.jpg)
កម្មកររោងចក្រកាត់ដេរសម្លៀកបំពាក់មួយនៅភ្នំពេញកំពុងបត់អាវក្នុងរោងចក្រកន្លងមក។ ភ្នំពេញ ប៉ុស្តិ៍
ភ្នំពេញៈ រដ្ឋាភិបាលកម្ពុជាកំពុងសកម្មក្នុងការដោះស្រាយហានិភ័យចំពោះភាពមិនច្បាស់លាស់ដែលបង្កឡើងដោយភាពតានតឹងពាណិជ្ជកម្ម និងលទ្ធភាពនៃការដកប្រព័ន្ធអនុគ្រោះពន្ធពីអឺរ៉ុប EBA តាមរយៈផែនការកំណែទម្រង់រចនាសម្ព័ន្ធ ដើម្បីលើកកម្ពស់ការប្រកួតប្រជែង និងការធ្វើពិពិធកម្ម។ នេះបើតាមលោក Jarkko Turunen ប្រធានក្រុមមូលនិធិរូបិយវត្ថុអន្តរជាតិ (IMF)។
ការលើកឡើងនេះបានធ្វើឡើងក្នុងសេចក្តីសន្និដ្ឋានកាលពីថ្ងៃសុក្រ បន្ទាប់ពីបំពេញទស្សនកិច្ចនៅកម្ពុជារយៈពេល ១២ ថ្ងៃ ដើម្បីពិនិត្យអំពីម៉ាក្រូសេដ្ឋកិច្ចកម្ពុជា និងបញ្ហាប្រឈម។
ក្រុមការងារមូលនិធិរូបិយវត្ថុអន្តរជាតិដឹកនាំដោយលោក Jarkko Turunen បានមកទស្សនកិច្ចនៅទីក្រុងភ្នំពេញចាប់ពីថ្ងៃទី ៣០ ខែកញ្ញាដល់ថ្ងៃទី ១១ ខែតុលា ឆ្នាំ ២០១៩ នេះដើម្បីពិភាក្សាលើពិគ្រោះយោបល់លើ Article IV ឆ្នាំ ២០១៩ ដែលជាការវិភាគលើការអភិវឌ្ឍសេដ្ឋកិច្ច និងគោលនយោបាយប្រទេសជាសមាជិក។
ការពិនិត្យឡើងវិញនៃប្រព័ន្ធអនុគ្រោះពន្ធ EBA របស់អឺរ៉ុបជាដៃគូនាំចេញសំខាន់មួយរបស់កម្ពុជាដែលអាចនឹងដកនៅឆ្នាំក្រោយអាចធ្វើឲ្យប៉ះពាល់ជាអវិជ្ជមានយ៉ាងធំធេងសម្រាប់សកម្មភាពសេដ្ឋកិច្ចរយៈពេលខ្លីរបស់កម្ពុជា។ នេះបើតាមសេចក្តីប្រកាសព័ត៌មាន IMF។
ទោះបីយ៉ាងណាលោក JarkkoTurunen បានប្រាប់អ្នកសារព័ត៌មាននៅក្នុងសន្និសីទសារព័ត៌មានបិទបញ្ចប់ដំណើរទស្សនកិច្ចកាលពីថ្ងៃសុក្រថា ទាក់ទងនឹងភាពមិនច្បាស់លាស់ និងហានិភ័យ រដ្ឋាភិបាលកម្ពុជាពិតជាមានភាពសកម្មក្នុងការដោះស្រាយហានិភ័យដែលបណ្តាលមកពីការព្យួរប្រព័ន្ធអនុគ្រោះពន្ធ EBA ប្រសិនបើវាអាចកើតឡើង។
លោកថ្លែងថា៖ «ខ្ញុំគិតថាក្នុងលក្ខខណ្ឌភាពមិនច្បាស់លាស់ និងហានិភ័យដែលបានលើកឡើង រដ្ឋាភិបាលកំពុងសកម្មយ៉ាងខ្លាំងក្នុងការដោះស្រាយហានិភ័យ»។ លោកបន្តថា៖ «រដ្ឋាភិបាលបានប្រកាសពីផែនការកែទម្រង់លើហេដ្ឋារចនាសម្ព័ន្ធ ហើយពួកគេបានរៀបចំកែទម្រង់ទាំងនោះ»។
