.jpg)
ពលរដ្ឋដំឡើងផ្ទាំងសូឡានៅខេត្តព្រះសីហនុ នាពេលកន្លងមក។ ហេង ជីវ័ន
ភ្នំពេញៈ គម្រោងវិនិយោគលើវិស័យថាមពលកកើតឡើងវិញពីពន្លឺព្រះអាទិត្យតម្លៃជិត ៤០ លានដុល្លារ នៅខេត្តបន្ទាយមានជ័យ បានត្រូវតភ្ជាប់ជាមួយបណ្តាញអគ្គិសនីជាតិ បន្ទាប់ពីក្រុមហ៊ុន JA Solar ដែលជាក្រុមហ៊ុនផ្គត់ផ្គង់សម្ភារផលិតថាមពលព្រះអាទិត្យមានមូលដ្ឋាននៅប្រទេសចិន បានសាកល្បងតភ្ជាប់ និងទទួលជោគជ័យ។ យោងតាមសេចក្តីប្រកាសរបស់ក្រុមហ៊ុន JA Solar។
សេចក្តីប្រកាសចុះថ្ងៃទី ១០ ខែមីនា បានឱ្យដឹងថា គម្រោងថាមពលអានុភាព ៣៩ មេហ្គាវ៉ាត់ នៅក្នុងប្រទេសកម្ពុជា គ្រប់គ្រងដោយក្រុមហ៊ុន JA Solar បានផ្គត់ផ្គង់រាល់សម្ភារផលិតថាមពលអគ្គិសនីមានផ្ទាំងសូឡា (PV) ជាដើមតភ្ជាប់ប្រកបដោយជោគជ័យមកបណ្តាញអគ្គិសនីជាតិ ហើយគម្រោងនេះត្រូវបានចុះកិច្ចព្រមព្រៀងជាមួយក្រុមហ៊ុន Shanxi Electric Power Engineering Co., Ltd. (SEPEC) ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន China Energy Engineering Group។ នេះបើយោងតាមសេចក្ដីប្រកាសព័ត៌មានរបស់ក្រុមហ៊ុន។
ក្រុមហ៊ុន JA Solar បានឱ្យដឹងថា វាជាគម្រោងថាមពលកកើតឡើងវិញឈានមុខគេទាក់ទងនឹងសមត្ថភាពដំឡើងនៅតាមខេត្ត និងគម្រោងតភ្ជាប់មកបណ្តាញខ្សែបញ្ជូនអគ្គិសនីយ៉ាងពេញលេញលើកដំបូងក្នុងចំណោមគម្រោងដែលបង្ហាញ PV ទាំង ៥ ដំបូងដែលបានអនុម័តដោយរដ្ឋាភិបាលកម្ពុជា។
ក្រុមហ៊ុនបានកត់សម្គាល់ថា៖ «ដើម្បីធានាថា គម្រោងនេះត្រូវបានតភ្ជាប់ជាមួយអគ្គិសនីទាន់ពេលវេលា ក្រុមហ៊ុន JA Solar បានបញ្ចប់ការចែកចាយម៉ូឌុលទាន់ពេលវេលាតាមរយៈការជម្នះនឹងកត្តាអវិជ្ជមានជាច្រើនដែលរួមមានការកើនឡើងតម្លៃចង្វាក់ផ្គត់ផ្គង់ ដែលបានបណ្ដាលឡើងដោយសារតែការដំឡើង PV ក្នុងស្រុក និងអន្តរជាតិយ៉ាងប្រញាប់កាលពីឆមាសទី២ ឆ្នាំ ២០២០»។
ក្រុមប្រឹក្សាអភិវឌ្ឍន៍កម្ពុជា (CDC) កាលពីខែសីហា ឆ្នាំមុនបានអនុម័តគម្រោងថាមពលសូឡាទំហំ ៣០ មេហ្គាវ៉ាត់មានតម្លៃ ៣៩,៨ លានដុល្លាររបស់ក្រុមហ៊ុន Ray Power Supply Co Ltd ដែលគ្រប់គ្រងដោយវិនិយោគិនជនជាតិថៃនៅក្នុងខេត្តបន្ទាយមានជ័យភាគពាយព្យរបស់កម្ពុជា។
លោក វិចទ័រ ហ្សូនា អគ្គនាយកនៃអគ្គនាយកដ្ឋានថាមពលនៃក្រសួងរ៉ែ និងថាមពលបានប្រាប់ ភ្នំពេញ ប៉ុស្ដិ៍ថា ក្រុមហ៊ុននេះបានចុះកិច្ចព្រមព្រៀងទិញ-លក់ថាមពលជាមួយអគ្គិសនីកម្ពុជាដែលគ្រប់គ្រងដោយរដ្ឋក្នុងតម្លៃ ០,០ ៧៦ ដុល្លារ ក្នុង ១ គីឡូវ៉ាត់ម៉ោង ដែលលោក ហ្សូនា បានហៅថា ជា «តម្លៃអាចទទួលយកបាន»។
លោកបានបញ្ជាក់ថា គម្រោងខាងលើបានភ្ជាប់ជាមួយបណ្តាញជាតិរួចរាល់ហើយ។
លោកបានចង្អុលបង្ហាញថា កម្ពុជាគ្រោងពង្រីកផលបត្រវិនិយោគលើថាមពលស្អាតរបស់ខ្លួនដល់ ៤៥០ មេហ្គាវ៉ាត់ត្រឹមចុងឆ្នាំក្រោយ។
លោក ហ្សូនា បានបញ្ជាក់ថា កម្ពុជានឹងមិនជួបប្រទះកង្វះអគ្គិសនីនោះទេនៅឆ្នាំនេះ ដោយសារសមត្ថភាពផ្គត់ផ្គង់កាន់តែខ្ពស់ពោលកម្ពុជាមានសមត្ថភាព ផលិតអគ្គិសនី ៣ ០០០ មេហ្គាវ៉ាត់នៅក្នុងរដូវវស្សា និង ២ ២០០ មេហ្គាវ៉ាត់នៅរដូវប្រាំង។
ក្រុមប្រឹក្សាអភិវឌ្ឍន៍កម្ពុជាកាលពីខែមករាបានអនុម័តកសិដ្ឋានផលិតថាមពលសូឡាដែលមានអានុភាព ៦០ មេហ្គាវ៉ាត់នៅស្រុកទឹកផុស ខេត្តកំពង់ឆ្នាំង ដែលមានទុនវិនិយោគ ៣៧,៤ លានដុល្លារ មានឈ្មោះថា Prime Road Alternative (Cambodia) Co Ltd៕ LA
