.jpg)
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងជំនួបជាមួយលោក Yasuhisa Ojima ប្រធានតំណាងស្ថាប័ន IMF ប្រចាំនៅកម្ពុជា កាលពីថ្ងៃចន្ទ។ រូបថត ក្រសួងសេដ្ឋកិច្ច
ភ្នំពេញ: មូលនិធិរូបិយវត្ថុអន្តរជាតិហៅកាត់ថា IMF ប្តេជ្ញាបន្តជួយស្តារសេដ្ឋកិច្ចកម្ពុជាក្រោយវិបត្តិជំងឺកូវីដ ១៩ ដើម្បីជំរុញកំណើន និងការអភិវឌ្ឍរបស់ប្រទេសកម្ពុជា។
ក្នុងជំនួបជាមួយលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកាលពីថ្ងៃចន្ទលោក Yasuhisa Ojima ប្រធានតំណាងស្ថាប័ន IMF ប្រចាំនៅកម្ពុជាថ្លែងថា លោកទទួលស្គាល់នូវប្រសិទ្ធភាពរបស់កម្ពុជាក្នុងការប្រយុទ្ធប្រឆាំង និងគ្រប់គ្រងបានល្អប្រសើរនូវការរីករាលដាលនៃជំងឺកូវីដ១៩ នៅកម្ពុជា ជាពិសេសប្រសិទ្ធភាពនៃការអនុវត្តនូវវិធានការមុតស្រួចថ្មីៗនានាក្រោមក្របខ័ណ្ឌយុទ្ធសាស្ត្រសេដ្ឋកិច្ចឡើងវិញក្រោយវិបត្តិជំងឺកូវីដ១៩ និងកម្មវិធីគាំពារសង្គមជាដើម។
លោកថ្លែងយ៉ាងដូច្នេះថា៖ «យើងខ្ញុំគាំទ្រស្មារតីប្រុងប្រយ័ត្នខ្ពស់របស់រាជរដ្ឋាភិបាលតាមរយៈការបន្តតាមដានការប្រែប្រួលស្ថានការណ៍ម៉ាក្រូសេដ្ឋកិច្ច និងបានលើកទឹកចិត្តឱ្យបន្តកិច្ចសហការជាមួយធនាគារជាតិនៃកម្ពុជាក្នុងការឃ្លាំមើលការប្រែប្រួលនៃស្ថានភាពសេដ្ឋកិច្ច ទាំងកម្រិតសកល និងតំបន់»។
លោកបានថ្លែងអះអាងថា៖ «មូលនិធិរូបិយវត្ថុអន្តរជាតិនឹងបន្តជួយគាំទ្រកម្ពុជាតាមរយៈការបន្តកិច្ចសហប្រតិបត្តិការជាប្រពៃណីកន្លងមកក្នុងនោះរួមមាន មូលនិធិហិរញ្ញប្បទានរហ័ស (Rapid Financing Facility) ដែលអាចជាជម្រើសមួយបន្ថែមសម្រាប់កម្ពុជាក្នុងការបំពេញកង្វះខាតហិរញ្ញប្បទានសម្រាប់ផែនការស្តារសេដ្ឋកិច្ចក្រោយវិបត្តិជំងឺកូវីដ ១៩»។
លោក អូន ព័ន្ធមុនីរ័ត្ន បានថ្លែងថា មូលនិធិរូបិយវត្ថុអន្តរជាតិតែងតែជួយកម្ពុជា ជាពិសេសក្នុងពេលនៃការរីករាលដាលនៃជំងឺកូវីដ ១៩។
លោកថា IMF មានតួនាទីសំខាន់ក្នុងការតាមដាន និងវាយតម្លៃការវិវឌ្ឍសេដ្ឋកិច្ចសកល តំបន់ និងកម្ពុជា និងផ្តល់ការសិក្សាផ្សេងៗដែលអាចជាធាតុចូលសម្រាប់កម្ពុជាក្នុងការបន្តរៀបចំវិធានការពាក់ព័ន្ធក្នុងការធានាស្ថិរភាពម៉ាក្រូសេដ្ឋកិច្ច និងហិរញ្ញវត្ថុកម្ពុជា និងការរៀបចំនូវវិធានការគោលនយោបាយ សម្រាប់ស្តារ និងជំរុញកំណើនសេដ្ឋកិច្ចកម្ពុជា។
