.jpg)
Kiwi pay Group រួមសហការជាមួយនឹង Meal Temple ដើម្បីបង្កើតកម្មវិធីថ្មីមួយដែលហៅថា «KiwiGo»។ រូបថត Kiwi Pay
ភ្នំពេញៈ ក្រុមហ៊ុនបច្ចេកវិទ្យាហិរញ្ញវត្ថុមានមូលដ្ឋាននៅក្រុងហុងកុង Kiwi Pay Group បានប្រកាសពីការច្របាច់បញ្ចូលគ្នាជាមួយនឹង Meal Temple Group ដែលចែកចាយស្បៀងអាហារ និងគ្រឿងទេសកម្ពុជាដើម្បីបង្កើតកម្មវិធីថ្មីមួយដែលហៅថា «KiwiGo»។ នេះបើយោងតាម Tech in Asia។
ព័ត៌មាន Tech in Asia បានឱ្យដឹងថា កម្មវិធីនេះនឹងរួមបញ្ចូលនូវមាតិកា ដូចជា ពាណិជ្ជកម្ម ឡូជីស្ទិក និងសេវាហិរញ្ញវត្ថុនៅទីផ្សារអាហ្វ្រិក និងអាស៊ី ដែលសម្របសម្រួលដោយដៃគូប្រតិបត្តិការក្នុងស្រុក។
លោក Maxime Rosburger អគ្គនាយកក្រុមហ៊ុន Meal Temple Group បានថ្លែងថា៖ «ក្រុមហ៊ុន Kiwi Pay និងក្រុមហ៊ុន Meal Temple មាន DNAs ស្រដៀងគ្នា យើងដំណើរការដោយមានការគ្រប់គ្រងកាន់តែប្រសើរនៃចង្វាក់តម្លៃជាដំណើរផ្លូវថ្មីឆ្ពោះទៅទីផ្សារ និងធ្វើឱ្យមានភាពប្រសើរឡើង»។
លោកកត់សម្គាល់ថា៖ «ក្រុមហ៊ុនទាំង ២ បានផ្ដល់កិច្ចខិតខំប្រឹងប្រែងដ៏ធំធេងដើម្បីធានាឱ្យការច្របាច់បញ្ចូលគ្នាប្រកបដោយជោគជ័យ ដែលស្របគ្នានឹងការធ្វើចត្តាឡីស័ក ការបិទការធ្វើដំណើរ និងរាល់បញ្ហាប្រឈមជាច្រើនផ្សេងទៀតដែលបានបណ្ដាលមកពីការរីករាលដាលជំងឺកូវីដ ១៩»។
កម្មវិធី KiwiGo មានកិច្ចព្រមព្រៀង និងអាជ្ញាប័ណ្ណជាមួយធនាគារកណ្ដាល និងគ្រឹះស្ថានហិរញ្ញវត្ថុនៅក្នុងប្រទេសជាង ២០ នៅអាហ្វ្រិក និងអាស៊ីដែលរួមមានកម្ពុជា មីយ៉ាន់ម៉ា និងសាធារណរដ្ឋកុងហ្គោ កេនយ៉ា កូតឌឺវ័រ ម៉ាដាហ្កាស្កា សេណេហ្គាល់ និងហ្គាណា។ នេះបើយោងតាមរបាយការណ៍។
លោក Gregory Schmidt ស្ថាបនិក និងជាអគ្គនាយកក្រុមហ៊ុន Kiwi Pay ប្រកាសថា៖ «អាស៊ី និងអាហ្វ្រិក គឺជាកន្លែងដែលប្រជាជនមិនទទួលបានសេវាធនាគារភាគច្រើនលើពិភពលោក។ ជាមួយគ្នានេះយើងនឹងបន្តវិនិយោគលើបចេ្ចកវិទ្យា និងទីផ្សារជួរមុខ និងបង្កលទ្ធភាពទទួលបានសេរីភាពសេដ្ឋកិច្ចសម្រាប់មនុស្សគ្រប់គ្នា និងក្រុមហ៊ុនក្នុងសេដ្ឋកិច្ចដែលមានការប្រកួតប្រជែងខ្លាំងបំផុតនេះ»។
កម្ពុជាបានដាក់ឱ្យដំណើរការជាផ្លូវការយុទ្ធសាស្ដ្រពាណិជ្ជកម្មអេឡិចត្រូនិក កាលពីថ្ងៃទី ២៥ ខែ វិច្ឆិកា ឆ្នាំ ២០២០ ក្នុងបំណងដើម្បីសម្រេចបាន និងជំរុញឆ្ពោះទៅរកកំណើនប្រកួតប្រជែងទាក់ទងនឹងពាណិជ្ជកម្ម និងសេដ្ឋកិច្ច៕ LA
