.jpg)
កម្មករកំពុងប្រមូលផលម្រេចដែលដាំដុះក្នុងតំបន់សម្គាល់ភូមិសាស្ត្រ។ រូបថត សហការី
ភ្នំពេញ: យ៉ាងហោចណាស់កសិករជិត ៧០ គ្រួសារដែលជាសមាជិករបស់សមាគមលើកកម្ពស់ម្រេចកំពត (KPPA) ដែលចុះបញ្ជីដំបូងបំផុតផលិតផលិតផលសម្គាល់ភូមិសាស្ត្រកាលពីឆ្នាំ ២០១០ នោះបានសម្រេចចិត្តដកខ្លួនពីសមាគមដ៏ល្បីមួយនេះ ដោយសារបញ្ហាទីផ្សារម្រេចកំពតនៅតូចចង្អៀត។
លោក ងួន ឡាយ ប្រធាន KPPA បានអះអាងថា គិតមកដល់ពេលនេះ សមាជិកសមាគមលើកកម្ពស់ម្រេចកំពតចំនួន ៦៨ គ្រួសារ ក្នុងចំណោម ៤៤៧ គ្រួសារ បានលាឈប់ពីសមាជិកភាពដែលចំនួនស្មើនឹង ៤០ ភាគរយនៃផ្ទៃដីដាំដុះសរុប ២៩០ ហិកតា។
លោកនិយាយថា៖ «ឆ្នាំនេះយើងឃើញមានកសិករជាច្រើនបានសុំលាលែងពីសមាគមយើង។ គាត់សុំចេញពីយើងស្របពេលដែលដើមម្រេចរបស់គាត់ងាប់ដោយសារខ្វះបច្ចេកទេសថែទាំ ហើយវាទន្ទឹមនឹងទីផ្សារតូចចង្អៀត»។
លោកបន្ថែមថា ទោះបីមានការដកខ្លួនរបស់សមាជិកទាំងនេះនឹងមិនប៉ះពាល់ដល់ការផ្គត់ផ្គង់ផលិតផលម្រេចកំពតនៅលើទីផ្សារអន្តរជាតិដែលមានស្រាប់នោះទេ ព្រោះម្រេចផលិតបានលើសតម្រូវការជារៀងរាល់ឆ្នាំដែលប្រមូលផលបានជាង ១០០ តោន ខណៈតម្រូវការទីផ្សារអន្តរជាតិក្នុងរង្វង់ ៧០ តោនប៉ុណ្ណោះ ក្នុង ១ ឆ្នាំៗ។ ទីផ្សារអឺរ៉ុប និងអាមេរិកនៅតែជាទីផ្សារធំជាងគេសម្រាប់ម្រេចកំពត។
លោកថ្លែងថា៖ «វាមិនប៉ះពាល់ដល់ការផ្គត់ផ្គង់អ្វីនោះទេ។ ការពិតផលិតផលយើងនៅតែលើសតម្រូវការទីផ្សារដែលមានជារៀងរាល់ឆ្នាំ។ យើងកំពុងខិតខំប្រឹងប្រែងរកទីផ្សារថ្មីបន្ថែមទៀតដូចជានៅប្រទេសកូរ៉េខាងត្បូង ជប៉ុន ទីក្រុងហុងកុង និងកោះតៃវ៉ាន់»។
លោក ងួន ឡាយ មានសុទិដ្ឋិនិយមថា ម្រេចកំពតនឹងមានទីផ្សារល្អឡើងវិញចាប់ពីឆ្នាំក្រោយតទៅស្របពេលក្រុមហ៊ុន EU Land and Investment Co. បានសន្យាបង្កើនការបញ្ជាទិញម្រេចកំពតបន្ថែមទៀត។
បើតាមប្រធានសមាគមរូបនេះនៅដើមខែវិច្ឆិកានេះ ក្រុមហ៊ុននេះបានបញ្ជាទិញម្រេចកំពតចំនួន ២ តោនរួចហើយ ដើម្បីនាំចេញទៅកាន់ទីផ្សារប្រទេសឆែកនៅតំបន់អឺរ៉ុប។
លោកបញ្ជាក់ថា៖ «យើងឃើញថារហូតមកដល់ពេលនេះមានគេបញ្ជាទិញម្រេចសម្រាប់ត្រៀមឆ្នាំ ២០២១ ជាច្រើនតោនហើយយើងសង្ឃឹមថាទីផ្សារម្រេចនឹងធំទូលាយឡើងវិញ»។
ទិន្នផលម្រេចចំនួនជាង ៤ ១២១ តោនរួមទាំងម្រេចកំពតផង ត្រូវបាននាំចេញទៅកាន់តែទីផ្សារអន្តរជាតិក្នុងរយៈពេល ៩ ខែដើមឆ្នាំ ២០២០ នេះដោយមានកំណើនជាង ២១ ភាគរយធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមការអះអាងរបស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
កម្ពុជានាំចេញម្រេចសម្គាល់ភូមិសាស្ត្រ (GI) និងនៅក្រៅតំបន់សម្គាល់ភូមិសាស្ត្រក្នុងអំឡុងពេលនេះទៅកាន់ទីផ្សារអន្តរជាតិយ៉ាងហោច ២១ ប្រទេសនៅតំបន់អាស៊ី អឺរ៉ុប និង អាមេរិក។
បើតាមលោក ងួន ឡាយ គិតត្រឹមខែតុលា ម្រេចកំពតបានលក់ចេញក្នុងរង្វង់ ៥០ តោន ខណៈម្រេចនៅក្នុងស្តុកប្រមាណជិត ១០០ តោន ដោយម្រេចខ្មៅថ្លៃ ១៥ ដុល្លារ ម្រេចក្រហមថ្លៃ ២៥ ដុល្លារ និងម្រេចសថ្លៃ ២៨ ដុល្លារនៅក្នុង ១ គីឡូក្រាមដូចគ្នា។
កាលពីឆ្នាំ ២០១៩ ការនាំចេញម្រេចពីសមាគមលើកកម្ពស់ម្រេចកំពត សម្រេចបានចំនួន ៧៨ តោន នៃទិន្នផលសរុប ១២០ តោន៕ LA
