.jpg)
យន្តហោះក្រុមហ៊ុន Lion Air ចាកចេញពីព្រលាន Changi។ AFP
ក្រុងហ្សាការតាៈ ក្រុមហ៊ុនអាកាសចរណ៍ Lion Air Group របស់ឥណ្ឌូនេស៊ី បានប្រកាសកាលពីថ្ងៃអង្គារពីការបញ្ជាទិញយន្តហោះខ្នាតតូចម៉ូដែល Boeing Co 737 MAX 10 ចំនួន ៥០ គ្រឿងដែលមានតម្លៃ ៦,២៤ ពាន់លានដុល្លារ និងបានឲ្យដឹងទៀតថាខ្លួនមានផែនការបញ្ជាទិញជាបណ្តោះអាសន្ននូវយន្តហោះខ្នាតធំម៉ូដែល Boeing 787 ក្នុងរយៈពេលប៉ុន្មានសប្តាហ៍ខាងមុខនេះ។
លោក Rusdi Kirana សហស្ថាបនិកក្រុមហ៊ុន Lion Air បានប្រាប់ក្រុមអ្នកយកព័ត៌មានថាក្រុមហ៊ុន Lion Air ដែលមានសាខារួចហើយនៅប្រទេសម៉ាឡេស៊ី និងថៃនោះក៏មានផែនការបង្កើតក្រុមហ៊ុនអាកាសចរណ៍ថ្មីមួយនៅក្នុងប្រទេសក្នុងតំបន់អាស៊ីអាគ្នេយ៍មួយក្នុងឆ្នាំនេះផងដែរ។
តែលោកបានបដិសេធផ្តល់ព័ត៌មានលម្អិតស្តីពីចំនួនយន្តហោះម៉ូដែល 787s ដែលត្រូវបានបញ្ជាទិញ ឬប្រទេសណាមួយដែលក្រុមហ៊ុនអាកាសចរណ៍ថ្មីនេះនឹងត្រូវបានបង្កើតឡើង។
លោកបានបន្តឲ្យដឹងថា អនុស្សរណៈយោគយល់មួយសម្រាប់ការទិញយន្តហោះម៉ូដែល 787s នឹងត្រូវប្រកាសក្នុងរយៈពេល «ពីរទៅបីសប្តាហ៍ខាងមុខនេះ»។
ការអធិប្បាយរបស់លោកបានធ្វើឡើង បន្ទាប់ពីក្រុមហ៊ុនឯកជនមួយនេះ បានបញ្ជាក់នាពេលប៉ុន្មានថ្ងៃថ្មីៗនេះពីការទិញយន្តហោះម៉ូដែល Boeing 737 MAX 10 ចំនួន ៥០ គ្រឿង តាមរយៈការប្រកាសពីការបញ្ជាទិញមួយរបស់ក្រុមហ៊ុន។ យន្តហោះនោះមានតម្លៃ ៦,២៤ ពាន់លានដុល្លារ តែក្រុមហ៊ុនអាកាសចរណ៍ជាធម្មតាទទួលបានការបញ្ចុះតម្លៃសម្រាប់ការទិញយន្តហោះក្នុងចំនួនច្រើន។
ក្រុមហ៊ុនអាកាសចរណ៍ដែលកំពុងពង្រីកអាជីវកម្មយ៉ាងឆាប់រហ័សនេះ កាលពីខែមិថុនាឆ្នាំ ២០១៧ បានដាក់ការបញ្ជាទិញបណ្តោះអាសន្ននូវយន្តហោះមួយចំនួនពោលគឺជាប្រភេទយន្តហោះថ្មី និងខ្នាតធំជាងគេនៃប្រភេទយន្តហោះដែលមានតួខ្លួនតូចរបស់ក្រុមហ៊ុន Boeing។
លោក Kirana មានប្រសាសន៍ថាការពង្រីកហេដ្ឋារចនាសម្ព័ន្ធរបស់រដ្ឋាភិបាលឥណ្ឌូនេស៊ីដែលរួមមានអាកាសយានដ្ឋានកំពុងជំរុញតម្រូវការយន្តហោះបន្ថែមរបស់ក្រុមហ៊ុន Lion។
ចំនួនយន្តហោះរបស់ក្រុមហ៊ុនអាកាសចរណ៍មួយនេះជាបឋមមានយន្តហោះដែលមានតួខ្លួនតូច តែក្រុមហ៊ុនមានយន្តហោះខ្នាតធំម៉ូដែល Airbus SE A330 ចំនួន ៣ គ្រឿង។ លោក Kirana ពុំបានបញ្ជាក់ពីផ្លូវហោះហើរដែលត្រូវប្រើប្រាស់យន្តហោះម៉ូដែល 787 នេះទេ។
ក្រុមហ៊ុន Lion Air អាចនឹងទទួលបានយន្តហោះ Boeing 737 MAX 10 ដំបូងនៅឆ្នាំ ២០២០៕ BP
