ភ្នំពេញ: សហគ្រិនជាស្ត្រីនៅតែប្រឈមក្នុងការទទួលបានឥណទានសម្រាប់ពង្រីកអាជីវកម្ម ខណៈអាជីវកម្មជាង ៦០ ភាគរយក្នុងវិស័យ SME នៅកម្ពុជាត្រូវបានគ្រប់គ្រងដោយស្ត្រី។ នេះបើតាមរបាយការណ៍ International Finance Corporation (IFC) ដែលភ្នំពេញប៉ុស្តិ៍ទទួលបាននៅថ្ងៃព្រហស្បតិ៍។
យោងតាម IFC ការលើកឡើងថាស្ត្រីជាធុរកិច្ចនៅកម្ពុជាមិនសូវមានជំនាញ ខ្វះភាពជាអ្នកដឹកនាំ និងគំនិតផ្តួចផ្តើមធ្វើអាជីវកម្មជាការយល់ខុស ខណៈប្រាក់ចំណូល ៩០ ភាគរយនៅក្នុងសហគ្រាសខ្នាតតូច និងមធ្យមបានមកពីអាជីវកម្មគ្រប់គ្រងដោយស្ត្រីកាលពីឆ្នាំ ២០១៨ ដែលមានរហូតដល់ ៦១ ភាគរយនៃវិស័យនេះ។
ទោះបីយ៉ាងនេះក្តី IFC បានរកឃើញថា មានសហគ្រិនជាស្ត្រីមានត្រឹម ៣ ភាគរយប៉ុណ្ណោះអាចទទួលបានឥណទានផ្លូវការពីគ្រឹះស្ថានមីក្រូហិរញ្ញវត្ថុ និងធនាគារ ខណៈតម្រូវការឥណទានដែលសហគ្រិនស្ត្រីត្រូវការត្រូវបានប៉ាន់ប្រមាណថាមាន ៤,២ ពាន់លានដុល្លារ។
របាយការណ៍បន្តថា៖ «ស្រី្តភាគច្រើននៅកម្ពុជាប្រើប្រាស់ហិរញ្ញវត្ថុផ្ទាល់ខ្លួន ដើម្បីចាប់ផ្តើមអាជីវកម្ម ឬពឹងផ្អែកលើប្រភពហិរញ្ញប្បទានក្រៅផ្លូវការ និងការសន្សំដើម្បីពង្រីកអាជីវកម្មរបស់ពួកគេ»។
ការសិក្សានេះរកឃើញថាភាពខុសគ្នារវាងបទដ្ឋានសង្គម និងយេនឌ័រក្នុងការទទួលបានចំណេះដឹងនៅកម្ពុជា នៅតែរារាំងដល់ស្ត្រីក្នុងការពង្រីកឱកាសអប់រំរបស់ខ្លួន ដូច្នេះហើយស្ត្រីមានទំនោរប្រឈមនឹងឧបសគ្គក្នុងការទទួលបានទីផ្សារព័ត៌មាន និងបញ្ហាប្រតិបត្តិការអាជីវកម្មរបស់ពួកគេ។
លោក Vivek Pathak ប្រធានប្រចាំតំបន់អាស៊ីខាងកើត និងប៉ាស៊ីហ្វិកបានលើកឡើងក្នុងរបាយការណ៍នេះថា ការសិក្សានេះរកឃើញថា មិនមែនសហគ្រិនស្ត្រីខ្វះគំនិតរកស៊ីទេ ប៉ុន្តែផ្នត់គំនិតសង្គមពីយេនឌ័រ ឱកាសអប់រំមានកម្រិត ការរឹតត្បិតលើស្ត្រីគឺជាឧបសគ្គសម្រាប់សហគ្រិនស្ត្រីនៅកម្ពុជា។
លោកថ្លែងថា៖ «ពួកគេគ្មានជម្រើសទេ ស្ត្រីមិនងាយស្រួលទទួលបានសេវាពីធនាគារ ខណៈធនាគារនៅកម្ពុជាហាក់មើលរំលងអតិថិជនជាសហគ្រិនស្ត្រី ក្នុងការស្វែងរកប្រាក់កម្ចីដើម្បីពង្រីកអាជីវកម្ម»។
