The Phnom Penh Post Search

Search form

Logo of Phnom Penh Post newspaper Phnom Penh Post - LG បើក​សម្ពោធ​ហាង​តាំង​លក់​ផលិត​ផល​ដំបូង​




LG បើក​សម្ពោធ​ហាង​តាំង​លក់​ផលិត​ផល​ដំបូង​

LG បើក​សម្ពោធ​ហាង​តាំង​លក់​ផលិត​ផល​ដំបូង​

121224_13
ទូរស័ព្ទ LG ដាក់បង្ហាញក្នុងពិធីសម្ពោធលក់នាពេលកន្លងមក ម៉េង គីមឡុង

ភ្នំពេញៈ ក្រុមហ៊ុន​LG Electronics ដែល​មាន​មូលដ្ឋាន​នៅ​ប្រទេស​កូរ៉េ​ខាង​ត្បូង​បាន​ចាប់​ដៃ​គូ​ជាមួយ​ក្រុមហ៊ុន​ក្នុង​ស្រុក​មួយ​ឈ្មោះ​G-Gear បើក​ដំណើរ​ការ​ហាង LG Brand Shop នៅ​រាជធានី​ភ្នំពេញ​ដើម្បី​បំពេញ​តាម​តម្រូវ​ការ​ឧស្សាហកម្ម​បច្ចេក​វិទ្យា​ដែល​កំពុង​រីក​ចម្រើន​យ៉ាង​ឆាប់​រហ័ស​នៅ​ក្នុង​ប្រទេស​កម្ពុជា​។

មន្ត្រី​រដ្ឋាភិបាល​ជាន់​ខ្ពស់​បាន​ឲ្យ​ដឹង​ថា ការ​កើន​ឡើង​នៃ​ផលិត​ផល​ក្នុង​ស្រុក​សរុប​របស់​កម្ពុជា​គឺជា​កត្តា​មួយ​ក្នុង​ចំណោម​កត្តា​សំខាន់ៗ​ជា​ច្រើន​ក្នុង​ការ​ទាក់​ទាញ​វិនិយោគិន​បរទេស​។

លោក​ឧបនាយក​រដ្ឋ​មន្ត្រី​សុខ អាន រដ្ឋ​មន្ត្រី​ទទួល​បន្ទុក​ទីស្តី​ការ​គណៈ​រដ្ឋមន្ត្រី​បាន​និយាយ​អំឡុង​ពិធី​បើក​សម្ពោធ​ថា ផលិត​ផល​ក្នុង​ស្រុក​សរុប​សម្រាប់​មនុស្ស​ម្នាក់​នៅ​កម្ពុជា​បាន​កើន​ឡើង​ប្រហែល​ពី​៧៣៨​ដុល្លារ​នៅ​ក្នុង​ឆ្នាំ​២០០៩​ដល់​៩១៥​ដុល្លារ​ក្នុង​ឆ្នាំ​២០១២​ហើយ​ត្រូវ​បាន​គេ​ប៉ាន់​ស្មាន​ថា​អាច​កើន​ឡើង​ដល់​១០០០​ដុល្លារ​ក្នុង​ឆ្នាំ​២០១៣​។

លោក សុខ អាន​លើក​ឡើង​ថា៖​«​កំណើន​ប្រាក់​ចំណូល​នេះ​បាន​បង្ហាញ​យ៉ាង​ច្បាស់​ពី​ការ​កើន​ឡើង​ជា​បន្ត​បន្ទាប់​អំពី​អំណាច​ទិញ​របស់​ប្រជាជន​កម្ពុជា​ដែល​វា​ក៏​ផ្តល់​សក្តានុពល​ដ៏​ខ្លាំង​ក្លា​ផង​ដែរ​សម្រាប់​ក្រុមហ៊ុន​ទាំង​អស់​នៅ​ក្នុង​ប្រទេស​កម្ពុជា​។ ការ​បើក​សម្ពោធ​ហាង LG Brand Shop នៅ​ក្នុង​ប្រទេស​កម្ពុជា​នេះ​គឺជា​ការ​សម្រេច​ចិត្ត​វិនិយោគ​ដ៏​ត្រឹមត្រូវ​ស្រប​ពេល​ដែល​កម្ពុជា​បាន​កំពុង​តែ​មាន​ការ​អភិវឌ្ឍ​លើ​គ្រប់​វិស័យ​»។

លោក Micheal Jung ប្រធាន​ប្រតិបត្តិ​នៃ​ក្រុមហ៊ុន LG Electronics ប្រចាំ​ប្រទេស​ថៃ​បាន​លើក​ឡើង​ថា LG Electronics ​មាន​សកម្មភាព​លក់​នៅ​កម្ពុជា​តាំង​ពី​ឆ្នាំ​២០០៧​មក។ ឥឡូវ​ក្រុមហ៊ុន​បាន​ចាប់​ដៃ​គូ​ជាមួយ​ក្រុមហ៊ុន G-Gear​ដើម្បី​បង្កើត​ប្រតិបត្តិការ​ជំនួញ​ឲ្យ​រឹង​មាំ​នៅ​ទីផ្សារ​កម្ពុជា​។

លោក​បាន​ថ្លែង​ថា៖ ​«​ក្រុមហ៊ុន​G-Gear គឺជា​ក្រុមហ៊ុន​ឈាន​មុខ​គេ​មួយ​នៅ​កម្ពុជា ដែល​បាន​ចូល​រួម​ចំណែក​អភិវឌ្ឍ​គួរ​ឲ្យ​កត់​សម្គាល់​លើ​បច្ចេក​វិទ្យា​អេឡិច​ត្រូនិក​។ យើង​រីក​រាយ​ធ្វើ​ការ​ជាមួយ G-Gear ហើយ​យើង​សង្ឃឹម​យ៉ាង​មុត​មាំ​ថា យើង​នឹង​រីក​លូត​លាស់​រួម​គ្នា​ដូច​ដែល​G-Gear ធ្លាប់​ធ្វើ​»​។

លោក​បន្ថែម​ថា៖ ​«​ឥឡូវ​យើង​កំពុង​ព្យាយាម​ធ្វើ​ឲ្យ​ម៉ាក [LG] ល្បី​ជាង​គេ​នៅ​កម្ពុជា។ ដើម្បី​បំពេញ​នូវ​មហិច្ឆតា​របស់​យើង​នេះ វា​មិន​ត្រឹម​តែ​ទាម​ទារ​ឲ្យ​យើង​មាន​ផលិតផល​ដាក់​លក់​នៅ​គ្រប់​ទី​កន្លែង​ប៉ុណ្ណោះ​ទេ ប៉ុន្តែ​យើង​ក៏​ត្រូវ​មាន​ហាង​ដ៏​ល្អ​ដើម្បី​បម្រើ​អតិថិជន​ផង​ដែរ​។ យើង​នឹង​គ្រប់​គ្រង​Brand Shop នេះ​ឲ្យ​ក្លាយ​ជា​ទីតាំង​វប្បធម៌ និង​ទីតាំង​ចំហ​សម្រាប់​បែប​បទ​ជីវិត​រស់​នៅ​របស់​ប្រជាជន​»៕ CC

អត្ថបទគួរចាប់អារម្មណ៍