ក្រុងញូវយ៉កៈ ក្រុមហ៊ុនផលិតខោខូវប៊យ Levi Strauss & Co (Levi''s) របស់សហរដ្ឋអាមេរិក កាលពីថ្ងៃពុធបានប្រកាសពីការកំណត់តម្លៃភាគហ៊ុន មុនពេលវិលត្រឡប់ទៅរកការជួញដូរឡើងវិញនៅតំបន់ហិរញ្ញវត្ថុ Wall Street បន្ទាប់ពីដកខ្លួនជាង ៣០ ឆ្នាំ ដែលអាចឲ្យក្រុមហ៊ុនប្រមូលប្រាក់បាន ៦២៣ លានដុល្លារ ដែលជាបរិមាណលើសពីការរំពឹងទុក។
ក្រុមហ៊ុនផលិតខោខូវប៊យម៉ាកដ៏ល្បីដែលភាគហ៊ុនរបស់ខ្លួនគ្រោងនឹងចាប់ផ្តើមជួញដូរនៅថ្ងៃព្រហស្បតិ៍ម្សិលមិញ (ថ្ងៃនៅអាមេរិក) នៅលើផ្សារហ៊ុនក្រុងញូវយ៉កនេះ បានឲ្យដឹងថា ក្រុមហ៊ុននឹងកំណត់តម្លៃបឋមចំនួន ១៧ ដុល្លារក្នុង ១ ហ៊ុន ពោលគឺលើកម្រិតទិសដៅដែលមានពី ១៤ ទៅ ១៦ ដុល្លារដែលក្រុមហ៊ុនបានកំណត់នាពេលកន្លងមក។
តម្រូវការខ្លាំងចំពោះភាគហ៊ុនក្រុមហ៊ុន Levi''s មានន័យថា ការបោះផ្សាយលក់មូលបត្រជាសាធារណៈលើកដំបូង (IPO) នឹងប្រមូលប្រាក់បានចំនួន ៦២៣ លានដុល្លារ។
ក្រុមហ៊ុន Levi''s មានផែនការប្រើប្រាស់សាច់ប្រាក់បានពីការបោះផ្សាយលក់ភាគហ៊ុននេះសម្រាប់គោលបំណងសាជីវកម្មទូទៅ ព្រមទាំងសម្រាប់ការទិញក្រុមហ៊ុនណាដែលមានសក្តានុពល។ នេះបើយោងតាមឯកសាររបស់ក្រុមហ៊ុនដែលដាក់ជូនផ្សារហ៊ុនក្រុងញូវយ៉ក។
នៅថ្ងៃព្រហស្បតិ៍ម្សិលមិញនេះគឺជាថ្ងៃដែលបង្ហាញពីការវិលត្រឡប់មកទីផ្សារហ៊ុនវិញរបស់ក្រុមហ៊ុន Levi''s បន្ទាប់ពីក្រុមហ៊ុននេះបានចាកចេញពីទីផ្សារមូលធននេះក្នុងឆ្នាំ ១៩៨៥ ក្នុងកិច្ចព្រមព្រៀងទិញយកភាគហ៊ុនភាគច្រើនមួយដែលកើតមានឡើង ១៤ ឆ្នាំ បន្ទាប់ពីក្រុមហ៊ុននេះបានឡើងផ្សារហ៊ុន៕ AFP/KC