The Phnom Penh Post Search

Search form




Logo of Phnom Penh Post newspaper Phnom Penh Post - IMF កោត​សរសើរ​ពី​ការ​អភិវឌ្ឍ​វិស័យ​ហិរញ្ញវត្ថុ​នៅ​កម្ពុជា

IMF កោត​សរសើរ​ពី​ការ​អភិវឌ្ឍ​វិស័យ​ហិរញ្ញវត្ថុ​នៅ​កម្ពុជា

Content image - Phnom Penh Post
លោក​ស្រី Christine Lagarde ប្រធាន​មូលនិធិ​រូបិយវត្ថុ​អន្តរជាតិ ​(IMF)។ AFP

IMF កោត​សរសើរ​ពី​ការ​អភិវឌ្ឍ​វិស័យ​ហិរញ្ញវត្ថុ​នៅ​កម្ពុជា

ភ្នំពេញៈ ប្រធាន​មូលនិធិ​រូបិយវត្ថុ​អន្តរជាតិ ​(IMF) កាល​​​ពី​ថ្មីៗ​នេះ​​ចាត់​ទុក​ការ​ធ្វើ​​បរិយាប័ន្ន​ហិរញ្ញវត្ថុ​​របស់​កម្ពុជា​ថា​មាន​ការ​វិវត្ត​ល្អ​ ដោយ​​​បញ្ជាក់​​ថា​ បទ​ពិ​សោធន​នេះ​អាច​ជា​ករណី​សិក្សា​មួយ​សម្រាប់​ប្រទេស​​ផ្សេងៗ​​ទៀត​នៅ​ក្នុង​តំបន់​អាស៊ី និង​ប៉ាស៊ីហ្វិក។ ​

បរិយាប័ន្ន​ហិរញ្ញវត្ថុ​គឺ​​សំដៅ​ដល់​លទ្ធភាព​ដែល​​​​សេវា​ហិរញ្ញវត្ថុ​​អាច​ត្រូវ​បាន​ប្រើប្រាស់​សម្រាប់​អ្នក​រាល់​​​​គ្នា។

ថ្លែង​​នៅ​ក្នុង​ពិធី​បើក​វេទិកា​ ខ្សែ​ក្រវាត់ និងផ្លូវ រ​បស់​ចិន​​នៅ​ទីក្រុង​ប៉េកាំង កាល​ពី​ថ្ងៃ​សុក្រ​ ដែល​​មាន​ថ្នាក់​ដឹកនាំ​ប្រទេស​​ ៤០ ចូល​រួម​​ លោក​ស្រី Christine Lagarde បាន​លើក​ឡើង​​ថា ​​ប្រទេស ​កម្ពុជា ​​គឺ​ជា​ឧទាហរណ៍​​ល្អ​មួយ​​​​នៃ​ការ​ជំរុញ​បរិយាប័ន្ន​ហិរញ្ញវត្ថុ ដោយ​មាន​ការ​ផ្តល់​សេវា​ហិរញ្ញវត្ថុ​ដោយ​ប្រើ​បច្ចេកវិទ្យា​ដែល​ធ្វើ​ឲ្យ​សេវា​ហិរញ្ញវត្ថុ​បាន​ទៅ​ដល់​ដៃ​ប្រជាជន​ច្រើន​ជាង​មុន។​

លោក​ស្រី​ថ្លែង​ថា​៖ ​«​មនុស្ស​ជា​ច្រើន​​​ក្នុង​ចំណោម​ពលរដ្ឋ​ទាំង​នេះ ​មិន​ដែល​មាន​គណនី​ធនាគារ​ទេ។ នៅ​ពេល​នេះ​ពួក​គេ​​​អាច​សន្សំ​ប្រាក់​សម្រាប់​អនាគត​​និង​​ថែម​ទាំង​អាច​​ចាប់​ផ្ដើម​អាជីវកម្ម​ផ្ទាល់​ខ្លួន​របស់​ពួក​គេ​ទៀត​ផង​»។ លោក​ស្រី​​បន្ត​ថា​៖ «​គំនិត​ទាំង​នេះ​អាច​អនុវត្ត​គ្រប់​ទីកន្លែង​បាន។ ប៉ុន្តែ​​ប្រទេស​ជា​ច្រើន​ត្រូវ​តែ​មាន​បំណង​ធ្វើ​ជា​​ដៃគូ និង​រៀន​សូត្រ​ពី​គ្នា​ទៅ​វិញ​ទៅ​មក​»។​

