.jpg)
កម្មករកំពុងធ្វើការនៅក្នុងរោងចក្រកាត់ដេរសម្លៀកបំពាក់មួយនៅភ្នំពេញកន្លងមក។ ភ្នំពេញ ប៉ុស្តិ៍
ភ្នំពេញៈ អង្គការអន្តរជាតិខាងការងារ (ILO) បានឲ្យដឹងថា ការងារជិត ២៥ លានកន្លែង អាចត្រូវបាត់បង់ទូទាំងពិភពលោកដោយសារជំងឺកូវីដ ១៩។
សេចក្ដីប្រកាសព័ត៌មានរបស់ ILO បានឲ្យដឹងថា ដោយពឹងផ្អែកលើសេណារីយោផ្សេងគ្នាសម្រាប់ផលប៉ះពាល់ដោយសារតែកូវីដ១៩ លើកំណើនផលិតផលក្នុងស្រុកសរុបលើពិភពលោក ILO ប៉ាន់ប្រមាណថា ការចង្អុលបង្ហាញការកើនឡើងអត្រាគ្មានការងារធ្វើលើពិភពលោកមានចំនួនចន្លោះពី ៥,៣ លាន (សេណារីយោទាប) ដល់ ២៤,៧ លាននាក់ (សេណារីយោខ្ពស់) បើធៀបនឹងកម្រិតមូលដ្ឋាន ១៨៨ លាននាក់កាលពីឆ្នាំ ២០១៩។
បើប្រៀបធៀបវិបត្តិហិរញ្ញវត្ថុលើពិភពលោកឆ្នាំ ២០០៨ និងឆ្នាំ ២០០៩ អត្រាគ្មានការងារធ្វើលើពិភពលោកមានចំនួន ២២ លាននាក់។
ILO បានឲ្យដឹងថាការគ្មានការងារធ្វើក៏ត្រូវបានរំពឹងថា នឹងកើនឡើងជាទ្រង់ទ្រាយធំជាផលវិបាកសេដ្ឋកិច្ចដោយសារតែការរីករាលដាលវីរុសនេះប្រែក្លាយជាការកាត់បន្ថយម៉ោងការងារ និងប្រាក់ឈ្នួល។ ស្វ័យការងារនៅតាមបណ្ដាប្រទេសអភិវឌ្ឍន៍ដែលជារឿយៗបម្រើដើម្បីការពារផលប៉ះពាល់ដោយសារតែការផ្លាស់ប្តូរនេះ។
អង្គការនេះបន្តថា ការធ្លាក់ចុះការងារក៏មានន័យថា ជាការបាត់បង់ប្រាក់ចំណូលចំនួនច្រើនសម្រាប់កម្មករផងដែរ។ ការសិក្សាប៉ាន់ប្រមាណថា មានចន្លោះពី ៨៦០ ពាន់លានដុល្លារអាមេរិក ទៅ ៣,៤ ពាន់ពាន់លានដុល្លារអាមេរិកត្រឹមចុងឆ្នាំ ២០២០។ នេះនឹងប្រែក្លាយទៅជាការធ្លាក់ចុះក្នុងការប្រើប្រាស់ទំនិញ និងសេវាជាបន្តប៉ះពាល់ដល់ចក្ខុវិស័យសម្រាប់ពាណិជ្ជកម្ម និងសេដ្ឋកិច្ច។ អង្គការនេះបញ្ជាក់ថា ភាពគ្មានការងារធ្វើត្រូវបានរំពឹងថានឹងកើនឡើងខ្ពស់ផងដែរខណៈ «សម្ពាធលើប្រាក់ចំណូលដែលបណ្ដាលមកពីការធ្លាក់ចុះសកម្មភាពសេដ្ឋកិច្ចនឹងធ្វើឲ្យកម្មករខិតទៅជិត ឬនៅក្រោមបន្ទាត់ភាពក្រីក្រ»។
