ទីក្រុងហ្វ្រែងហ្វឺតៈ Lufthansa ជាក្រុមហ៊ុនអាកាសចរណ៍អាល្លឺម៉ង់កាលពីថ្ងៃព្រហស្បតិ៍បានអះអាងថា ខ្លួនបានជជែកជាមួយរដ្ឋាភិបាលជុំវិញទឹកប្រាក់សង្គ្រោះក្រុមហ៊ុននេះចំនួន ៩ ពាន់លានអឺរ៉ូ ($១០ ពាន់លាន) ដែលនឹងធ្វើឲ្យទីក្រុងប៊ែរឡាំងគ្រប់គ្រងហ៊ុនច្រើនបំផុតក្នុងក្រុមហ៊ុនអាកាសចរណ៍ដែលរងផលប៉ះពាល់ដោយវីរុសកូរ៉ូណា។
ក្រុមហ៊ុនអាកាសចរណ៍យក្សរបស់អាល្លឺម៉ង់នេះបានឲ្យដឹងតាមរយៈសេចក្តីប្រកាសព័ត៌មានថា៖ «គំនិតនោះមិនទាន់បានបញ្ចប់នៅឡើយសម្រាប់វិធានការធ្វើឲ្យមានស្ថិរភាពក្នុងចំនួនទឹកប្រាក់ដល់ទៅ ៩ ពាន់លានអឺរ៉ូដែលទឹកប្រាក់ ៣ ពាន់លានអឺរ៉ូគឺជាទម្រង់ប្រាក់កម្ចី» ពីធនាគារវិនិយោគសាធារណៈ KfW។
តាមផែនការដែលបានស្នើពិភាក្សាជាមួយមូលនិធិស្ថិរភាពសេដ្ឋកិច្ចរដ្ឋាភិបាលសហព័ន្ធ (WSF) ដែលបានដាក់ដើម្បីកាត់បន្ថយផលប៉ះពាល់នៃការរីករាលដាលវីរុស WSF នឹងទិញយកភាគហ៊ុន ២០ ភាគរយក្នុងក្រុមហ៊ុនអាកាសចរណ៍នេះព្រមជាមួយបណ្ណបំណុលដែលអាចប្តូរបានតម្លៃ ៥ ភាគរយបន្ថែមទៀតក្នុង ១ ភាគហ៊ុន។
ប្រសិនបើយល់ព្រម ដំណោះស្រាយអាចបិទបញ្ចប់ភាពមិនចុះសម្រុងគ្នាជាច្រើនសប្តាហ៍ជុំវិញរឿងរ៉ាវរបស់អាកាសចរណ៍ Lufthansa រវាងក្រុមអភិរក្សនិយម (CDU) របស់លោកស្រីអធិការបតី Angela Merkel និងដៃគូវ័យក្មេងនិយមកណ្តាល (SPD)។
អ្នកនយោបាយគាំទ្រសេដ្ឋកិច្ចក្នុងចំណោមអ្នកនយោបាយរបស់ Merkel បានបដិសេធជាយូរមកហើយចំពោះការជាប់ទាក់ទិនដោយរដ្ឋក្នុងចំណែកហ៊ុនច្រើននៅក្នុងក្រុមហ៊ុនអាកាសចរណ៍ Lufthansa ដែលនិយាយថា ការសម្រេចចិត្តអាជីវកម្មគួរស្នើទៅកាន់គណៈនាយក។
ប៉ុន្តែខាង SPD ប្រកាន់ខ្ជាប់នូវការកាន់កាប់ភាគហ៊ុនធំដែលនឹងអនុញ្ញាតឲ្យរដ្ឋាភិបាលទីក្រុងប៊ែរឡាំងមានឥទ្ធិពលលើថៅកែជុំវិញការកាត់បន្ថយការងារដែលមានសក្តានុពល ឬក៏គោលដៅបរិស្ថាន។
គោលបំណងខ្លះរបស់ក្រុមនិយមកណ្តាលនឹងត្រូវបានបំពេញជាមួយកៅអី ២ តែងតាំងដោយរដ្ឋនៅគណៈគ្រប់គ្រងរបស់ក្រុមហ៊ុន Lufthansa ព្រមជាមួយលក្ខខណ្ឌទាំងឡាយដែលមានចែងពី «ការលះបង់សិទ្ធិនៃការទូទាត់ភាគលាភនាពេលអនាគត និងការរឹតត្បិតលើការគ្រប់គ្រងប្រាក់បំណាច់»។
កាសែតសេដ្ឋកិច្ចប្រចាំថ្ងៃ Handelsblatt បានរាយការណ៍កន្លងមកថា អ្នកដែលត្រូវតែងតាំងទៅកាន់តួនាទីក្នុងក្រុមប្រឹក្សាក្នុងក្រុមហ៊ុននេះនឹង «មិនមែនជាអ្នកនយោបាយ ឬមន្ត្រីរដ្ឋាភិបាលស៊ីវិលនោះទេ» ប៉ុន្តែជាពាណិជ្ជករក្នុងគំរូប្រហាក់ប្រហែលទៅនឹងក្រុមហ៊ុនផលិតយន្តហោះក្នុងតំបន់អឺរ៉ុប Airbus។
Lufthansa បានឲ្យដឹងថា កិច្ចប្រជុំម្ចាស់ភាគហ៊ុនវិសាមញ្ញនឹងត្រូវសម្រេចទៅលើការបង្កើនមូលធនដែលត្រូវការដែលនឹងធ្វើឲ្យចុះខ្សោយនូវតម្លៃភាគហ៊ុនរបស់ម្ចាស់ភាគហ៊ុនដែលមានស្រាប់។
ក្នុងតួនាទីរបស់ខ្លួនជាអ្នកតាមដានឃ្លាំមើលការប្រកួតប្រជែង គណៈកម្មការអឺរ៉ុបត្រូវតែផ្តល់នូវឱកាសក្នុងការត្រួតពិនិត្យដល់កញ្ចប់ទឹកប្រាក់សង្គ្រោះនោះ មុនពេលរឿងនេះនឹងបន្តដំណើរនីតិវិធីទៅមុខទៀត៕ RR