ក្រុងវ៉ាស៊ីនតោនៈ មូលនិធិរូបិយវត្ថុអន្តរជាតិ (IMF) បានឲ្យដឹងកាលពីថ្ងៃសៅរ៍ថា ខ្លួនបានឈានដល់កិច្ចព្រមព្រៀងជាគោលការណ៍មួយជាមួយប្រទេសអ៊ុយក្រែនស្តីពីទឹកប្រាក់ថ្មី ៥,៥ ពាន់លានដុល្លារ នៃកម្មវិធីជំនួយរយៈពេល ៣ ឆ្នាំ សម្រាប់ប្រទេសដែលហែកហួរដោយសង្គ្រាមមួយនេះ។
អ្នកស្រី Kristalina Georgieva អគ្គនាយកមូលនិធិ IMF បានស្វាគមន៍កិច្ចព្រមព្រៀងនេះដោយអ្នកស្រីបានបន្ថែមថា កិច្ចព្រមព្រៀងនេះគឺជាកម្មវត្ថុចំពោះការទទួលបានការអនុម័តពីថ្នាក់គ្រប់គ្រងរបស់មូលនិធិ IMF។
អ្នកស្រី Georgieva ថ្លែងថានៅថ្ងៃសៅរ៍អ្នកស្រីបាននិយាយទូរស័ព្ទទៅកាន់លោកប្រធានាធិបតី Volodymyr Zelensky និងបានសរសើរគាត់អំពី «វឌ្ឍនភាពដ៏ល្អ» ចំពោះកំណែទម្រង់ និង «គោលនយោបាយសេដ្ឋកិច្ចដ៏រឹងមាំ»។
អ្នកស្រីបានថ្លែងថា៖ «លោកប្រធានាធិបតី និងខ្ញុំបានព្រមព្រៀងថា ភាពជោគជ័យនៃសេដ្ឋកិច្ចរបស់ប្រទេសអ៊ុយក្រែនអាស្រ័យយ៉ាងសំខាន់លើការពង្រឹងនីតិរដ្ឋ ការពង្រឹងសុចរិតភាពតុលាការ និងការកាត់បន្ថយតួនាទីអត្ថប្រយោជន៍ដែលត្រូវបានធានា»។
អ្នកស្រីបានបន្ថែមថា វា «មានសារៈសំខាន់ខ្លាំងដើម្បីការពារផលចំណេញដែលកើតចេញពីការបោសសម្អាតប្រព័ន្ធធនាគារ និងស្តារការចំណាយធំៗចំពោះអ្នកជាប់ពន្ធពីដំណោះស្រាយធនាគារ»។
មូលនិធិ IMF និងម្ចាស់ជំនួយអន្តរជាតិផ្សេងទៀតបានដាក់សម្ពាធម្តងហើយម្តងទៀតដល់ទីក្រុងកៀវ ដើម្បីទាក់ទាញការវិនិយោគដែលត្រូវការជាចំបាច់តាមរយៈការដោះស្រាយអំពើពុករលួយដែលរីករាលដាល និងកាត់បន្ថយអំណាចរបស់មនុស្សមួយក្តាប់តូច។ ប៉ុន្តែមន្ត្រីធនាគារ និងក្រុមអ្នកវិភាគឲ្យដឹងថា ពួកគេភ័យខ្លាចថា អាជ្ញាធរបច្ចុប្បន្នកំពុងផ្តោតទិសដៅលើអតីតមន្ត្រីធនាគារដែលបានជួយបោសសម្អាតទីផ្សារជំនួសឲ្យម្ចាស់ធនាគារដែលក្ស័យធន៕ KC