The Phnom Penh Post Search

Search form

Logo of Phnom Penh Post newspaper Phnom Penh Post - KrisEnergy គ្រប់​គ្រង​ភាគ​ហ៊ុន Chevron

KrisEnergy គ្រប់​គ្រង​ភាគ​ហ៊ុន Chevron

អតិថិជន​កំពុង​ចាក់​សាំង​នៅ​ស្ថានីយ​ប្រេង Chevron មួយ​នៅ​អាមេរិក។ B.g
អតិថិជន​កំពុង​ចាក់​សាំង​នៅ​ស្ថានីយ​ប្រេង Chevron មួយ​នៅ​អាមេរិក។ B.g

KrisEnergy គ្រប់​គ្រង​ភាគ​ហ៊ុន Chevron

ភ្នំពេញៈ ក្រុម​ហ៊ុន KrisEnergy Ltd (KrisEnergy) របស់ សិង្ហបុរី បាន​ប្រកាស​កាល​ពី​ម្សិល​មិញ​ថា បាន​បញ្ចប់​ការ​ទិញ​ភាគ​ហ៊ុន Chevron ក្នុង​ប្លុក A នៅ​កម្ពុជា​ហើយ។

កិច្ច​ព្រម​ព្រៀង​នេះ​ត្រូវ​បាន​បញ្ចប់​កាល​ពី​ថ្ងៃ ទី១ ខែ​តុលា រវាង​ក្រុម​ហ៊ុន Chevron Overseas Petroleum (Cambodia) Limited (COPCL) ជា​បុត្រ​សម្ព័ន្ឋ​របស់​ក្រុម​ហ៊ុន Chevron Corp របស់​អាមេរិក និង Kris Energy។

រដ្ឋាភិបាល​កម្ពុជា បាន​ទទួល​ស្គាល់​ពី​ការ​ផ្លាស់​ប្តូរ​ការ​គ្រប់​គ្រង​ប្រេង​ក្នុង​ប្លុក A កាល​ពី​ថ្ងៃ ទី១៧ ខែ​កញ្ញា។

ក្រុម​ហ៊ុន KrisEnergy បាន​ចុះ​កិច្ច​ព្រម​ព្រៀង​ទិញ​ភាគ​ហ៊ុន​នេះ​ពី COPCL ក្នុង​តម្លៃ ៦៥ លាន​ដុល្លារ​អាមេរិក កាល​ពី​ថ្ងៃ ទី១១ ខែ​សីហា។

យោង​តាម​សេចក្ដី​ប្រកាស​ព័ត៌មាន​បាន​ពី​ក្រុម​ហ៊ុន KrisEnergy កាល​ពី​ថ្ងៃ​ព្រហស្បត្តិ៍​បាន​ឲ្យ​ដឹង​ថា ក្រុម​ហ៊ុន COPCL ដែល​កាន់​កាប់​ភាគ​ហ៊ុន ៣០ ភាគ​រយ​ក្នុង​ដំណើរការ​អាជីវកម្ម និង​ជា​ប្រតិបត្តិករ​នៅ​ក្នុង​ប្លុក A នឹង​ត្រូវ​ស្ថិត​ក្រោម​ការ​គ្រប់​គ្រង​របស់ Kris Energy (Asia) Ltd ទាំង​មូល។

ស្ថិត​ក្រោម​កិច្ច​ព្រម​ព្រៀង​នេះ​វា​នឹង​ត្រូវ​បាន​ធ្វើ​ការ​ផ្លាស់​ប្តូរ​ឈ្មោះ​ទៅ​ជា​ក្រុម​ហ៊ុន Kris Energy (Apsara) Ltd។ មុន​ពេល​ការ​បញ្ចប់​ការ​ទិញ​នេះ​ក្រុម​ហ៊ុន Kris Energy កាន់​កាប់​ភាគ​ហ៊ុន​មិន​ផ្ទាល់ ២៥ ភាគ​រយ​ក្នុង​ប្រតិបត្តិការ​នៅ Block A ប៉ុន្តែ​ពេល​នេះ​កាន់​កាប់​ភាគ​ហ៊ុន​សរុប ៥៥ ភាគ​រយ​ក្នុង​ការ​រុក​រក​ប្រេង និង​ឧស្ម័ន​ក្នុង​ប្លុក A នេះ។

អាជ្ញាធរ​ប្រេង​កាត​ជាតិ​កម្ពុជា មាន​បំណង​អនុវត្ត​សិទ្ធិ​របស់​ខ្លួន​ក្នុង​ការ​ទិញ​យក​ភាគ​ហ៊ុន ៥ ភាគ​រយ​នៅ​ក្នុង​ប្លុក​នេះ ដែល​នៅ​ពេល​បញ្ចប់​នៃ​គម្រោង​នឹង​កាត់​បន្ថយ​ភាគ​ហ៊ុន​របស់ Kris Energy មក​នៅ​ត្រឹម ៥២,២៥ ភាគ​រយ។ ដៃគូ​វិនិយោគ​រួម​គ្នា​រួម​មាន​ក្រុម​ហ៊ុន MOECO និង​ក្រុម​ហ៊ុន GS Energy បាន​យល់​ព្រម​លើ​ការ​ទិញ​ភាគ​ហ៊ុន​របស់​ក្រុម​ហ៊ុន Kris Energy។ នេះ​បើ​តាម​សេចក្តី​ប្រកាស​ព័ត៌មាន​នេះ។

