.jpg)
បុគ្គលិកកំពុងធ្វើការនៅក្នុងបន្ទប់ជួញដូរភាគហ៊ុនរបស់ផ្សារហ៊ុនកម្ពុជា។ LOLC ទទួលបានការយល់ព្រមជាគោលការណ៍ពីគណៈកម្មការមូលបត្រ។ ហុង មិនា
ភ្នំពេញៈ គណៈកម្មការមូលបត្រកម្ពុជា បានអនុម័តជាគោលការណ៍ទៅលើសំណើសុំបោះផ្សាយលក់មូលបត្របំណុលរបស់គ្រឹះស្ថានមីក្រូហិរញ្ញវត្ថុ LOLC ដែលនឹងក្លាយជាក្រុមហ៊ុនទី២ បន្ទាប់ពីហត្ថាកសិករ។
សេចក្តីប្រកាសព័ត៌មានរបស់ SECC កាលពីល្ងាចថ្ងៃទី ៣ ខែ មេសា បានឲ្យដឹងថា មូលបត្របំណុល ឬសញ្ញាបណ្ណដែលស្នើសុំបោះផ្សាយនេះ ២ ប្រភេទ ដែលជាទី១ គឺជាសញ្ញាបណ្ណធម្មតាមានអាទិភាពខ្ពស់ គ្មានវត្ថុធានា និងគ្មានការការពារហានិភ័យអត្រាប្តូរប្រាក់ ដែលអត្រាគូប៉ុង (ការប្រាក់) ប្រចាំឆ្នាំចន្លោះពី ៨ ភាគរយទៅ ៩ ភាគរយ និងទី២ គឺជាសញ្ញាបណ្ណធម្មតាមានអាទិភាពខ្ពស់ គ្មានវត្ថុធានា និងមានការការពារហានិភ័យអត្រាប្តូរប្រាក់ ក្នុងអត្រាគូប៉ុងប្រចាំឆ្នាំចន្លោះពី ៧,៥ ភាគរយទៅ ៨ ភាគរយក្នុង ១ ឆ្នាំ។
ការបោះផ្សាយមូលបត្របំណុលកន្លងមក របស់គ្រឹះស្ថានមីក្រូហិរញ្ញវត្ថុ ហត្ថាកសិករ មានតែសញ្ញាបណ្ណមួយប្រភេទប៉ុណ្ណោះ នោះគឺសញ្ញាបណ្ណមិនមានធានាហានិភ័យអត្រាប្តូរប្រាក់ដែលបានបោះផ្សាយដំបូងគេកាលពីចុងឆ្នាំ ២០១៨។
សេចក្តីប្រកាសព័ត៌មានដដែលនេះបានឲ្យដឹងទៀតថា គ្រឹះស្ថានមីក្រូហិរញ្ញវត្ថុ LOLC គ្រោងនឹងបោះផ្សាយក្នុងទំហំប្រាក់សរុប ៨០ ពាន់លានរៀល (ប្រហែល ២០ លានដុល្លារ) មានតម្លៃចារឹកក្នុងមួយឯកតាមូលបត្របំណុល ១០០ ០០០ រៀល។
លោក ស៊ឹម តារា ប្រធានផ្នែកស្រាវជ្រាវក្រុមហ៊ុន Yuanta Securities ដែលជាក្រុមហ៊ុនប្រឹក្សា និងធានាទិញមូលបត្របំណុលរបស់ LOLC កាលពីចុងខែមីនា ប្រាប់ភ្នំពេញប៉ុស្តិ៍ថា ការធ្វើបរិវិសកម្មទៅលើមូលបត្របំណុលនេះត្រូវបានរំពឹងថា នឹងធ្វើឡើងនៅចុងខែមេសា។
លោកបន្ថែមថា ក្រុមហ៊ុនមានវិនិយោគិនគ្រប់គ្រាន់នៅក្នុងដៃរួចហើយដែលរង់ចាំទិញបណ្ណបំណុលនេះ ដែលភាគច្រើនពួកគាត់សុទ្ធសឹងជាវិនិយោគិនស្ថាប័ននៅក្នុងប្រទេស។ LOLC ត្រូវបន្តនីតិវិធីនៃការបោះផ្សាយលក់មូលបត្របំណុលអនុលោមតាមច្បាប់ និងបទប្បញ្ញត្តិជាធរមាន មុនទទួលបានការអនុញ្ញាតជាផ្លូវការក្នុងការចុះបញ្ជីលើទីផ្សារមូលបត្រកម្ពុជា៕