លោក​ស្រី​ថ្លែង​ថា​ ការ​គំា​ទ្រ និង​កិច្ច​សហការ​ពី​ធនាគារ​កណ្តាល​ ​ក្នុង​ការ​ផ្តល់​អាជ្ញាប័ណ្ណ​​ដល់​សេវា​​​ហិរញ្ញវត្ថុ​ចល័ត​​ បាន​​ធ្វើ​ឲ្យ​ចំនួន​គ្រឹះស្ថាន​មីក្រូ​ហិរញ្ញវត្ថុ​កើន​ឡើង​បី​ដង​គិត​ចាប់​​ឆ្នាំ ២០១១​ មក។ គ្រឹះស្ថាន​​ទាំង​នេះ​ បាន​ផ្តល់​កម្ចី​ដល់​​អ្នក​ទទួល​កម្ចី​ថ្មី ២ ​លាន​នាក់​ ដែល​តំណាង​ដល់ ​២០ ភាគរយ​​ នៃ​ប្រជាជន​ពេញ​វ័យ​សរុប​។

កម្ពុជា​តែងតែ​បាន​ទទួល​ចំណាត់​​ថ្នាក់​ល្អ​ខាង​ផ្នែក​ «ការ​ទទួល​បាន​ឥណទាន​» នៅ​ក្នុង​របាយ​ការណ៍​ស្តីពី​ ភាព​ងាយ​ស្រួល​ក្នុង​ការ​ធ្វើ​ពាណិជ្ជកម្ម​​របស់​ធនាគារ​ពិភព​លោក​​។ របាយការណ៍ ​តែង​សិក្សា​ប្រភេទ ចំណាត់​ថ្នាក់ ​១០ ​ប្រភេទ ​ដើម្បី​វាស់វែង​ពី​ភាព​ងាយ​ស្រួល​​ក្នុង​​ការ​ធ្វើ​អាជីវកម្ម​ ​ដែល​​រួមមាន​​ ​ការ​ចាប់​ផ្ដើម​អាជីវកម្ម​ ការ​ទទួល​​បាន​អគ្គិសនី​ ការ​ទទួល​បាន​ឥណទាន​ ពាណិជ្ជកម្ម​ឆ្លង​កាត់​ព្រំដែន​ និង​ផ្នែក​​ផ្សេង​ទៀត។​

ក្នុង​របាយ​ការណ៍​ឆ្នាំ ​២០១​៩​ ​​កម្ពុជា​ជាប់​ចំណាត់​ថ្នាក់ ​២២ ​នៅ​ក្នុង​​ប្រភេទ «​ការ​ទទួល​បាន​​ឥណទាន» ខណៈ​ផ្នែក​ផ្សេងៗ​ទៀត​ ក្រៅ​ពី​នេះ​ត្រូវ​បាន​​ចាត់​ថ្នាក់​លេខ​រៀង​ក្រោយ​ ១០០ ឬ​ជិត​​ដល់​បាត​តារាង។ ​

លោក ​គា ​បូរាណ ​ប្រធាន​សមាគម​គ្រឹះស្ថាន​មីក្រូ​ហិរញ្ញវត្ថុ​​​កម្ពុជា បាន​ឲ្យ​ដឹង​កាល​ពី​ម្សិលមិញ​ថា ​វិស័យ​មីក្រូ​ហិរញ្ញវត្ថុ (MFI) កម្ពុជា​បាន​អភិវឌ្ឍ​យ៉ាង​​រហ័ស​ក្នុង​រយៈពេល​ជាង ​២០ ​ឆ្នាំ​មក​នេះ​ ដោយសារ​​បណ្ដាញ​ប្រតិបត្តិ​ការ​ដ៏​ធំ​​​ដែល​អនុញ្ញាត​ឲ្យ​មាន​ការ​ផ្តល់​​​​ផលិតផល​​ថ្មីៗ និង​សេវាកម្ម​ថ្មី ដល់​​ប្រជាជន​ជនបទ ដែល​កាល​ពី​មុន​មិនមាន​ឱកាស​ប្រើប្រាស់​សេវា​ធនាគារ​​។​​