របាយការណ៍បង្ហាញថាបច្ចុប្បន្ននៅកម្ពុជាមានសហគ្រាស ៥១៣ ៧៥៩ ក្នុងនោះ ៩៧,៧ ភាគរយ សហគ្រាសខ្នាតតូច និង ២,២ ភាគរយ សហគ្រាសខ្នាតធំ។ ស្ត្រីគ្រប់គ្រងសហគ្រាសខ្នាតតូច និងមធ្យម ២៦ ភាគរយ និងសហគ្រាសខ្នាតតូច ៦២ ភាគរយ។
លោកស្រី កែវ មុំ នាយិការោងចក្រផលិតនំស្រួយ លីលី បានឲ្យដឹងថា ស្ត្រីជាសហគ្រិនហាក់មានការលំបាកក្នុងការទទួលបានឥណទាន និងមិនទទួលបានអត្រាការប្រាក់ល្អដូចបុរសពីធនាគារទេ។ លោកស្រីថ្លែងថា៖ «ស្ត្រីមានការលំបាកខ្ចីប្រាក់ពីធនាគារ ធនាគារកង្វះទំនុកចិត្ត ព្រោះពួកគេមិនមានរបាយការណ៍ចំណូលចំណាយជាក់លាក់»។
លោកស្រីបន្តថា៖ «បើប្តីប្រពន្ធខ្ចីមិនមានបញ្ហាទេ បើស្ត្រីម្នាក់ឯងឈរឈ្មោះខ្ចីប្រាក់មានការលំបាកច្រើនជាងបុរស»។
អ្នកស្រី ជា សិរី អគ្គនាយកបច្ចេកទេស ធនាគារជាតិនៃកម្ពុជាថ្លែងក្នុងពិធីសម្ពោធរបាយការណ៍ IFC កាលពីសប្តាហ៍មុនថា បញ្ហាប្រឈមជាចម្បងរបស់សហគ្រាសធុនតូច និងមធ្យមដែលមានម្ចាស់ជាស្ត្រីគឺការរើសអើងយេនឌ័រ។
អ្នកស្រីថ្លែងថា៖ «ហិរញ្ញវត្ថុគឺជាឧបករណ៍សំខាន់មួយក្នុងការដោះស្រាយបញ្ហាសមភាព និងការលើកកម្ពស់យេនឌ័រនៅទូទាំងតំបន់អាស៊ាន និងតំបន់ផ្សេងៗទៀត»។
អ្នកស្រីបានជំរុញឲ្យគ្រឹះស្ថានធនាគារ និងហិរញ្ញវត្ថុទាញយកអត្ថប្រយោជន៍ពីផ្នែកមួយនេះនៃសេដ្ឋកិច្ចតាមរយៈការបង្កើតផលិតផលដែលអាចជួយជំរុញដល់បរិយាប័ន្នហិរញ្ញវត្ថុ និងសម្រេចបានតុល្យភាពយេនឌ័រនៅក្នុងសេដ្ឋកិច្ច។
ទោះបីយ៉ាងណាលោក ទូច ចៅចេក នាយកប្រតិបត្តិធនាគារប្រៃសណីយ៍កម្ពុជាបានប្រាប់ភ្នំពេញប៉ុស្តិ៍ថា សហគ្រិនក្នុងវិស័យ SME ទាំងបុរស និងស្ត្រីមានការពិបាកទទួលបានកម្ចីឥណទានដូចគ្នា។
លោកថ្លែងថា៖ «គោលនយោបាយធនាគារយើងមានកម្ចីសម្រាប់វិស័យ SME មិនផ្តោតតែស្ត្រីទេ»។ លោកបន្ថែមថាដើម្បីលើកកម្ពស់វិស័យ SME ធនាគារ ប្រៃសណីយ៍កម្ពុជាបានផ្តល់ជូនអត្រាការប្រាក់ ៩ ភាគរយក្នុង ១ ឆ្នាំ៕LA