ក្រុងវ៉ាស៊ីនតោនៈ ក្រុមហ៊ុន Ikea បានឲ្យដឹងថា ក្រុមហ៊ុននឹងបិទរោងចក្រតែមួយគត់របស់ខ្លួននៅអាមេរិកចុងឆ្នាំនេះ ដែលនឹងកាត់បន្ថយការងារ ៣០០ នាក់ ដោយសារក្រុមហ៊ុននឹងចំណាយឲ្យកាន់តែមានប្រសិទ្ធភាពកាន់តែខ្លាំងដើម្បីផលិតផលិតផលនៅអឺរ៉ុប និងនាំចូលផលិតផលទាំងនោះទៅសហរដ្ឋអាមេរិកវិញ។
ហាងលក់គ្រឿងសង្ហារិមដ៏ធំលើពិភពលោករបស់ប្រទេស ស៊ុយអែត នេះឲ្យដឹងថា ការចំណាយលើវត្ថុធាតុដើមខ្ពស់ខ្លាំងពេកធៀបនឹងរោងចក្រនៅអឺរ៉ុប ដែលមានន័យថា ការចំណាយក្នុងរោងចក្រនៅក្រុង Danville រដ្ឋ Virginia នេះគឺ «កាន់តែខ្ពស់ខ្លាំងឡើងៗ»។
លោក Bert Eades ប្រធានគ្រប់គ្រងទីតាំងផលិតរបស់ក្រុមហ៊ុន Ikea បានឲ្យដឹងនៅក្នុងសេចក្ដីប្រកាសព័ត៌មានមួយកាលពីសប្ដាហ៍មុនថា៖ «យើងបានធ្វើគ្រប់កិច្ចខិតខំប្រឹងប្រែង ដើម្បីកែលម្អ និងថែរក្សាសមត្ថភាពប្រកួតប្រជែងរបស់រោងចក្រនេះ ប៉ុន្តែជាអកុសលលក្ខខណ្ឌចំណាយត្រឹមត្រូវមិនអាចដំណើរការបានដើម្បីបន្តការផលិតនៅទីក្រុង Danville រដ្ឋ VA ក្នុងរយៈពេលវែង»។
រោងចក្រ ដែលបានបើកដំណើរការកាលពីឆ្នាំ ២០០៨ ដើម្បីផលិតធ្នើរឈើ និងផ្នែកស្ដុកទំនិញសម្រាប់ទីផ្សារអាមេរិក និងប្រទេស កាណាដា នេះ នឹងបិទទ្វារនៅខែធ្នូចុងឆ្នាំនេះ។
លោក Eades ថ្លែងថា៖ «យើងនឹងធ្វើអ្វីៗគ្រប់យ៉ាងដែលយើងអាចធ្វើបានក្នុងរយៈពេលប៉ុន្មានខែខាងមុខនេះ ដើម្បីគាំទ្រសហការីរបស់យើងតាមរយៈការផ្លាស់ប្តូរនេះ ខណៈដែលពួកគេស្វែងរកការងារថ្មី និងឱកាសបណ្ដុះបណ្ដាល»។
ក្រុមហ៊ុន Ikea ដែលមានរោងចក្រ ២៤ ក្នុងប្រទេស ៩ ឲ្យដឹងថា ខ្លួននឹងធ្វើការងារជាមួយតំណាងសហជីពកម្មករ និងទីភ្នាក់ងាររបស់អាមេរិក ដើម្បីផ្ដល់ជំនួយដល់ការស្វែងរកការងារថ្មី៕ AFP/LA