លោកថា៖ «ទោះបីជាកម្ពុជាត្រូវបានវាយតម្លៃ និងទទួលស្គាល់ថាជាប្រទេស ១ ក្នុងចំណោមប្រទេសដែលគ្រប់គ្រងស្ថានភាពជំងឺកូវីដ ១៩ បានល្អប្រសើរក្ដី ក៏រាជរដ្ឋាភិបាលកម្ពុជានៅបន្តតាមដានការវិវឌ្ឍនៃជំងឺនេះដោយយកចិត្តទុកដាក់ខ្ពស់ និងពុំមើលស្រាលស្ថានការណ៍ដោយបន្តអនុវត្តនូវវិធានការសុខាភិបាល រួមជាមួយការចាត់វិធានការមុតស្រួចក្នុងការគាំទ្រលំនឹងសេដ្ឋកិច្ច និងជីវភាពប្រជាជន»។
លោកបានបន្តទៀតថា៖ «ឈរលើមូលដ្ឋាននេះ សកម្មភាពសេដ្ឋកិច្ចកម្ពុជាអាចបន្តមានប្រក្រតីភាពល្អ ខណ:ស្ថានភាពសារពើពន្ធ ជាពិសេសផ្នែកចំណូលពន្ធនឹងមានភាពប្រសើរជាងការរំពឹងទុក ដែលនេះជាបច្ច័យល្អសម្រាប់ការអនុវត្តថវិកាឆ្នាំ ២០២១ ដោយអនុញ្ញាតឱ្យមានលម្ហថវិកាធំ និងការប្រើប្រាស់ប្រាក់សន្សំរបស់រាជរដ្ឋាភិបាលតិចជាងការរំពឹងទុក។ ប៉ុន្តែថ្មីៗនេះ ផលប៉ះពាល់ពីជំនន់ទឹកភ្លៀងបាននិងកំពុងដាក់សម្ពាធមួយផ្នែកវិញដល់បន្ទុកចំណាយរដ្ឋ ពិសេសការស្តារឡើងវិញនូវហេដ្ឋារចនាសម្ព័ន្ធដឹកជញ្ជូន និងធារាសាស្ត្រ។
បើយោងតាមលោក អូន ព័ន្ធមុនីរ័ត្ន រដ្ឋាភិបាលកម្ពុជាបាននិងកំពុងរៀបចំផែនការស្តារសេដ្ឋកិច្ចក្រោយវិបតិ្តជំងឺកូវីដ១៩ (Post Covid-19 Recovery Plan) ដែលជាការគិតគូរសម្រាប់រយ:ពេលមធ្យមក្នុងការជំរុញកំណើនសេដ្ឋកិច្ចឱ្យត្រឡប់ទៅរកសក្តានុពលវិញឱ្យបានលឿន។
IMF បានព្យាករកាលពីថ្ងៃទី ១៣ ខែតុលា ថា សេដ្ឋកិច្ចរបស់ប្រទេសកម្ពុជាត្រូវបានព្យាករថា នឹងធ្លាក់ចុះមកនៅត្រឹមដក ២,៨ ភាគរយនៅឆ្នាំនេះ ហើយនឹងស្ទុះងើបឡើងវិញយ៉ាងរហ័សដល់ ៦,៨ ភាគរយ ក្នុងឆ្នាំ ២០២១។
គួរបញ្ជាក់ថា រហូតមកដល់ពេលនេះ រដ្ឋាភិបាលកម្ពុជាបានដាក់ឱ្យដំណើរការវិធានការជុំទី ៦ ដើម្បីជំរុញកំណើន សេដ្ឋកិច្ច និងត្រៀមរៀបចំសម្រាប់ការងើបឡើងវិញក្រោយវិបត្តិជំងឺកូវីដ ១៩។ វិធានការទាំងនេះនឹងធានាថា គ្រួសារក្រីក្រ និងងាយទទួលរងគ្រោះនឹងបន្តទទួលបានជំនួយក្នុងអំឡុងពេលវេលាដ៏ពិបាកនេះ។
បើយោងតាមសេចក្ដីប្រកាសនៃវិធានការជុំទី ៦ បានឱ្យដឹងថា៖ «រដ្ឋាភិបាលនឹងបន្តក្នុងការតាមដានយ៉ាងទៀងទាត់នូវស្ថានការណ៍ជំងឺកូវីដ ១៩ ស្ថានការណ៍សេដ្ឋកិច្ច និងហិរញ្ញវត្ថុនៅក្នុងក្របខ័ណ្ឌតំបន់ និងពិភពលោក។ ដោយសង្ឃឹមថា រដ្ឋាភិបាលនឹងត្រួតពិនិត្យ និងវាយតម្លៃផលប៉ះពាល់ដោយសារតែជំងឺកូវីដ ១៩ លើវិស័យសំខាន់ៗនៃសេដ្ឋកិច្ចរបស់កម្ពុជា ដើម្បីធ្វើបច្ចុប្បន្នភាពវិធានការចាំបាច់។ រដ្ឋាភិបាលក៏ត្រៀមរៀបចំដាក់ចេញនូវវិធានការថ្មីៗបន្ថែមទៀតនៅក្នុងក្របខ័ណ្ឌយុទ្ធសាស្ដ្រសេដ្ឋកិច្ច បន្ទាប់ពីវិបត្តិជំងឺកូវីដ ១៩ ផងដែរ»៕
