ភ្នំពេញៈ បើទោះទើបដាក់លក់លើទីផ្សារពេលខ្លីក៏ដោយ ក៏តម្រូវការទឹកដោះគោស្រស់ផលិតក្នុងស្រុក Kirisu Farm ត្រូវគេដឹងថា កំពុងទទួលនូវការចាប់អារម្មណ៍យ៉ាងច្រើននៅលើទីផ្សារ។ នេះបើតាមសហស្ថាបនិកក្រុមហ៊ុន Khmer Fresh Milk។
Kirisu Farm ជាផលិតផលរបស់ក្រុមហ៊ុន Khmer Fresh Milk ដែលបានវិនិយោគក្នុងទឹកប្រាក់ ១០ លានដុល្លារ លើកសិដ្ឋានចិញ្ចឹមគោ ១ កន្លែងមានផ្ទៃដី ៣០០ ហិកតា និងមានរោងចក្រកែច្នៃទឹកដោះគោស្រស់ស្ថិតក្នុងស្រុកបាទី ខេត្តតាកែវ។
លោក ជី សិលា សហស្ថាបនិកក្រុមហ៊ុន Khmer Fresh Milk បានប្រាប់ ភ្នំពេញ ប៉ុស្តិ៍ កាលពីថ្ងៃព្រហស្បតិ៍ថា ទោះទើបចូលទីផ្សារបានជិតកន្លះឆ្នាំ ប៉ុន្តែផលិតផលទឹកដោះគោស្រស់ និងយ៉ាអ៊ួររបស់ Kirisu Farm ពិតជាទាក់ទាញបានចំណាប់អារម្មណ៍របស់អតិថិជនជាបន្តបន្ទាប់ ដោយសារតែផលិតផល Kirisu Farm ត្រូវបានផលិតពីទឹកដោះគោសុទ្ធពីធម្មជាតិ ជាមួយនឹងបច្ចេកទេសកសិកម្មទំនើប និងការកែច្នៃចំណីអាហារតាមស្តង់ដាអនាម័យលំដាប់ពិភពលោក។
លោកថ្លែងថា៖ «ទោះបីយើងទើបដាក់ចូលទីផ្សារ ប៉ុន្តែកំណើនតម្រូវការផលិតផល Kirisu Farm បានកើនឡើងជាលំដាប់ គ្រាន់តែនៅពេលនេះក្រុមហ៊ុននៅមិនទាន់មានប្រព័ន្ធចែកចាយ (រថយន្តត្រជាក់) គ្រប់គ្រាន់»។
ជាមួយនឹងកំណើនតម្រូវការលោកបានអះអាងថា នៅដើមឆ្នាំ ២០២១ ខាងមុខក្រុមហ៊ុនសង្ឃឹមថា ការចែកចាយនឹងមានវិសាលភាពកាន់តែធំ។
បន្ទាប់ពីបើកដំណើររោងចក្រកែច្នៃទឹកដោះគោស្រស់កាលពីខែកក្កដា ឆ្នាំ ២០២០ បច្ចុប្បន្នកសិដ្ឋាននេះមានគោផ្តល់ទឹកដោះពូជ Holstein heifers ជាង ៥០០ ក្បាល និងមានសមត្ថភាពផលិតទឹកដោះបានជាង ៨ ០០០ លីត្រ ក្នុង ១ ថ្ងៃ ហើយអាចកើនដល់ ១២ ០០០ លីត្រនៅពេលឆាប់ៗ។
ខណៈតាមផ្សារទំនើបក្នុងរាជធានីភ្នំពេញគេតែងសង្កេតឃើញមានដាក់លក់ទឹកដោះគោស្រស់ភាគច្រើននាំចូលពីបរទេសនោះលោក សិលា បានប្រាប់ថា កម្ពុជាបាននាំចូលទឹកដោះគោស្រស់ស្ទើរទាំងស្រុងពីបរទេស។
បើតាមលោក សិលា Kirisu Farm កំពុងត្រូវបានដាក់លក់នៅផ្សារជាច្រើនដូចជា ម៉ាក្រូ ឡាក់គី បាយ័ន ស៊ូភើស្ទ័រ និងជីបម៉ុង ជាដើម។
ក្រៅពី Kirisu Farm នៅកម្ពុជាបច្ចុប្បន្នមានកសិដ្ឋានចិញ្ចឹមគោយកទឹកដោះធំៗចំនួន ២ កន្លែងទៀត គឺកសិដ្ឋានផលិតទឹកដោះគោតេជោសែនឫស្សីត្រឹប និងកសិដ្ឋាន Moo Moo Farms៕ LA