ក្រុងវ៉ាស៊ីនតោនៈ ក្រុមរដ្ឋមន្ត្រីក្រសួងហិរញ្ញវត្ថុពិភពលោកកាលពីថ្ងៃសុក្រចុងសប្តាហ៍មុនបានព្រមព្រៀងបង្កើនទ្វេដងនូវកញ្ចប់ទឹកប្រាក់សំខាន់មួយដែលមូលនិធិរូបិយវត្ថុអន្តរជាតិ (IMF) អាចប្រើប្រាស់ដើម្បីផ្តល់ជំនួយដល់ប្រទេសដែលជួបប្រទះវិបត្តិ ប៉ុន្តែជាថ្មីម្តងទៀត ក្រុមមន្ត្រីទាំងនេះបានពន្យារពេលផ្តល់សិទ្ធិបោះឆ្នោតបន្ថែមទៀតដល់ប្រទេសដែលមានសេដ្ឋកិច្ចកំពុងស្ទុះងើបខ្លាំងធំៗ។
មូលនិធិ IMF បាននិងកំពុងធ្វើការងារដើម្បីរៀបចំរចនាសម្ព័ន្ធឡើងវិញនូវចំណែកសិទ្ធិបោះឆ្នោតរបស់ខ្លួន ដើម្បីផ្តល់ទម្ងន់បន្ថែមទៀតដល់ប្រទេសដែលមានសេដ្ឋកិច្ចកំពុងស្ទុះងើបខ្លាំងនានាដូចជាប្រទេសចិន ឥណ្ឌា និងប្រេស៊ីល ប៉ុន្តែប្រទេសមហាអំណាចចាស់ៗមួយចំនួនបានជំទាស់ ដោយសារពួកគេប្រកាន់ជំហរថាខ្លាចបាត់បង់ឥទ្ធិពលក្នុងស្ថាប័នហិរញ្ញវត្ថុមួយនេះ។
យោងតាមសេចក្តីថ្លែងការណ៍មួយកាលពីថ្ងៃសុក្រ បើទោះជាមានការប្តេជ្ញាចិត្តកាលពីពេលមុនថានឹងបញ្ចប់ការបែងចែកសិទ្ធិបោះឆ្នោតថ្មីនៅពេលនេះក្តី ក៏សមាជិករបស់មូលនិធិ IMF នៅឯកិច្ចប្រជុំប្រចាំឆ្នាំកាលពីចុងសប្តាហ៍មុនបានពន្យារពេលករណីនេះជាថ្មីម្តងទៀត ហើយជំនួសមកវិញប្តេជ្ញាថានឹងពិនិត្យមើលបញ្ហានេះជាថ្មីយ៉ាងយូរបំផុតនៅខែធ្នូ ឆ្នាំ ២០២៣។
សេចក្តីថ្លែងការណ៍ដដែលនេះបានឲ្យដឹងថា ទោះជាយ៉ាងណាការបែងចែកជាថ្មីនូវសិទ្ធិបោះឆ្នោត «នឹងត្រូវបានរំពឹងថានឹងបង្កឲ្យមានការកើនឡើងចំណែកកូតារបស់ប្រទេសដែលមានសេដ្ឋកិច្ចកំពុងស្ទុះងើបខ្លាំងស្របតាមតួនាទីប្រៀបធៀររបស់ពួកគេនៅក្នុងសេដ្ឋកិច្ចពិភពលោក»។
មូលនិធិដែលមានមូលដ្ឋាននៅទីក្រុងវ៉ាស៊ីនតោននេះដែលត្រូវបានបង្កើតឡើងបន្ទាប់ពីសង្គ្រាមពិភពលោកលើកទី ២ ជាធម្មតាត្រូវបានគ្រប់គ្រងដោយសហរដ្ឋអាមេរិក និងប្រទេសអឺរ៉ុបភាគខាងលិច។
ប្រទេសដែលមានសេដ្ឋកិច្ចកំពុងអភិវឌ្ឍន៍ធំៗដែលមានចំណែកកាន់តែរីកធំឡើងនៃផលិតផលក្នុងស្រុកសរុបរបស់ពិភពលោកព្រមានថា បើគ្មានការផ្លាស់ប្តូររចនាសម្ព័ន្ធអំណាចទេ មូលនិធិ IMF ប្រឈមនឹងការបាត់បង់ភាពស្របច្បាប់ និងលទ្ធភាពជះឥទ្ធិពលដល់គោលនយោបាយសេដ្ឋកិច្ចនានា។
ស្របពេលជាមួយគ្នានេះដែរគណៈគ្រប់គ្រងរបស់មូលនិធិ IMF បានយល់ព្រមចំពោះផែនការមួយដើម្បីបង្កើនធនធានរបស់ខ្លួនទ្វេដងដល់ ៥០០ ពាន់លានដុល្លារនៃមូលនិធិបណ្តោះអាសន្នមួយដែលផ្តល់ដោយប្រទេសចំនួន ៤០ ក្នុងចំណោមសមាជិកចំនួន ១៨៩ ប្រទេស។ នេះបើយោងតាមសេក្តីថ្លែងការណ៍នេះ។
មូលនិធិ IMF ទទួលបានភាគច្រើននៃធនធានរបស់ខ្លួនតាមរយៈកូតាសមាជិក ប៉ុន្តែចាប់តាំងពីការពិនិត្យមើលឡើងវិញនូវសិទ្ធិបោះឆ្នោតនេះត្រូវបានពន្យារពេលមក មូលនិធិនេះនឹងពឹងផ្អែកលើមូលនិធិពិសេសដែលគេហៅថា កិច្ចព្រមព្រៀងថ្មី ដើម្បីផ្តល់កម្ចី (New Arrangements to Borrow) ដើម្បីធានាថា ខ្លួនមានធនធានគ្រប់គ្រាន់ដើម្បីទប់ស្កាត់វិបត្តិថ្មីមួយ។
មូលនិធិ NAB ត្រូវបានដាក់ចេញបន្ទាប់ពីកើតមានវិបត្តិហិរញ្ញវត្ថុពិភពលោក និងរយៈពេលបច្ចុប្បន្នរបស់មូលនិធិនេះត្រូវបានអនុម័តសម្រាប់រយៈពេល ៥ ឆ្នាំទៀតដល់ខែវិច្ឆិកា ឆ្នាំ ២០២២៕ KC