ភ្នំពេញៈ ក្រុមហ៊ុនរុករកប្រេង KrisEnergy ដែលទទួលសិទ្ធិទាញយកប្រេងនៅតំបន់អប្សរាក្នុងប្លុក A របស់កម្ពុជាកំពុងត្រួតពិនិត្យពាក្យស្នើពីក្រុមហ៊ុនជាច្រើនដើម្បីដេញថ្លៃផ្តល់សេវាបន្តលើគម្រោងខួងបូមប្រេង និងសាងសង់ផ្លេតហ្វមធ្វើផលិតកម្មប្រេង បន្ទាប់ពីបានបិទការទទួលពាក្យកាលពីចុងខែកក្កដា។ នេះបើតាមសេចក្តីជូនដំណឹងរបស់ក្រុមហ៊ុន។
នីតិវិធីនេះឆ្លុះបញ្ចាំងពីការប្ដេជ្ញាចិត្តពីក្រុមហ៊ុន KrisEnergy ក្នុងការអនុវត្តតាមផែនការរវាងក្រុមហ៊ុន និងរដ្ឋាភិបាលកម្ពុជាក្នុងការទាញយកប្រេងលើកដំបូងនៅចុងឆ្នាំ ២០១៩។
លោក ជៀប សួរ អ្នកនាំពាក្យក្រសួងរ៉ែ និងថាមពលបានថ្លែងថា ការរីកចម្រើននេះបានធ្វើឲ្យក្រុមហ៊ុនឈានមួយជំហានកាន់តែជិតនឹងការទាញយកប្រេង បន្ទាប់ពីខ្លួនបានចុះកិច្ចព្រមព្រៀងជាផ្លូវការលើការចែករំលែកប្រាក់ចំណូលប្រេងជាមួយរដ្ឋាភិបាលកម្ពុជាកាលពីខែសីហា ឆ្នាំមុន។ បន្ទាប់ពីការត្រួតពិនិត្យ និងការជ្រើសរើសក្រុមហ៊ុនម៉ៅការបន្តលោក សួរ បានថ្លែងថាក្រុមហ៊ុន KrisEnergy នឹងជូនដំណឹងដល់អាជ្ញាធរកម្ពុជាសម្រាប់ការយល់ព្រម។
លោកថ្លែងថា៖ «ការវិវឌ្ឍនេះបង្ហាញពីភាពកាន់តែច្បាស់លាស់ថែមទៀត ថាគាត់កំពុងដើរតាមផែនការ ហើយដើរឆ្ពោះទៅរកកាលបរិច្ឆេទចុងក្រោយដែលបានឯកភាពគ្នាថានឹងចាប់ផ្តើមផលិតប្រេងដំបូងនៅចុងឆ្នាំ ២០១៩»។
សេចក្ដីប្រកាសព័ត៌មានរបស់ក្រុមហ៊ុន KrisEnergy បង្ហាញថាការប្រកាសដាក់ដេញថ្លៃត្រូវបានបើកនៅត្រីមាសទី ២ ឆ្នាំ ២០១៨ សម្រាប់សេវាខួងបូមប្រេង និងសាងសង់ផ្លេតហ្វមធ្វើផលិតកម្មប្រេង វិស្វកម្មលទ្ធកម្មការសាងសង់ ការដំឡើង និងការជ្រើសរើស។ ការដេញថ្លៃទាំង ២ បានបញ្ចប់ពីខែកក្កដា។
ក្រុមហ៊ុន KrisEnergy បានចូលមកក្នុងប្លុក A កាលពីឆ្នាំ ២០១០ ហើយបានទិញយកភាគហ៊ុន Chevron ក្នុងតម្លៃ ៦៥ លានដុល្លារនៅក្នុងប្លុក A កាលពីឆ្នាំ ២០១៤ ដែលធ្វើឲ្យក្រុមហ៊ុននេះកាន់កាប់ភាគហ៊ុនស្ទើរតែទាំងអស់ក្នុងប្លុកនេះ។ ក្រុមហ៊ុន KrisEnergy កាន់កាប់ ៩៥ ភាគរយនៃអណ្ដូងប្រេងអប្សារា នៅប្លុក A ខណៈរដ្ឋាភិបាលកម្ពុជាកាន់កាប់ភាគហ៊ុននៅសល់ ៥ ភាគរយ។
លោក អូន ព័ន្ធមុនីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុបញ្ជាក់កាលពីខែសីហាឆ្នាំមុនថា ប្លុក A ត្រូវបានជឿជាក់ថានឹងមានប្រេងប្រហែល ៣០ លានបារ៉ែលដែលនឹងត្រូវបានទាញយកក្នុងរយៈពេល ៩ ឆ្នាំ។ ខណៈតម្លៃប្រេងឆៅលើទីផ្សារអន្តរជាតិនៅពេលនោះប្រហែល ៥០ ដុល្លារក្នុងមួយបារ៉ែល រដ្ឋាភិបាលរំពឹងថានឹងរកបានប្រាក់ចំណូលសរុប ៥០០ លានដុល្លារពីសួយសារអាករ និងពន្ធលើរយៈពេលដំណើរការរបស់គម្រោងនេះ៕LA