.jpg)
ភ្នំពេញៈ ក្រុមហ៊ុនផ្នែកសេវាកម្មដំណោះស្រាយបច្ចេកវិទ្យាក្នុងស្រុក IG Tech កាលពីថ្ងៃម្សិលមិញបានប្រកាសពីកិច្ចព្រមព្រៀងសហការជាមួយក្រុមហ៊ុន AETINS មានមូលដ្ឋាននៅប្រទេសម៉ាឡេស៊ីដើម្បីសហការផ្គត់ផ្គង់ប្រព័ន្ធស្នូលដល់ប្រតិបត្តិករក្នុងវិស័យធានារ៉ាប់រង។
លោក គឹម ពុធគិរី ប្រធានក្រុមប្រឹក្សាភិបាល និងជាអគ្គនាយកក្រុមហ៊ុន IG Tech បានឲ្យដឹងថា ការសហការនេះនឹងផ្ដល់អត្ថប្រយោជន៍ច្រើនដល់ក្រុមហ៊ុនបច្ចេកវិទ្យាកម្ពុជា ដោយសារវាមិនគ្រាន់តែជាកិច្ចព្រមព្រៀងលក់-ទិញនោះទេ ប៉ុន្តែវាថែមទាំងជាការផ្ទេរចំណេះដឹងពីក្រុមហ៊ុនដៃគូសម្រាប់គំនិតផ្ដួចផ្ដើមរបស់ក្រុមហ៊ុន IG Tech ក្នុងការបង្កើតមជ្ឈមណ្ឌលនវានុវត្តន៍ហៅថា «មជ្ឈមណ្ឌលឧត្តមភាព»។
មជ្ឈមណ្ឌលនេះនឹងប្រមូលផ្ដុំក្រុមហ៊ុនបច្ចេកវិទ្យាកម្ពុជាដើម្បីរៀនសូត្រពីក្រុមអ្នកជំនាញ និងអាចអភិវឌ្ឍសូហ្វវែរផ្ទាល់ខ្លួននៅពេលអនាគត។
លោកថ្លែងថា៖ «ដំបូងយើងរៀនពីការលក់ប្រព័ន្ធដំណោះស្រាយបច្ចេកវិទ្យារបស់គាត់ដើម្បីបានដឹងពីភាពខ្លាំងរបស់ប្រព័ន្ធនោះ និងកែវាឲ្យកាន់តែល្អឡើង»។ លោកបន្តថាបន្ទាប់មកអ្នកមានចំណេះដឹងក្នុងវិស័យ IT កម្ពុជា អាចប្រមូលផ្តុំគ្នាហើយបង្កើតប្រព័ន្ធដំណោះស្រាយបច្ចេកវិទ្យាមួយដែលងាយស្រួល និងអាចឆ្លើយតបទៅនឹងតម្រូវការរបស់ក្រុមហ៊ុនក្នុងស្រុក»។
យោងតាមលោក គឹម ពុធគិរី កិច្ចព្រមព្រៀងកាលពីថ្ងៃម្សិលមិញនឹងអនុញ្ញាតឲ្យក្រុមហ៊ុនលោកចែកចាយដំណោះស្រាយបច្ចេកវិទ្យាពីក្រុមហ៊ុន AETINS ទៅប្រទេសថៃ វៀតណាម ឡាវ និងមីយ៉ាន់ម៉ា។
ខណៈក្រុមហ៊ុន AETINS មានជំនាញខាងការផ្គត់ផ្គង់ដំណោះស្រាយព័ត៌មានវិទ្យា សម្រាប់ឧស្សាហកម្មធានារ៉ាប់រងលោក ពុធ គិរី ឲ្យដឹងថាលោកនឹងចុះហត្ថលេខាលើកិច្ចព្រមព្រៀងភាពជាដៃគូជាមួយក្រុមហ៊ុនដំណោះស្រាយ IT មកពីអាមេរិក អាល្លឺម៉ង់ ឥណ្ឌា និងសិង្ហបុរី ដែលភាគច្រើនជាកម្មវិធីទូទាត់តាមប្រព័ន្ធធនាគារ៕ LA
