​អន្តរជាតិ​សម្រាប់​ការ​អភិវឌ្ឍ​កសិកម្ម (IFAD) ពី​ម្សិលមិញ​បង្ហាញ​ផែនការ​មាន​ទឹក​ប្រាក់ ៥២ លាន ដុល្លារ​ក្នុង​ការ​ជួយ​រដ្ឋាភិបាល​កម្ពុជា​បង្កើន​គោល​នយោបាយ​ក្នុង​ការ​ជួយ​កសិករ​ក្រីក្រ​ដើម្បី​កែលម្អ​ផលិត​ភាព​កសិកម្ម។

លោក Benoit Thierry អ្នក​គ្រប់​គ្រង​កម្មវិធី​ប្រចាំ​ប្រទេស​នៅ​តំបន់​អាស៊ី​អាគ្នេយ៍​របស់ IFAD បាន​អះអាង​អំពី​ការ​វិនិយោគ​ថ្មី​នេះ​ព្រមទាំង​ការ​បង្កើត​ការិយាល័យ​ថ្មី​ប្រចាំ​ប្រទេស​នៅ​ទីក្រុង​ភ្នំពេញ កាល​ពី​ម្សិល​មិញ។

លោក Thierry លើក​ឡើង​ថា៖ «យើង​ប្រតិបត្តិការ​ជា​លើក​ដំបូង​ដើម្បី​ធានា​សុវត្ថិភាព​អាហារ និង​អាហារូបត្ថម្ភ​សម្រាប់​កសិករ​ក្រីក្រ​របស់​កម្ពុជា ប៉ុន្តែ​បន្ទាប់​មក​សង្ឃឹម​ថា នឹង​ជំរុញ​ឲ្យ​ពួកគេ​បង្កើត​អាជីវកម្ម​កសិកម្ម​ផ្ទាល់​ខ្លួន​របស់​ពួក​គេ»។

លោក​បន្ត​ថា៖ «នៅ​ពេល​នេះ​យើង​កំពុង​ធ្វើ​ការងារ​ដើម្បី​បង្កើត​ការិយាល័យ​ថ្មី​នៅ​ទីនេះ ហើយ​សង្ឃឹម​ថា នឹង​ចុះ​ហត្ថលេខា​លើ​កិច្ច​ព្រម​ព្រៀង​សម្រាប់​ការិយាល័យ​ថ្មី​នេះ​ជាមួយ​រដ្ឋាភិបាល​នៅ​ពេល​ឆាប់ៗ​នេះ»។

សេចក្ដី​ប្រកាស​របស់ IFAD បាន​ឲ្យ​ដឹង​ថា កម្មវិធី​សេវា​កសិកម្ម​សម្រាប់​ការ​បង្កើត​ថ្មី ភាព​ធន់​នឹង​ការ​ប៉ះ​ទង្គិច និង​ការ​បន្ត (ASPIRE) មាន​ទឹក​ប្រាក់ ៥២ លាន​ដុល្លារ​អាមេរិក​នឹង​ជួយ​ដល់​ក្រសួង​កសិកម្ម រុក្ខា​ប្រមាញ់ និង​នេសាទ​ដើម្បី​ពង្រឹង​ការ​បណ្ដុះ​បណ្ដាល និង​សេវាកម្ម​ដែល​អាច​រក​បាន​ដល់​កសិករ​នៅ​ជនបទ។

សេចក្តី​ប្រកាស​ព័ត៌មាន​បាន​ឲ្យ​ដឹង​ថា ASPIRE នឹង​ដំណើរ​ការ​ក្នុង​រយៈ​ពេល ៦ ឆ្នាំ ដល់ ឆ្នាំ​២០២០ ហើយ​ត្រូវ​គេ​រំពឹង​ថា នឹង​ផ្ដល់​ប្រយោជន៍​ដល់​គ្រួសារ​បង្ក​បង្កើន​ផល​ចំនួន ១០០ ០០០ គ្រួសារ។ ជា​ដំបូង​កម្មវិធី​នេះ​នឹង​ធ្វើ​នៅ​ក្នុង ខេត្ត​កំពង់ឆ្នាំង ពោធិ៍សាត់ បាត់ដំបង ក្រចេះ និង ខេត្ត​ព្រះវិហារ ហើយ​បន្ទាប់​មក​នឹង​គ្រប​ដណ្ដប់​លើ​ខេត្ត ១៤ ទូទាំង​ប្រទេស​កម្ពុជា។

លោក រស់ សេឡាវ៉ា អនុ​រដ្ឋ​លេខា​ធិការ​ក្រសួង​សេដ្ឋកិច្ច និង​ហិរញ្ញវត្ថុ បាន​ស្វាគមន៍​ការ​ប្រកាស​របស់ IFAD ។លោក​បន្ត​ថា៖ «យើង​ចាំបាច់​ត្រូវ​ធានា​ថា កសិករ​ក្រីក្រ​កម្ពុជា​ត្រូវ​បាន​ផ្ដល់​ចំណេះ​ដឹង​និង​សមត្ថភាព​ដើម្បី​មាន​លទ្ធភាព​ចូល​ទីផ្សារ និង​ចងា្វក់​ផ្គត់​ផ្គង់»។

កម្មវិធី​ថ្មី​នេះ​បង្កើន​លើ​កិច្ច​ខិតខំ​ប្រឹង​ប្រែង​របស់​ភ្នាក់ងារ​អង្គការ​សហ​ប្រជាជាតិ​ក្នុង​ការ​បង្កើន​អាជីវកម្ម​កសិកម្ម​ធុន​តូច​នៅ​កម្ពុជា​តាំង​ពី ឆ្នាំ​១៩៩៦។ ការ​ប្ដេជ្ញា​ចិត្ត​ពី​ម្សិលមិញ​នាំ​ឲ្យ​កម្មវិធី​ជំនួយ​ឧបត្ថម្ភ​កសិកម្ម IFAD កើន​ដល់ ៤ គម្រោង​មាន​តម្លៃ ១០០ លាន​ដុល្លារ៕

អត្ថបទគួរចាប់អារម្មណ៍