ភ្នំពេញៈ ក្រុមហ៊ុនប្រេង KrisEnergy របស់សិង្ហបុរីបានចាប់ផ្ដើមសាងសង់ផ្លាតហ្វមក្បាលអណ្តូងផលិតកម្មខ្នាតតូច (មីនីផ្លាតហ្វូម) នៅតំបន់ប្រេងអប្សរា ក្នុងប្លុក A ដែនសមុទ្រកម្ពុជាដែលបង្ហាញពីជំហានវិជ្ជមានឆ្ពោះទៅរកទិសដៅរបស់ក្រុមហ៊ុនដើម្បីទាញយកតំណក់ប្រេងដំបូងនៅពាក់កណ្ដាលឆ្នាំ ២០២០។
ពិធីនេះត្រូវបានធ្វើឡើងនៅទីតាំងរបស់ក្រុមហ៊ុនឥណ្ឌូនេស៊ី PT Profab1 ដែលទទួលបានកិច្ចសន្យាផ្គត់ផ្គង់សម្ភារសាងសង់ក្បាលអណ្តូងនៅលើកោះ Batan ប្រទេស ឥណ្ឌូនេស៊ី ដែលមានការចូលរួមពីមន្ត្រីពាក់ព័ន្ធរបស់រដ្ឋាភិបាលកម្ពុជារួមទាំងលោក ម៉េង សក្ដិធារ៉ា រដ្ឋលេខាធិការក្រសួងរ៉ែ និងថាមពល និងមន្ត្រីរបស់ក្រុមហ៊ុនដូចជាលោក Kelin Tang នាយកប្រតិបត្តិ និងជាប្រធានក្រុមហ៊ុន KrisEnergy ប្រចាំកម្ពុជាលោក Brian Helyer នាយករងផ្នែកប្រតិបត្តិ។ នេះបើយោងតាមសេចក្ដីប្រកាសរបស់ក្រុមហ៊ុនដែលភ្នំពេញប៉ុស្ដិ៍ ទទួលបានកាលពីថ្ងៃចន្ទ។
លោក ម៉េង សក្ដិធារ៉ា បានឲ្យដឹងថា ពិធីដែលត្រូវបានធ្វើឡើងកាលពីសប្ដាហ៍មុននេះបង្ហាញជំហានដ៏សំខាន់មួយ និងការរីកចម្រើនដ៏ល្អនៃឧស្សាហកម្មប្រេងរបស់កម្ពុជាដែលក្រុមហ៊ុន KrisEnergy បានប្ដេជ្ញាអភិវឌ្ឍគម្រោងនេះ។
លោក សក្ដិធារ៉ា ត្រូវបានដកស្រង់សម្ដី ខណៈលោកថ្លែងថា៖ «ថ្ងៃនេះគឺជាការបោះជំហានដ៏ធំមួយក្នុងការអភិវឌ្ឍតំបន់ប្រេងអប្សរា។ យើងសូមអបអរសាទរដល់ KrisEnergy ចំពោះវឌ្ឍនភាពរបស់ក្រុមហ៊ុន មិនត្រឹមតែទៅលើមីនីផ្លាតហ្វមប៉ុណ្ណោះទេ ប៉ុន្តែក៏ទៅលើនាវាផលិតកម្ម Ingenium II ក្នុងប្រទេសសិង្ហបុរីផងដែរ»។
លោកបន្ថែមថា៖ «ការផលិតតំណក់ប្រេងដំបូងរបស់កម្ពុជានៅក្នុងដែនសមុទ្ររបស់យើងនឹងក្លាយជាជំហានដ៏សំខាន់មួយឆ្ពោះទៅកាន់ការអភិវឌ្ឍសេដ្ឋកិច្ច និងវិបុលភាពជាតិដែលស្របទៅតាមគោលដៅអភិវឌ្ឍន៍សំខាន់ៗរបស់រដ្ឋាភិបាលកម្ពុជា»។