លោក​បន្ថែម​ថា​ គោល​នយោបាយ​ដ៏​សកម្ម​របស់​ធនាគារ​ជាតិ​​នៃ​កម្ពុជា (NBC)​ និង​ការ​អនុញ្ញាត​​ឲ្យ​គ្រឹះស្ថាន MFI ៧ អាច​​ទទួល​ប្រាក់​បញ្ញើ​សន្សំ​បាន​​ពី​អតិថិជន​ បាន​ធ្វើ​ឲ្យ​ប្រជាជន​ដែល​កាល​ពី​មុន​មាន​ឱកាស​​ប្រើប្រាស់​​សេវា​ធនាគារ​ អាច​​ធ្វើ​ការ​សន្សំ​តាម​ប្រព័ន្ធ​​ផ្លូវ​ការ​ សម្រាប់​អត្ថ​ប្រយោជន៍​​នៅ​ពេល​អនាគត​របស់​ពួក​គេ​។ លោក​បន្ត​ថា NBC ក៏​បាន​សម្រួល​ឲ្យ​មាន​​សេវា​ផ្សេងៗ​ទៀត​​ដូចជា​ការ​ទូទាត់​​ និង​ធនាគារ​ចល័ត ដែល​កំពុង​ផ្ដល់​អត្ថប្រយោជន៍​ដល់​អតិថិជន​។​

លោក​ថ្លែង​ថា​៖ «​សម្រាប់​ស្ថិរភាព​​​​រយៈពេល​វែង ​យើង​នឹង​ផ្ដោត​លើ​ការ​ពង្រឹង​​ចំណេះ​ដឹង​ហិរញ្ញវត្ថុ​ច្រើន​ជាង​មុន​ ក្នុង​ពេល​ជាមួយ​គ្នា​ដែល​យើង​ផ្ដោត​​លើ​ការ​ជំរុញ​​បរិយាប័ន្ន​​ហិរញ្ញវត្ថុ ព្រោះ​ថា​ប្រសិន​បើ​ប្រជាជន​មាន​ចំណេះ​កាន់​តែ​ប្រសើរ​អំពី​​ការ​ប្រើប្រាស់​ហិរញ្ញវត្ថុ វា​កាត់​បន្ថយ​ហានិភ័យ​ទាក់ទង​នឹង​​ការ​ប្រើប្រាស់​​ប្រាក់​មិន​ត្រឹមត្រូវ​ និង​កាត់​បន្ថយ​ហានិភ័យ​វិស័យ​ហិរញ្ញវត្ថុ​»។​

លោក ​Stephen Higgins ​​ដៃគូ​គ្រប់គ្រង​​ក្រុមហ៊ុន Mekong Strategic Partners ​បាន​ឲ្យ​ដឹង​កាល​ពី​ម្សិលមិញ​ថា មាន​ការ​រីក​ចម្រើន​គួរ​ឲ្យ​កត់​សម្គាល់​ នៃ​បរិយាប័ន្ន​ហិរញ្ញវត្ថុ​ នៅ​​ក្នុង​ប្រទេស ​កម្ពុជា ​​ក្នុង​រយៈពេល​​មួយ​ទសវត្សរ៍​​កន្លង​មក​នេះ​​​​បាន​ផ្តល់​ប្រយោជន៍​ដល់​ប្រជាជន​កម្ពុជា​។ យ៉ាង​ណា​ក៏​ដោយ លោក​បាន​ក្រើន​រំឭក​ពី​បញ្ហា​ប្រឈម​នៃ​​​កំណើន​ឥណទាន​ដល់​ប្រជាជន​ក្រីក្រ។ ​

លោក​ថ្លែង​ថា​៖ «​សមត្ថភាព​​ក្នុង​ការ​ទទួល​បាន​ប្រព័ន្ធ​ហិរញ្ញ​វត្ថុ​ ទាក់ទង​នឹង​សមត្ថភាព​​ក្នុង​ការ​​សន្សំ​ប្រាក់​ និង​ការ​ផ្ទេរ​ប្រាក់​​ក្នុង​តម្លៃ​ទាប​ បាន​ធ្វើ​ឲ្យ​មាន​​ផល​​​វិជ្ជមាន​ដ៏​សំខាន់​សម្រាប់​​​​​កម្ពុជា​»។

លោក​​​បន្ត​ថា​៖ «​ខ្ញុំ​មិន​​សូវ​មាន​ការ​​​ជឿជាក់​ទេ​ថា កម្រិត​បំណុល​​ដែល​ត្រូវ​បាន​យក​ដោយ​ប្រជាជន​​​ក្រីក្រ​ជា​រឿង​ល្អ​នោះ​ទេ​ អ៊ីចឹង ការ​ជំរុញ​ និង​បង្កើន​ការ​​​​ផ្គត់ផ្គង់​ទៅ​តម្រូវ​ការ​​នៃ​ផ្នែក​នេះ​គួរ​ត្រូវ​ការ​ត្រួត​​ពិនិត្យ​»៕​LA​

អត្ថបទគួរចាប់អារម្មណ៍