តាមលោក JarkkoTurunen រដ្ឋាភិបាលក៏រៀបចំគម្រោងដែលផ្តោតលើដំណោះស្រាយផែនការចំណាយលើការបង្កើតការងារ ការអភិវឌ្ឍធនធានមនុស្ស និងការចំណាយលើហេដ្ឋារចនាសម្ព័ន្ធផងដែរ។ លោកថ្លែងថា៖ «យើងសូមណែនាំពីសារៈសំខាន់ វាទាក់ទងនឹងតម្រូវការធំដូច្នេះពួកគេត្រូវការចំណាយច្រើន ប៉ុន្តែធ្វើឲ្យប្រសើរឡើងហេដ្ឋារចនាសម្ព័ន្ធ»។
លោកបន្តថា៖ «វាក៏បង្ហាញផងដែរពីតម្រូវការពន្លឿនការអនុវត្តកំណែទម្រង់សំណង់ ជាពិសេសពង្រឹង និងភាពប្រកួតប្រជែង»។
អាជ្ញាធរបន្តអនុវត្តវិធានការម៉ាក្រូសេដ្ឋកិច្ចដ៏ប្រុងប្រយ័ត្ន និងកំពុងលើកកម្ពស់ប្រសិទ្ធភាព និងតម្លាភាពក្នុងការសម្រេចគោលនយោបាយម៉ាក្រូ។ នេះបើតាម IMF។
ដូចគ្នានឹងធនាគារពិភពលោកដែរ IMF បានឲ្យដឹងថា កំណើនឥណទានដែលកើនឡើងក្នុងលើវិស័យអចលនទ្រព្យ និងវិស័យសំណង់ ក៏ជាហានិភ័យមួយដែរ ដោយរំពឹងថានឹងកើនរង្វង់ ២៨ ភាគរយនៅឆ្នាំ ២០១៩ នេះ។
តាមរបាយការណ៍បច្ចុប្បន្នភាពសេដ្ឋកិច្ចនៅក្នុងតំបន់អាស៊ីបូព៌ា និងប៉ាស៊ីហ្វិកសម្រាប់ខែតុលា ឆ្នាំ ២០១៩ ដែលបានចេញផ្សាយកាលពីថ្ងៃ ព្រហស្បតិ៍ ចក្ខុវិស័យសេដ្ឋកិច្ចរបស់ប្រទេសកម្ពុជាកំពុងប្រឈមបញ្ហាមួយចំនួនរួមមានកំណើននៃការផ្តល់ឥណទានក្នុងវិស័យសំណង់ និងអចលនទ្រព្យ កំណើនបំណុល។
ធនាគារពិភពលោកបានឲ្យដឹងថា ការធ្វើឲ្យប្រសើរឡើងនូវការប្រកួតប្រជែងខាងក្រៅរបស់ប្រទេសកម្ពុជាគឺជារឿងចាំបាច់ដើម្បីរក្សាកំណើនឲ្យក្នុងកម្រិតមធ្យម។ របាយការណ៍ឲ្យដឹងថា៖ «វាជាការចាំបាច់ដើម្បីលើកកម្ពស់ការប្រកួតប្រជែងខាងក្រៅប្រទេសតាមរយៈការបង្កើនផលិតភាព បន្ទាប់ពីដំឡើងប្រាក់ឈ្នួលអប្បបរមាកម្មកររោងចក្រ»។
លោក JarkkoTurunen បានឲ្យដឹងថា គន្លឹះសំខាន់គឺពង្រីកការនាំចេញក្នុងលក្ខខណ្ឌទាំងផលិតកម្ម និងទីផ្សារ។ លោកបន្តថា រដ្ឋាភិបាលក៏កំពុងអនុវត្តកំណែទម្រង់ផងដែរ ដូច្នេះការអនុវត្តកំណែទម្រង់ទាំងនោះ ដើម្បីពន្លឿនការអនុវត្តនេះប្រហែលជាជំហានដំបូងដ៏មានសារៈសំខាន់បំផុត។
IMF ព្យាករថាសកម្មភាពសេដ្ឋកិច្ចកម្ពុជានៅតែរឹងមាំជាមួយនឹងកំណើនប្រមាណ ៧ ភាគរយនៅឆ្នាំនេះ ដោយសារកំណើនការនាំចេញ និងសកម្មភាពវិស័យសំណង់ ខណៈអតិផរណានៅថេរក្នុងអត្រា ២,៥ ភាគរយ៕LA
