ភ្នំពេញៈ ក្រុមហ៊ុន Kalmar ដែលជាផ្នែកមួយរបស់ក្រុមហ៊ុន Cargotec បានចុះកិច្ចព្រមព្រៀងជាមួយកំពង់ផែស្វយ័តភ្នំពេញ (PPAP) ដើម្បីផ្គត់ផ្គង់ឧបករណ៍ស្ទូច SmartPower Rubber-Tyred Gantry (RTG) យីហោ Kalmar ចំនួន ៤ គ្រឿងសម្រាប់ចំណតកុងតឺន័រ LM17 របស់ខ្លួននៅប្រទេសកម្ពុជា ដើម្បីបង្កើនសមត្ថភាពចំណតកុងតឺន័រមួយនេះឲ្យកើនឡើងទ្វេដង។
សេចក្ដីប្រកាសព័ត៌មានរបស់ក្រុមហ៊ុនកាលពីថ្ងៃសុក្របានឲ្យដឹងថា ការបញ្ជាទិញនេះត្រូវបានកត់ក្នុងចំណូលការបញ្ជាទិញត្រីមាសទី ៣ ឆ្នាំ ២០២០ របស់ក្រុមហ៊ុន Cargotec ដោយការដឹកជញ្ជូនឧបករណ៍ស្ទូចនោះ គ្រោងនឹងត្រូវបញ្ចប់នៅត្រីមាសទី ៣ ឆ្នាំ ២០២១។
សេចក្ដីប្រកាសព័ត៌មានបានបន្តថា ឧបករណ៍ស្ទូច RTG នេះនឹងត្រូវដំឡើងនៅចំណតកុងតឺន័រ LM17 របស់ PPAP ក្នុងខេត្តកណ្ដាល។ ចំណតកុងតឺន័រ LM17 របស់ PPAP បានចាប់ផ្ដើមប្រតិបត្តិការកាលពីខែមករា ឆ្នាំ ២០១៣ ដោយផ្ដល់សេវាកម្មទាំងសម្រាប់កុងតឺន័រ និងទំនិញធម្មតាជាមួយនឹងសមត្ថភាពស្ដុកកុងតឺន័របានចំនួន ១៥០ ០០០ TEUs។
លោក ហ៊ី បាវី អគ្គនាយកកំពង់ផែស្វយ័តភ្នំពេញបានឲ្យដឹងថា ឧបករណ៍ស្ទូច Kalmar RTGs ថ្មីចំនួន ៤ គ្រឿងនេះនឹងជួយពង្រីកសមត្ថភាពចំណតកុងតឺន័រកំពង់ផែស្វយ័តភ្នំពេញឲ្យបានកាន់តែកើនឡើងបន្ថែមទៀត។
លោកថ្លែងថា៖ «ទំនាក់ទំនងដ៏រឹងមាំរបស់យើងជាមួយក្រុមហ៊ុន Kalmar គឺមានតាំងពីពេលចាប់ផ្ដើមដំបូងនៃប្រតិបត្តិការ LM17។ ការគាំទ្រដ៏ធំរបស់ Kalmar និងឧបករណ៍ប្រតិបត្តិការទំនើបៗបានជំរុញឲ្យយើងជ្រើសរើសយកពួកគេជាថ្មីម្ដងទៀតទាក់ទងនឹងការពង្រីកសមត្ថភាពរបស់កំពង់ផែស្វយ័តភ្នំពេញ»។
លោក Daniel Ho អនុប្រធានផ្នែកលក់ប្រចាំនៅអាស៊ីប៉ាស៊ីហ្វិកនៃក្រុមហ៊ុន APAC និងក្រុមហ៊ុន Kalmar បានឲ្យដឹងថា លោកពិតជារីករាយនៅក្នុងការបន្តទទួលយកដំណោះស្រាយ RTG របស់ក្រុមហ៊ុននៅតំបន់អាស៊ីអាគ្នេយ៍ ហើយវាក៏ជាការបន្តភាពជាដៃគូរបស់ខ្លួនជាមួយ PPAP ដើម្បីសម្រេចមហិច្ឆតារបស់ពួកគេផងដែរ។
លោក Daniel Ho បានថ្លែងថា៖ «ឧបករណ៍ស្ទូច SmartPower RTGs អាចជួយកាត់បន្ថយការប្រើប្រាស់ប្រេងឥន្ធនៈបានរហូតដល់ ៥០ ភាគរយ ប្រចាំឆ្នាំធៀបនឹងគ្រឿងចក្រម៉ាស៊ូតធម្មតា»។
កំពង់ផែស្វយ័តក្រុងភ្នំពេញ (PPAP) បានរាយការណ៍ពីប្រតិបត្តិការអាជីវកម្មល្អប្រសើរនៅឆមាសទី ១ ឆ្នាំនេះ ទោះបីផលប៉ះពាល់ពីជំងឺកូវីដ១៩ កំពុងបង្កមានឥទ្ធិពលទៅលើសកម្មភាពពាណិជ្ជកម្មនៅក្នុងតំបន់ និងអន្តរជាតិក៏ដោយ។
PPAP បានកត់ត្រាប្រាក់ចំណូល ១២,៨៦៧ លានដុល្លារ នៅឆមាសទី ១ កើនឡើង ១០ ភាគរយធៀបនឹង ១១,៦៩២ លានដុល្លារក្នុងរយៈពេលដូចគ្នាកាលពីឆ្នាំមុន។
ក្រុមហ៊ុននេះក៏បានកត់ត្រាកំណើននៃប្រាក់ចំណេញដុល ១៤ ភាគរយពី ៧,៨០១ លានដុល្លារ ដល់ ៨,៩០៣ លានដុល្លារ នៅក្នុងអំឡុងពេលនេះផងដែរ៕ LA