ទោះយ៉ាងនេះក្តី មន្ដ្រីរដ្ឋាភិបាលកម្ពុជាឲ្យដឹងថា អត្រាគ្មានការងារធ្វើរបស់ប្រទេសនេះបានទទួលរងផលប៉ះពាល់បន្តិចបន្តួច ទោះបីជាវិស័យសំខាន់ ២ គឺកាត់ដេរ និងទេសចរណ៍បានរងផលប៉ះពាល់យ៉ាងខ្លាំងក៏ដោយ។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា រោងចក្រ ៥០ ទូទាំងប្រទេសកាលពីមុនបានផ្អាកប្រតិបត្តិការដោយសារតែកង្វះវត្ថុធាតុដើមដែលបង្កឡើងដោយកូវីដ ១៩ នៅក្នុងប្រទេសចិន ដែលធ្វើឲ្យប៉ះពាល់ដល់កម្មករ ២០ ៩៤០ នាក់ នៅក្នុងវិស័យកាត់ដេររបស់កម្ពុជា។ ប៉ុន្តែរោងចក្រ ១៧ ក្នុងចំណោមរោងចក្រទាំងនោះបានចាប់ផ្ដើមសកម្មភាពឡើងវិញហើយ បន្ទាប់ពីប្រទេស ចិន នៅពេលថ្មីៗនេះបានចាប់ផ្ដើមការផ្គត់ផ្គង់វត្ថុធាតុដើម។
ទិន្នន័យក្រសួងទេសចរណ៍ដែលបានចេញផ្សាយកាលពីខែមុនបានបង្ហាញថា កាលពីឆ្នាំ ២០១៩ ប្រទេស កម្ពុជា រកប្រាក់ចំណូលទេសចរណ៍អន្តរជាតិចំនួន ៤,៩១ លានដុល្លារ កើនឡើង ១២,៤ ភាគរយ ធៀបនឹង ៤,៣៧ លានដុល្លារកាលពីឆ្នាំ ២០១៨។
លោក តុប សុភ័ក អ្នកនាំពាក្យក្រសួងទេសចរណ៍បានប្រាប់ភ្នំពេញប៉ុស្ដិ៍ថា គិតត្រឹមថ្ងៃទី ១៦ ខែមីនា សណ្ឋាគារ ៤១ អាផាតមិន ២ និងភោជនីយដា្ឋនជាច្រើនត្រូវបានបិទទ្វារ និងបានផ្អាកប្រតិបត្តិការនៅខេត្តសៀមរាប ដោយមានការបាត់បង់ការងារជាង ២ ០១៤ នាក់ ដោយសារតែការរីករាលដាលនៃកូវីដ១៩។
លោកថ្លែងថា៖ «យើងប៉ាន់ប្រមាណថា ចំនួនការបាត់បង់ការងារនឹងកើនឡើងក្នុងរយៈពេល ២ សប្ដាហ៍ចុងក្រោយនេះនៃខែនេះ ហើយអាជីវកម្មទេសចរណ៍នឹងបិទទ្វារទាំងស្រុងដោយសារតែការរីករាលដាលកូវីដ ១៩»។
ILO បានប៉ាន់ប្រមាណថា មនុស្សចន្លោះពី ៨,៨ ដល់ ៣៥ លាននាក់បន្ថែមទៀតនឹងគ្មានការងារធ្វើទូទាំងពិភពលោកធៀបនឹងការប៉ាន់ប្រមាណដំបូងសម្រាប់ឆ្នាំ ២០២០ ដែលបានព្យាករការធ្លាក់ចុះ ១៤ លាននាក់ទូទាំងពិភពលោក។
លោក Guy Ryder អគ្គនាយក ILO បានថ្លែងថា៖ «នេះលែងជាវិបត្តិសុខភាពពិភពលោកតែមួយទេ វាក៏ជាវិបត្តិទីផ្សារការងារ និងសេដ្ឋកិច្ចសំខាន់ៗដែលកំពុងមានផលប៉ះពាល់ខ្លាំងដល់ប្រជាជន»។ លោកបន្តថា៖ «កាលពីឆ្នាំ ២០០៨ ពិភពលោកបានបង្ហាញការរួមគ្នាដើម្បីដោះស្រាយផលវិបាកដោយសារតែវិបត្តិហិរញ្ញវត្ថុពិភពលោក និងអ្វីដែលអាក្រក់ខ្លាំងបំផុតត្រូវបានបង្វែរ។ យើងត្រូវការការដឹកនាំប្រភេទនោះ និងដោះស្រាយនៅពេលនេះ»៕ LA