លោក Kelin Tang បានឲ្យដឹងថា ការសាងសង់ផ្លាតហ្វមបូមប្រេងលើកដំបូង ជាកិច្ចខិតខំប្រឹងប្រែងរបស់ក្រុមហ៊ុនក្នុងការអភិវឌ្ឍតំបន់អប្សារា និងជាជំហានឆ្ពោះទៅរកការសម្រេចបានតាមទិសដៅនៃការទាញយកប្រេងក្នុងឆ្នាំ ២០២០។
លោកថ្លែងថា៖ «យើងសូមស្វាគមន៍ភ្ញៀវកិត្តិយសមកពីរដ្ឋាភិបាលកម្ពុជាដែលអញ្ជើញមកដល់កោះ Batam ដើម្បីធ្វើជាសាក្សីចំពោះពិធីបើកការសាងសង់ផ្លាតហ្វមបូមប្រេង ខណៈយើងកំពុងបន្តអភិវឌ្ឍសកម្មភាពការងារសំខាន់ៗជាច្រើនទៀត។ ពិធីនេះបង្ហាញថា បន្ទាប់ពីការធ្វើផែនការអស់រយៈពេលជាច្រើនឆ្នាំ ការសាងសង់រចនាសម្ព័ន្ធដ៏សំខាន់នេះកំពុងតែដំណើរការទៅមុខ»។
លោកបន្តថា៖ «ទោះបីយ៉ាងណាយើងក៏មិនត្រូវភ្លេចដែរថា មានការងារជាច្រើនផ្សេងទៀតត្រូវបាននិងកំពុងដំណើរការសម្រាប់ការអភិវឌ្ឍតំបន់អប្សរា។ ស្របពេលដែលយើងបានធ្វើឲ្យប្រសើរឡើងនៃនាវាផលិតកម្ម យើងក៏បានបញ្ចប់ការធ្វើ 3D ស៊ីស្មីកលើទំហំផ្ទៃដី ១.២០០ គីឡូម៉ែត្រការ៉េ និងការធ្វើអង្កេតរូបភូគព្ភសាស្ត្រនៅទីតាំងរបស់ផ្លាតហ្វមនេះផងដែរ»។
តំបន់ប្រេងអប្សរាក្នុងប្លុក A របស់កម្ពុជាលាតសន្ធឹងលើបាសាំងខ្មែរដែលជាបាសាំងភូគព្ភសាស្ដ្រមិនទាន់ត្រូវបានផលិតស្ថិតក្នុងដែនសមុទ្រកម្ពុជានៃឈូងសមុទ្រថៃ។ ដោយសារតែលទ្ធភាពផលិតកម្មមិនទាន់មានការបញ្ជាក់ច្បាស់នៅបាសាំងនេះ ការអភិវឌ្ឍតំបន់ប្រេងអប្សរានឹងត្រូវធ្វើឡើងជាដំណាក់កាលជាច្រើន ដើម្បីកាត់បន្ថយហានិភ័យ និងផ្ដល់ពេលវេលាសម្រាប់ការប្រមូល និងវិភាគទិន្នន័យសំខាន់ៗដើម្បីអនុវត្តក្នុងដំណាក់កាលនានានៅពេលអនាគត។
ក្រុមហ៊ុន KrisEnergy បានឲ្យដឹងថា៖ «ដំណាក់កាលអភិវឌ្ឍ Mini Phase 1A នេះរួមមានមីនីផ្លាតហ្វម និងអណ្ដូងអភិវឌ្ឍដំបូងចំនួន ៥ ដែលត្រូវបានភ្ជាប់ទៅកាន់នាវាផលិតកម្ម Ingenium II សម្រាប់ដំណើរការប្រព្រឹត្តិកម្ម ប្រេង ឧស្ម័ន និងទឹក។ នាវាដឹកប្រេងនឹងដឹកប្រេងឆៅពីនាវាផលិតកម្ម»។
ក្រុមហ៊ុនឲ្យដឹងទៀតថា ប្រេងតំបន់អប្សរាគ្រោងនឹងផលិតនៅឆមាសទី ១ ឆ្នាំ២០២០ ហើយតំបន់នេះត្រូវបានរំពឹងថា នឹងឈានដល់អត្រាផលិតកម្មខ្ពស់បំផុត ៧.៥០០ បារ៉ែលក្នុង ១ ថ្ងៃ៕ LA