The Phnom Penh Post Search

Search form




Logo of Phnom Penh Post newspaper Phnom Penh Post - IMF៖ កម្ពុជា​រក្សា​កំណើន​សេដ្ឋកិច្ច​ខ្ពស់

IMF៖ កម្ពុជា​រក្សា​កំណើន​សេដ្ឋកិច្ច​ខ្ពស់

IMF៖ កម្ពុជា​រក្សា​កំណើន​សេដ្ឋកិច្ច​ខ្ពស់

131203_01
លោកស្រី Christine Lagarde នាយកគ្រប់គ្រងមូលនិធិរូបិយវត្ថុអន្តរជាតិ (ឆ្វេង) នៅក្នុងជំនួបជាមួយលោកនាយករដ្ឋមន្ត្រី ហ៊ុន សែន កាលពីថ្ងៃម្សិលមិញ

ភ្នំពេញៈ លោក​ស្រី Christine Lagarde នាយក​គ្រប់​គ្រង​មូលនិធិ​រូបិយវត្ថុ​អន្តរជាតិ (IMF) កាល​ពី​ថ្ងៃ ចន្ទ បាន​សរសើរ កម្ពុជា ចំពោះ​កំណើន​សេដ្ឋកិច្ច​ខ្ពស់ ហើយ​លោក​ស្រី​បាន​សន្យា​បន្ត​គាំទ្រ​ការ​កែទម្រង់​ហិរញ្ញវត្ថុ។

លោក អ៊ាង សុផល្លែត អ្នក​នាំ​ពាក្យ​ផ្ទាល់​លោក​នាយក​រដ្ឋ​មន្ដ្រី ហ៊ុន សែន ប្រាប់​អ្នក​សារព័ត៌មាន​ថា លោក​ស្រី Lagarde បាន​ថ្លែង​បែប​នេះ​ក្នុង​ជំនួប​រយៈ​ពេល​មួយ​ម៉ោង​ជាមួយ​លោក​នាយក​រដ្ឋ​មន្រ្ដី ហ៊ុន សែន កាល​ពី​ថ្ងៃ​ចន្ទ​នៅ​រាជធានី​ភ្នំពេញ។

លោក អ៊ាង សុផល្លែត បាន​ដក​ស្រង់​សម្ដី.លោក​ស្រី Lagarde ថា៖ «កម្ពុជា​បាន​រក្សា​កំណើន​សេដ្ឋកិច្ច​រឹងមាំ ហើយ IMF បាន​ព្យាករ​ថា សេដ្ឋកិច្ច​របស់​កម្ពុជា​គឺ​រឹងមាំ​ជាមួយ​នឹង​កំណើន​ប្រចាំ​ឆ្នាំ​ជាង ៧ ភាគរយ​នៅ​ក្នុង​រយៈ​ពេល​មធ្យម»។ លោក​ស្រី​បន្ត​ថា កម្ពុជា​បាន​ក្លាយ​ជា​កន្លែង​ទាក់​ទាញ​សម្រាប់​វិនិយោគិន​ដោយ​សារ​តែ​ការ​កែទម្រង់​របស់​ខ្លួន​ដែល​បាន​ជំរុញ​ឲ្យ​ប្រទេស​នេះ​បន្ត​កែទម្រង់​ហិរញ្ញវត្ថុ។ លោក​ស្រី​លើក​ឡើង​ថា IMF មាន​សេចក្ដី​រីករាយ​ក្នុង​ការ​បន្ត​គាំទ្រ​ដល់​កម្ពុជា​នៅ​ក្នុង​ការងារ​នេះ។

លោក ហ៊ុន សែន បាន​ថ្លែង​អំណរគុណ​ដល់ IMF សម្រាប់​ជំនួយ​បច្ចេកទេស​ដល់​កម្ពុជា​ក្នុង​ការ​កែទម្រង់​ហិរញ្ញវត្ថុ និង​ប្រព័ន្ធ​ពន្ធ​គយ និង​រដ្ឋាករ។ លោក​នាយក​រដ្ឋ​មន្រ្ដី​បាន​ថ្លែង​ថា៖ «ភាព​ជា​ដៃ​គូ​រវាង​កម្ពុជា និង IMF មាន​សារៈ​សំខាន់​ណាស់​សម្រាប់​កម្ពុជា​ក្នុង​ការ​ធានា​ស្ថិរភាព​ហិរញ្ញវត្ថុ ស្ថិរភាព​ម៉ាក្រូ​សេដ្ឋកិច្ច និង​កំណើន​សេដ្ឋកិច្ច»។

យោង​តាម​សេចក្តី​ប្រកាស​ព័ត៌មាន​របស់ IMF នេះ​ជា​ដំណើរ​ទស្សនកិច្ច​លើក​ដំបូង​របស់​លោក​ស្រី​មក​កាន់​ប្រទេស​កម្ពុជា។

លោក​ស្រី Lagarde បាន​មក​បំពេញ​ទស្សនកិច្ច​នៅ​កម្ពុជា​រយៈ​ពេល​ពីរ​ថ្ងៃ​ពី​ថ្ងៃ ទី២ ដល់​ថ្ងៃ ទី៣ ធ្នូ។ លោ​កស្រី​នឹង​ចូល​គាល់​ព្រះ​មហាក្សត្រ​នរោត្តម សីហមុនី និង​ចូល​ជួប​ពិភាក្សា​ជាមួយ​រដ្ឋ​មន្ដ្រី​ក្រសួង សេដ្ឋកិច្ច និង ហិរញ្ញវត្ថុ។ លោក​ស្រី​បាន​កំណត់​ពេល​វេលា​ជួប​ជាមួយ​តំណាង​ក្រុមហ៊ុន​ផ្ដល់​យោបល់ មេ​ដឹក​នាំ​ស្រ្ដី ពាណិជ្ជករ និង​តំណាង​អង្គការ​សង្គម​ស៊ីវិល​ផង​ដែរ។ លោក​ស្រី​ក៏​នឹង​ផ្ដល់​បាឋកថា ស្ដីពី​ចក្ខុវិស័យ​នៃ​ការ​អភិវឌ្ឍ​សេដ្ឋកិច្ច​របស់​កម្ពុជា​នៅ​ពេល​អនាគត​ដល់​និស្សិត​ប្រហែល ៣០០ នាក់​នៅ​សាលា​ភូមិន្ទ​រដ្ឋបាល​ផង​ដែរ។

លោក​ស្រី Lagarde នឹង​បន្ត​ដំណើរ​ទៅ​កាន់​ប្រទេស កូរ៉េ​ខាង​ត្បូង និង មីយ៉ាន់ម៉ា៕ PB

អត្ថបទគួរចាប់អារម្មណ៍