.jpg)
IMF អនុម័តជំនួយឥតសំណងដល់ប្រទេសក្រីក្របំផុត ២៨ ក្នុងពិភពលោក ដើម្បីជួយពួកគេបន្ថយបំណុល និងដោះស្រាយផលប៉ះពាល់នៃការរីករាលដាលវីរុសកូរ៉ូណា។ រូបថត AFP
ទីក្រុងញូវយ៉កៈ មូលនិធិរូបិយវត្ថុអន្តរជាតិ (IMF) កាលពីថ្ងៃចន្ទបានអនុម័តនូវជំនួយសង្គ្រោះបន្ទាន់ថ្មីសម្រាប់ប្រទេសក្រីក្របំផុត ២៨ ក្នុងពិភពលោក ដើម្បីជួយពួកគេបន្ថយបំណុល និងដោះស្រាយផលប៉ះពាល់នៃការរីករាលដាលវីរុសកូរ៉ូណា។
ការប្រកាសតាមពីក្រោយវិធានការស្រដៀងគ្នាអនុម័តកាលពីពាក់កណ្តាលខែមេសា សម្រាប់ប្រទេស ២៥ មានបំណងជួយប្រទេសទាំងនោះ គ្រប់គ្រងការទូទាត់បំណុលរបស់ពួកគេដល់ IMF សម្រាប់រយៈពេល ៦ ខែបន្ទាប់នេះ និងបញ្ចប់សេចក្តីព្រួយបារម្ភចំពោះធនធានហិរញ្ញវត្ថុសម្រាប់សុខាភិបាលបន្ទាន់ និងកិច្ចខិតខំប្រឹងប្រែងដទៃទៀតអំឡុងពេលការរីករាលដាលនេះ។
ប្រទេសទាំង ២៨ ដែលទទួលបានជំនួយលើកទី ២ នេះមានអាហ្វហ្គានីស្ថាន,បេណាំង, បួគីណាហ្វាសូ, ប៊ូរុនឌី, សាធារណរដ្ឋអាហ្វ្រិកកណ្តាល, ឆាដ, កូម័រ, សាធារណរដ្ឋប្រជាធិបតេយ្យកុងហ្គោ,ជីបូទី, អេត្យូពី, ហ្គំប៊ី, ប៉ាពូអាស៊ីនូវែលហ្គីណេ, ហ្គីណេប៊ីស្សូ,ហៃទី, លីបេរីយ៉ា, ម៉ាដាហ្គាស្កា, មាឡាវី, ម៉ូហ្សំប៊ិក,នេប៉ាល់, នីហ្សេរីយ៉ា, រវ៉ាន់ដា, សៅតូម៉េ និង ប្រាំងស៊ីប, សៀរ៉ាឡេអូន, ដែនកោះសូឡូម៉ុន, តាហ្ស៊ីគីស្ថាន, តង់សានី, តូហ្គោ និង ប្រទេសយេម៉ែន។
IMF ឱ្យដឹងថា៖ «ប្រទេស ម៉ាលី ក៏មានសិទ្ធិសម្រាប់ជំនួយនេះដែរ ប៉ុន្តែមិនត្រូវបានបញ្ចូលទៅក្នុងបញ្ជីទេ ពីព្រោះមានភាពខ្វះខាតនៃភាពច្បាស់លាស់ ថា តើសហគមន៍អន្តរជាតិទទួលស្គាល់របបយោធាបច្ចុប្បន្ន ជារដ្ឋាភិបាលរបស់ប្រទេសម៉ាលីដែរឬទេ?»។
ការបន្ធូរបំណុលត្រូវបានធ្វើឡើងតាមរយៈមូលនិធិគ្រោះមហន្តរាយ និងការផ្តល់ជំនួយសង្គ្រោះ (CCRT), ដែលផ្តល់លទ្ធភាពដល់ IMF ដើម្បីផ្តល់ជំនួយឥតសំណងដល់ប្រទេសក្រីក្របំផុត និងងាយរងគ្រោះបំផុតដែលវាយប្រហារដោយគ្រោះធម្មជាតិ ឬ វិបត្តិសុខភាពសាធារណៈ។
ដោយធនធានមានគ្រប់គ្រាន់ ជំនួយឥតសំណងអាចត្រូវបានផ្តល់រយៈពេល ២ ឆ្នាំរហូតដល់ពាក់កណ្តាលខែមេសា ឆ្នាំ ២០២២ សម្រាប់ទឹកប្រាក់ប៉ាន់ស្មានសរុបចំនួន ៩៥៩ លានដុល្លារ។
គោលបំណងរបស់ IMF គឺផ្តល់ជំនួយ CCRT នូវទឹកប្រាក់ ១,៤ ពាន់លានដុល្លារ ដូចនេះវាអាចបំពេញតម្រូវការក្នុងអនាគត។
រហូតមកដល់ពេលនេះ ទឹកប្រាក់ចំនួន ៥០៦,៥ លានដុល្លារ ត្រូវបានផ្តល់ដោយបណ្តាប្រទេសជាច្រើនរួមទាំង អង់គ្លេស ជប៉ុន អាល្លឺម៉ង់ ហូឡង់ ស្វ៊ីស ន័រវែស ចិន ម៉ិកស៊ិក ស៊ុយអែត ប៊ុលហ្គារី លុចសំបូ និងម៉ាល់ត៍៕ RR
