ភ្នំពេញៈ ក្រសួងកសិកម្ម រុក្ខាប្រមាញ់ និង នេសាទ (MAFF) បានចុះកិច្ចព្រមព្រៀងផែនការសហការការងារឆ្នាំ ២០២០- ២០២៣ ជាមួយវិទ្យាស្ថានស្រាវជ្រាវស្រូវ អង្ករអន្តរជាតិ (IRRI) ក្នុងគោលបំណងលើកកម្ពស់ការធ្វើពាណិជ្ជកម្មរបស់វិស័យ ស្រូវ អង្ករតាមរយៈការវាយតម្លៃចង្វាក់តម្លៃផលិតភាព និងភាពធន់។
ពិធីចុះហត្ថលេខាលើកិច្ចព្រមព្រៀងរវាងលោក វេង សាខុន រដ្ឋមន្ដ្រី MAFF ជាមួយលោក Yurdi Yasmi តំណាងប្រចាំតំបន់របស់ IRRI ទទួលបន្ទុក អាស៊ីអាគ្នេយ៍នៅខុទ្ទកាល័យ ក្រសួងកាលពីម្សិលមិញ។
លោក វេង សាខុន រដ្ឋមន្ដ្រី MAFF បានឲ្យដឹងក្នុងអំឡុងពិធីចុះហត្ថលេខានេះថា កិច្ចព្រមព្រៀងនេះមានគោលបំណងលើកកម្ពស់ការធ្វើពាណិជ្ជកម្មរបស់វិស័យស្រូវ អង្ករតាមរយៈការវាយតម្លៃ និងការពង្រឹងចង្វាក់តម្លៃ និងដើម្បីលើកកម្ពស់ផលិតភាព និងភាពធន់តាមរយៈការបង្កើតហ្ស៊ែន និងការប្រើប្រាស់ការកែលម្អដំណាំ កសិកម្ម និងការអភិវឌ្ឍប្រព័ន្ធ គ្រាប់ពូជ។
លោក សាខុន បានបន្ថែមថាវាក៏ដើម្បីលើកកម្ពស់ការគ្រប់គ្រងប្រកបដោយចីរភាពនៃដីកសិកម្មតាមរយៈបច្ចេកទេសអាកាសធាតុវៃឆ្លាត ការបង្កើនប្រសិទ្ធភាពនៃជម្រើសចម្រុះ និងការគ្រប់គ្រង និងការត្រួតពិនិត្យផ្ទៃដី ការធ្វើគំរូ និងការរៀបចំផែនការដើម្បីឲ្យមានការធ្វើទំនើបកម្ម កសិកម្មតាមរយៈការធ្វើយន្តកម្មនៅកសិដ្ឋាន ក្រោយការប្រមូលផល និងការគ្រប់គ្រងអនុផល។
លោកបានថ្លែងថា៖ «ប្រទេសកម្ពុជារីករាយក្នុងការបង្កើនការសហការជាមួយ IRRI ដែលជាដៃគូរយៈពេលវែងរបស់យើងនៅក្នុងការអភិវឌ្ឍវិស័យស្រូវអង្កររបស់យើង។ រាជរដ្ឋាភិបាលបានដាក់ចេញនូវផែនការជាយុទ្ធសាស្ត្រក្នុងការពង្រឹងតួនាទីរបស់វិស័យកសិកម្មជាមួយប្រព័ន្ធការធ្វើកសិកម្មដែលពឹងផ្អែកលើដំណាំស្រូវដែលមានសារៈសំខាន់ក្នុងការបង្កើតការងារ ការធានា សុវត្ថិភាពស្បៀងអាហារ ការកាត់បន្ថយភាពក្រីក្រ និងការអភិវឌ្ឍតំបន់ជនបទ»។
លោក Yurdi Yasmi តំណាងប្រចាំតំបន់របស់ IRRI ទទួលបន្ទុកតំបន់អាស៊ីអាគ្នេយ៍បានឲ្យដឹងថា កិច្ចព្រមព្រៀងនេះបង្ហាញពីកិច្ចការសំខាន់ផ្សេងៗទៀតនៅក្នុងការសហការរយៈពេលវែងរបស់យើង»។
លោកថា IRRI ផ្តោតការយកចិត្តទុកដាក់ខ្ពស់លើការស្រាវជ្រាវកសិស្បៀងអាហារ ស្រូវ អង្ករនៅក្នុងប្រទេសកម្ពុជា ខណៈដែលវិស័យនេះបន្តអភិវឌ្ឍប្រទេសបញ្ហាប្រឈមថ្មីៗក៏លេចឡើងដូចជាការប្រែប្រួល អាកាសធាតុ សត្វល្អិត ចង្រៃ និង ជំងឺនានា ភាពរាំងស្ងួត ការធ្លាក់ចុះផលិតភាព និងការប៉ះពាល់បរិស្ថាន ហើយការស្រាវជ្រាវនឹងមានសារៈសំខាន់ក្នុងការជួយដោះស្រាយបញ្ហាប្រឈមទាំងនេះ។
លោកលើកឡើងថា៖ «កិច្ចព្រមព្រៀងនេះនឹងអាចឲ្យយើងពង្រឹងកិច្ចសហប្រតិបត្តិការ និងការសហការរវាង IRRI និង MAFF និងដៃគូផ្សេងទៀតលើគំនិតផ្តួចផ្ដើមដែលនឹងរួមចំណែកក្នុងការពង្រឹងវិស័យស្រូវអង្កររបស់កម្ពុជា និងការឆ្ពោះទៅទិសដៅគោលនយោបាយជាតិ»។
លោក Yasmi ថ្លែងបន្តទៀតថាការពង្រឹងទីផ្សារស្រូវអង្ករឲ្យមានតម្លៃខ្ពស់ការលើកកម្ពស់អាកាសធាតុវៃឆ្លាត និង ការរៀបចំដី និងទឹកប្រកបដោយចីរភាព និងការគ្រប់គ្រងសត្វល្អិតចង្រៃ និងការធ្វើឲ្យប្រសើរឡើងយន្តកម្មនៅវាលស្រែគឺគ្រាន់តែជាឱកាស និងបញ្ហាប្រឈមមួយចំនួនប៉ុណ្ណោះដែលនឹងដោះស្រាយធ្វើការស្រាវជ្រាវ និងការអភិវឌ្ឍរួមគ្នា។
លោក វេង សាខុន បានគូសបញ្ជាក់ថា ភាពជាដៃគូនេះត្រូវបានបង្កើតឡើងជាមួយនឹងអនុស្សរណៈនៃការយោគយល់គ្នាលើកដំបូងកាលពីឆ្នាំ ១៩៨៦ ។ ការបន្តគាំទ្ររបស់ IRRI ដល់ប្រទេសកម្ពុជា អាចបង្កើនយ៉ាងខ្លាំងលើការផលិតស្រូវអង្កររបស់ខ្លួនពី ២,៤ លានតោនកាលពីឆ្នាំ ១៩៩៣ ដល់ ១០,៨ លានតោនកាលពីឆ្នាំ ២០១៩ ។
លោកបន្ថែមថា៖ «ការផ្លាស់ប្តូរប្រព័ន្ធកសិកម្មដែលពឹងផ្អែកលើស្រូវក៏បានដើរតួនាទីដ៏សំខាន់នៅក្នុងការអភិវឌ្ឍ និងកំណើនសេដ្ឋកិច្ចនៅពេលថ្មីៗរបស់ប្រទេសកម្ពុជាផងដែរ»៕ LA