The Phnom Penh Post Search

Search form




Logo of Phnom Penh Post newspaper Phnom Penh Post - KOICA ផ្តល់ $២,៥ លាន​អភិវឌ្ឍ​ផ្សារ​មូលបត្រ​កម្ពុជា

KOICA ផ្តល់ $២,៥ លាន​អភិវឌ្ឍ​ផ្សារ​មូលបត្រ​កម្ពុជា

KOICA ផ្តល់ $២,៥ លាន​អភិវឌ្ឍ​ផ្សារ​មូលបត្រ​កម្ពុជា

20140224_12
បន្ទប់ជួញដូរភាគហ៊ុនរបស់ផ្សារហ៊ុនកម្ពុជាដែលស្ថិតនៅអគារកាណាឌីយ៉ា ហុង មិនា

ភ្នំពេញៈ រដ្ឋាភិបាល​សាធារណរដ្ឋ​កូរ៉េ​ខាង​ត្បួង​តាមរយៈ​ទីភ្នាក់ងារ​សហប្រតិបត្តិការ​អន្តរជាតិ​កូរ៉េ (KOICA​) បាន​ផ្តល់​ហិរញ្ញប្បទាន​ឥត​សំណង​ចំនួន​២,៥ លាន​ដុល្លារអាមេរិក ដល់​កម្ពុជា​សម្រាប់​អភិវឌ្ឍ​ទីផ្សារ​មូលបត្រ​នៅ​កម្ពុជា និង​ធ្វើការ​ទាក់ទាញ​ក្រុមហ៊ុន​ឯកជន​ឲ្យ​ធ្វើការ​បោះ​ផ្សាយ​មូលបត្រ ដំបូង​កាន់តែ​ច្រើន​ឡើង ។

ហិរញ្ញប្បទាន​នេះ​ត្រូវ បាន​ចុះ​ហត្ថលេខា​ដោយ លោកស្រី ងួន សុខា រដ្ឋលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ និង លោកស្រី KAEK Sook Hee តំណាង​ទីភ្នាក់ងារ KOICA ប្រចាំ​នៅ​កម្ពុជា នៅ​ទីស្តីការ​ក្រសួង​សេដ្ឋកិច្ច និង​ហិរញ្ញវត្ថុ នា​ថ្ងៃ​ទី ២១ ខែ​កុម្ភៈ ឆ្នាំ ២០១៤ ហើយ​នេះ ជា​ហិរញ្ញប្បទាន​លើក​ទី​ពីរ​ហើយ​ដែល KOICA បាន​ផ្តល់​មក​ឲ្យ​កម្ពុជា​ដើម្បី​យក​មក​អភិវឌ្ឍវិស័យ​នេះ ដោយ​លើក​ទី​១ ទីភ្នាក់ងារ​នេះ​បាន​ផ្តល់​ជំនួយ​ឥត​សំណង​ក្នុង​ទំហំ​ទឹកប្រាក់​ចំនួន ១,២​លាន​ដុល្លារអាមេរិក ក្នុង​ការ​អនុវត្ត​គម្រោង​ដើម្បី​បង្កើត​ទីផ្សារ​មូលបត្រ​កម្ពុជា រយៈពេល​៣​ឆ្នាំ ចាប់ពី​ឆ្នាំ ២០០៧ ដល់​ឆ្នាំ ២០០៩​។

លោកស្រី ងួន សុខា មាន​ប្រសាសន៍​ថា ប្រតិបត្តិការ និង​សកម្មភាព​នៃ​ទីផ្សារ​មូលបត្រ​នៅ​កម្ពុជា នឹង​រីកចម្រើន​នៅក្នុង​រយៈពេល​ដ៏​ខ្លី ហើយ​ជំនួយ​នេះ​នឹង​ចូលរួម​អភិវឌ្ឍ​សេដ្ឋកិច្ច និង​សង្គម​នៅ​កម្ពុជា​ប្រកប​ដោយ​ចីរភាព​។