ប្រធាន​ប្រតិបត្តិ និង​ជា​ប្រធាន​ផ្នែក​អភិវឌ្ឍន៍​ពាណិជ្ជ​កម្ម​របស់ Kris Energy លោក Richard Lorentz បាន​ថ្លែង​ថា៖ «ក្រុមហ៊ុន Kris Energy សម្រេច​បាន​ជោគ​ជ័យ​សំខាន់ៗ​ជាច្រើន​នៅ​ក្នុង​ប្រវត្តិសាស្ដ្រ​រយៈ​ពេល ៥​ឆ្នាំ របស់​ខ្លួន ប៉ុន្តែ​ការ​ទទួល​បាន​ភាព​ជា​ប្រតិបត្តិករ​ក្នុង​ប្លុក A នេះ​ជា​ការ​បោះ​ជំហាន​ថ្មី​នៅ​ក្នុង​សកម្មភាព​ទាំង​ឡាយ​របស់​យើង។ ចំពោះ​ការ​អភិវឌ្ឍ​នេះ គឺជា​អ្វី ដែល​យើង​ជឿ​ជាក់​ថា ជា​ប្រភព​ធន​ធាន​ប្រេង​ដ៏​សំខាន់​នៅ​ក្នុង​ទីតាំង​នេះ​នឹង​ជា​គម្រោង​ចម្បង​របស់​ក្រុម​ហ៊ុន ព្រម​ទាំង​សម្រាប់​ប្រទេស​កម្ពុជា។ យើង​អរគុណ​ដល់​រដ្ឋាភិបាល​សម្រាប់​ការ​ទទួល​ស្គាល់​យ៉ាង​រហ័ស​នៃ​ការ​ផ្លាស់​ប្តូរ​លើ​ការ​គ្រប់​គ្រង​នេះ ហើយ​ពេល​នេះ​យើង​នឹង​ធ្វើ​ការងារ​ជាមួយ​ដៃគូ​របស់​យើង​ដើម្បី​ដាក់​ជូន​ផែនការ​អភិវឌ្ឍ​ដែល​បាន​កែ​លម្អ​រួច​នេះ​ក្នុង​ការ​ធ្វើ​ឲ្យ​តំបន់​អណ្ដូង​ប្រេង​អប្សរា (Apsara) ក្លាយ​ជា​ការ​ពិត​បាន​ឆាប់ៗ និង​មាន​ប្រសិទ្ធភាព​ឲ្យ​បាន​លឿន​តាម​ដែល​អាច​ធ្វើ​ទៅ​បាន និង​ការ​ចាប់​ផ្ដើម​ដាក់ កម្ពុជា ជា​ប្រទេស​ផលិត​ប្រេង​មួយ»។

លោក សុខា វ៉ាន់ អគ្គ​នាយក​អាជ្ញាធរ​ប្រេង​កាត​ជាតិ​កម្ពុជា បាន​បដិសេធ​មិន​ធ្វើ​អត្ថាធិប្បាយ​ទេ កាល​ពី​ថ្ងៃ​ព្រហស្បត្តិ៍​អំពី​បញ្ហា​នេះ។

ក្រុម​ហ៊ុន Chevron Cambodia បាន​ចំណាយ​ពេល​ជាង​មួយ​ទសវត្សរ៍​ក្នុង​ការ​សិក្សា​ពី​លទ្ធភាព​រុក​រក ប្រេង និង​ឧស្ម័ន​នៅ​ប្លុក A ដែល​មាន​ទំហំ​សរុប ៤ ៧០៩ គីឡូម៉ែត្រ​ការ៉េ ហើយ​ក្រុម​ហ៊ុន​នេះ​មាន​ភាគ​ហ៊ុន ៣០ ភាគ​រយ​ដោយ​បាន​ចំណាយ​ជាង ១៦០ លាន​ដុល្លារ​ក្នុង​ការ​សិក្សា​ពី​លទ្ធភាព​រុករក​ប្រេង​ក្នុង​ប្លុក A។

ដំបូង​រដ្ឋាភិបាល​កម្ពុជា បាន​កំណត់​ថា នឹង​ទទួល​បាន​ដំណក់​ប្រេង​ដំបូង​របស់​ខ្លួន​ពី​ប្លុក A នេះ​នៅ​ម៉ោង ១២ ថ្ងៃ ទី១២ ខែ​១២ ឆ្នាំ​២០១២ ប៉ុន្តែ​ក្តី​ស្រមៃ​នេះ​ត្រូវ​បាន​រលាយ​សាប​សូន្យ​ដោយ​សារ​បញ្ហា​បច្ចេកទេស​មួយ​ចំនួន​ដែល​ទាក់ទង​នឹង​ច្បាប់ និង​បទ​ប្បញ្ញត្តិ​ក្នុង​ការ​គ្រប់​គ្រង។ មន្ត្រី​ពី​ក្រសួង​រ៉ែ និង​ថាមពល ធ្លាប់​បាន​ប្រាប់ ភ្នំពេញ ប៉ុស្តិ៍ កន្លង​មក​ថា ដំណក់​ប្រេង​ដំបូង​នឹង​រំពឹង​ថា អាច​កើត​មាន​នៅ ឆ្នាំ​២០១៦។

តាម​សេចក្តី​ប្រកាស​ព័ត៌មាន​របស់ KrisEnergy ប្លុក A អាច​មាន​លទ្ធភាព​ទាញ​យក​ប្រេង​បាន​ប្រមាណ ១ ម៉ឺន​បារ៉ែល​ក្នុង​មួយ​ថ្ងៃ៕

អត្ថបទគួរចាប់អារម្មណ៍