ភ្នំពេញៈ តំណាងទីភ្នាក់ងារកិច្ចសហប្រតិបត្តិការអន្តរជាតិជប៉ុន (JICA) ស្វែងរកការគាំទ្រពីអាជ្ញាធរអប្សរាដើម្បីរួមគ្នាអភិវឌ្ឍទីក្រុងវៃឆ្លាត ដែលនឹងនាំមកនូវមុខមាត់ថ្មីផ្សេងទៀតសម្រាប់ខេត្តបុរាណមួយនេះ។
ការអំពាវនាវនេះបានធ្វើឡើង បន្ទាប់ពីរដ្ឋាភិបាលកម្ពុជាកាលពីខែកុម្ភៈឆ្នាំមុន បានជ្រើសរើសទីក្រុង ៣ គឺទីក្រុងភ្នំពេញ ទីក្រុងបាត់ដំបង និងសៀមរាបដាក់ទៅក្នុងបណ្ដាញទីក្រុងវៃឆ្លាតអាស៊ាន (ASCN) ដោយមានការជួយពីរដ្ឋាភិបាលជប៉ុន។
លោក Tanaka Kotaro តំណាងជាន់ខ្ពស់របស់ JICA ប្រចាំកម្ពុជាដែលបានដឹកនាំក្រុមគណៈប្រតិភូបានជួបជាមួយអគ្គនាយកអាជ្ញាធរអប្សរាកាលពីសប្ដាហ៍មុននៅខេត្តសៀមរាប ដោយបានគូសបញ្ជាក់ថា ស្ថិតក្រោមគម្រោងទីក្រុងវៃឆ្លាតអាស៊ាន-ជប៉ុន រដ្ឋាភិបាលជប៉ុនទទួលបានការយល់ព្រមរួចហើយពីរដ្ឋាភិបាលកម្ពុជាចាប់តាំងដើមឆ្នាំមុន។
លោកត្រូវបានដកស្រង់សម្តីនៅក្នុងសេចក្ដីប្រកាសព័ត៌មានអាជ្ញាធរអប្សរាថា៖ «គម្រោងនេះនឹងត្រូវបានអភិវឌ្ឍក្នុងមធ្យោបាយប្រកបដោយនិរន្តរភាពដោយការតភ្ជាប់ជាមួយ ICT ក្នុងគោលបំណងភាគច្រើនផ្ដោតលើការប្រើប្រាស់បច្ចេកវិទ្យាទំនើប ជាមធ្យោបាយនៃទូរគមនាគមន៍ដើម្បីដោះស្រាយបញ្ហាមួយចំនួន ដូចជាលំនៅឋានរបស់ប្រជាជន ការកកស្ទះចរាចរណ៍ និងបរិស្ថាន។ ទីក្រុងវៃឆ្លាតនេះ ត្រូវបានជ្រើសរើសទីក្រុង ៣ រួចហើយ ដែលរួមមានទីក្រុងភ្នំពេញ សៀមរាប និងខេត្តបាត់ដំបង»។
លោកក៏បានស្វែងរកកិច្ចសហប្រតិបត្តិការពីអាជ្ញាធរអប្សរាស្ដីពីគោលការណ៍កិច្ចសហប្រតិបត្តិការរវាងអាជ្ញាធរអប្សរា និងវិទ្យាសា្ថនជប៉ុនផ្សេងទៀតក្នុងគោលបំណងអភិរក្សតំបន់អង្គរផងដែរ។
លោក ហង្ស ពៅ អគ្គនាយកអាជ្ញាធរអប្សរា បានស្វាគមន៍គំនិតផ្តួចផ្ដើមដែលត្រូវបានអនុម័តរួចហើយដោយរដ្ឋាភិបាលកម្ពុជាសម្រាប់ការបង្កើតទីក្រុងវៃឆ្លាតដោយមានការគាំទ្រពីរដ្ឋាភិបាលជប៉ុនតាមរយៈ JICA ។
លោកថ្លែងថា៖ «ការបង្កើតទីក្រុងវៃឆ្លាតនេះគឺជាអ្វីដែលអាជ្ញាធរអប្សរាចង់បាន ហើយយើងជំរុញឲ្យភាគីទាំង ២ ត្រូវបង្កើនល្បឿនគម្រោងនេះ ដើម្បីឲ្យវាកើតឡើងនៅពេលអនាគតដ៏ខ្លីខាងមុខនេះ»។ លោកបន្តថា ភាគីទាំង ២ មិនបានបង្ហាញកាលបរិចេ្ឆទ និងទីតាំងពិតប្រាកដសម្រាប់ការសាងសង់នេះទេ។
ក្រសួងរៀបចំដែនដី នគរូបនីយកម្ម និងសំណង់កម្ពុជាបានចុះហត្ថលេខាកាលពីថ្ងៃទី ១ ខែមីនា ស្ដីពីការបង្កើតបណ្ដាញទីក្រុងវៃឆ្លាតអាស៊ាន-ជប៉ុន។
តំបន់ទីក្រុងឈានមុខគេ ៣ របស់កម្ពុជាមានភ្នំពេញ សៀមរាប និងបាត់ដំបង នឹងត្រូវដាក់បញ្ចូលទៅក្នុងបណ្ដាញទីក្រុងវៃឆ្លាតអាស៊ាន។ បណ្ដាញនេះមានគោលបំណងក្នុងការបង្កើនការតភ្ជាប់ក្នុងតំបន់ និងមានវត្តមាននៅក្នុងទីក្រុង ២៦ ទូទាំងតំបន់អាស៊ាន។
ពាក្យ «ទីក្រុងវៃឆ្លាត» សំដៅដល់ការអភិវឌ្ឍរបស់ទីក្រុងជាមួយនឹងបច្ចេកទេសវៃឆ្លាត និងប្រកបដោយស្ថិរភាព ដើម្បីដោះស្រាយផលប៉ះពាល់នៃការធ្វើនគរូបនីយកម្មយ៉ាងរហ័សដូចជាការកកស្ទះចរាចរណ៍ គុណភាពទឹក និងខ្យល់ សន្ដិភាព និងសន្ដិសុខ។
លោក ជា សុផារ៉ា រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ នៅក្នុងវេទិកាឯកជនសាធារណៈស្ដីពី «ការអភិវឌ្ឍនគរូបនីយកម្មរវាងកម្ពុជា និងជប៉ុន» កាលពីចុងខែកុម្ភៈ ឆ្នាំ ២០១៩ ដោយបានសម្ដែងការគាំទ្រគំនិតផ្តួចផ្ដើម ២ របស់រដ្ឋាភិបាលជប៉ុន។
លោកថ្លែងថា៖ «ក្រសួងនឹងស្វែងរកកិច្ចសហប្រតិបត្តិការ ការសម្របសម្រួល និងការផ្ដល់សេវាទាំងអស់នៅក្នុងទីក្រុងរបស់ខ្លួន និងការលើកទឹកចិត្តដល់ពាណិជ្ជករ និងក្រុមហ៊ុនជប៉ុនចូលមកវិនិយោគ និងធ្វើជាដៃគូជាមួយក្រុមហ៊ុនកម្ពុជា»៕LA