លោកស្រី​មាន​ប្រសាសន៍ ថា​៖​«​យើង​មាន​ជំនឿ​យ៉ាង​មុតមាំ​ថា ជំនួយ​នេះ​នឹង​អាច​បង្កើន​នូវ​ចំណេះដឹង និង​ជំនាញ​របស់​អ្នក​ចូលរួម​ពាក់ព័ន្ធ​នៅក្នុង​ការ​គ្រប់គ្រង និង​ប្រតិបត្តិការ​ទីផ្សារ​មូលបត្រ​។ លើស​ពី​នេះ​ទៅ ទៀត​យើង​អាច​ពង្រីក​ប្រព័ន្ធ​ទីផ្សារ​ទាំង​មូល ជាពិសេស​ប្រព័ន្ធ​ព័ត៌មានវិទ្យា និង​ក្របខ័ណ្ឌ​បទប្បញ្ញត្តិ​ក្នុង​ទីផ្សារ​មូលបត្រ»​។

លោកស្រី KAEK​Sook​Hee មាន​ប្រសាសន៍​ថា ការ​ផ្តល់​ជំនួយ​ឥត​សំណង​នេះ​ឆ្លើយតប​ទៅ​នឹង​តម្រូវការ​ជាក់ស្តែង របស់​កម្ពុជា​ក្នុង​ការ​អភិវឌ្ឍ​វិស័យ​មូលបត្រ​របស់​ខ្លួន​។

លោកស្រី​បញ្ជាក់​ថា គោលបំណង​សំខាន់ៗ​របស់​គម្រោង​រួមមាន ការសិក្សា និង​បង្កើត​ក្របខ័ណ្ឌ​លើក​ទឹកចិត្ត​សម្រាប់​បោះ​ផ្សាយ​មូលបត្រ​លក់​ជា លើក​ដំបូង ការ​សិក្សា​ពិនិត្យ​ឡើង​វិញ​លើ​ក្របខ័ណ្ឌ​បទប្បញ្ញត្តិ​ពាក់ព័ន្ធ​វិស័យ មូលបត្រ ការ​លើក​កម្ពស់​សមត្ថភាព​ធនធាន​មនុស្ស និង​ការ​សិក្សា​អំពី​ការ​អភិវឌ្ឍ​ប្រព័ន្ធ​ព័ត៌មានវិទ្យា​សម្រាប់​គណៈកម្ម ការ​មូលបត្រ​កម្ពុជា និង​ផ្សារ​មូលបត្រ​កម្ពុជា​។

ផ្សារ​មូលបត្រ កម្ពុជា (CSX) គឺជា​ការ​វិនិយោគ​រួម​គ្នា​រវាង​រដ្ឋាភិបាល​កម្ពុជា​ដែល​កាន់កាប់ ភាគហ៊ុន​៥៥​ភាគរយ​និង​ក្រុមហ៊ុន​ផ្សារ​មូលបត្រ​កូរ៉េ​ដែល​កាន់កាប់ ៤៥​ភាគរយ ហើយ​ត្រូវ​បាន​សម្ពោធ​ដំណើរការ​កាលពី​ដើម​ឆ្នាំ​២០១២ ដែល​រហូត​មក​ដល់​ពេល​នេះ​មាន​តែ​ក្រុមហ៊ុន​រដ្ឋ​តែ​មួយ​គត់​គឺ​រដ្ឋាករ ទឹកស្វ័យត​ក្រុង​ភ្នំពេញ​។

ផ្សារហ៊ុន​នេះ​ត្រូវ​បាន​គេ​រំពឹង​ថា អាច​នឹង​មាន​រោងចក្រ​តៃវ៉ាន់​មួយ​ទៀត​គឺ Grand Twin International ដែល​គ្រោង​នឹង​ធ្វើការ​បោះផ្សាយ​មូលបត្រ​ដំបូង​(IPO) នៅពេល​ឆាប់ៗ​ខាង​មុខ​នេះ​ផង​ដែរ​។

ចំពោះ​តម្លៃ​ហ៊ុន​របស់ រដ្ឋាករទឹក​ស្វយ័ត​រាជធានី​ភ្នំពេញ គឺ លក់​ក្នុង​តម្លៃ​៥​០០០ រៀល​ក្នុង​មួយហ៊ុន ក្នុង​ការ​ជួញដូរ កាលពី​ថ្ងៃ​សុក្រ​សប្តាហ៍​មុន ដែល​មាន​ទំហំ​នៃ​ការ​ជួញដូរ​ចំនួន ៧៨ ហ៊ុន​។ នេះ​បើ​យោង​តាម​តារាង​ជួញដូរ​របស់ CSX​៕

អត្ថបទគួរចាប់អារម្មណ៍