.jpg)
បើតាមក្រុមហ៊ុន MasterCard បច្ចុប្បន្ននៅជុំវិញពិភពលោក មនុស្សពេញវ័យ ២៣០ លាននាក់ដែលជិត ៨៥ ភាគរយ នៃមនុស្សពេញវ័យនៅក្នុងបណ្ដាប្រទេសមានប្រាក់ចំណូលទាបដែលធ្វើការងារនៅក្នុងវិស័យឯកជនទទួលបានប្រាក់ឈ្នួលជាសាច់ប្រាក់។ រូបថត PIXABAY
ភ្នំពេញៈ Mastercard ដែលជាក្រុមហ៊ុនបច្ចេកវិទ្យាទូទាត់ជាសកលបានប្រកាសកាលពីសប្ដាហ៍មុននូវកិច្ចខិតខំប្រឹងប្រែងជាសកលរបស់ខ្លួនក្នុងការផ្តល់សេវាបើកប្រាក់ខែដល់កម្មកររោងចក្រកាត់ដេរតាមបច្ចេកវិទ្យាឌីជីថល ដែលរួមទាំងកម្ពុជាផងដែរ។ នេះបើយោងតាមក្រុមហ៊ុន។
ក្រុមហ៊ុន Mastercard និងដៃគូជាច្រើនរបស់ខ្លួនកំពុងសម្របសម្រួលសាកល្បងនៅក្នុងប្រទេស កម្ពុជា និងអេហ្ស៊ីប នូវដំណោះស្រាយការទូទាត់ឌីជីថល។ នេះបើតាមសេចក្ដីប្រកាសព័ត៌មានដែលផ្សាយកាលពីថ្ងៃទី ២៦ ខែកញ្ញា។
ក្រុមហ៊ុនបានឲ្យដឹងទៀតថា៖ «បណ្ដារោងចក្រដែលចូលរួមនឹងមានឱកាសនៅក្នុងការដាក់ប្រាក់ឈ្នួលដោយផ្ទាល់ទៅក្នុងគណនីរបស់កម្មករ»។
ក្រុមហ៊ុនបន្តថា៖ «នៅពេលនោះកម្មករអាចប្រតិបត្តិការកាតឥណពន្ធ និងកាតទូទាត់ប្រាក់ជាមុន ឬហោប៉ៅឌីជីថលតាមរយៈនោះគេអាចបង់ថ្លៃវិក្កយបត្រ ឬផ្ញើប្រាក់ដោយផ្ទាល់ទៅគ្រួសារ»។
បើតាមក្រុមហ៊ុន MasterCard បច្ចុប្បន្ននៅជុំវិញពិភពលោក មនុស្សពេញវ័យ ២៣០ លាននាក់ដែលជិត ៨៥ ភាគរយ នៃមនុស្សពេញវ័យនៅក្នុងបណ្ដាប្រទេសមានប្រាក់ចំណូលទាបដែលធ្វើការងារនៅក្នុងវិស័យឯកជនទទួលបានប្រាក់ឈ្នួលជាសាច់ប្រាក់។
ជាមួយនឹងកម្មករជាង ៧០ ម៉ឺននាក់ដែលបម្រើការងារក្នុងឧស្សាហកម្មនេះ បច្ចុប្បន្នកម្មកររោងចក្រកាត់ដេរជាច្រើននៅកម្ពុជាបានផ្លាស់ប្តូររួចហើយពីប្រាក់ខែជាសាច់ប្រាក់សុទ្ធទៅជាតាមរយៈគណនីធនាគារ។
លោក តូច ចៅចេក នាយកប្រតិបត្តិធនាគារប្រៃសណីយ៍កម្ពុជា (CPBank) បានប្រាប់ថា ការប្រើប្រាស់សេវាកម្មបើកប្រាក់ឈ្នួលកម្មកររោងចក្រកាត់ដេរនៅកម្ពុជាត្រូវបានធ្វើឡើងតាមរយៈប្រព័ន្ធឌីជីថលយូរឆ្នាំមកហើយ។
លោកថ្លែងថា៖ «កាលពីមុនកម្មករភាគច្រើនបើកលុយជាសាច់ប្រាក់ផ្ទាល់ពីរោងចក្រតែពេលនេះប្រាក់ខែកម្មករត្រូវបានវេរចូលកុងធនាគារ»។
លោកបន្តថា CPBank មានកម្មករកាត់ដេរជិត ១ ម៉ឺននាក់បើកប្រាក់ខែតាមធនាគារ។ លោកថ្លែងថា៖ «បច្ចុប្បន្ននៅ CPBank កម្មករគាត់មានកាតអេធីអឹម និង App ធនាគារមួយដែលគាត់អាចផ្ទេរប្រាក់ឲ្យឪពុកម្តាយនៅស្រុក ការបង់ទឹកភ្លើងជាដើម»។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងកាលពីម្សិលមិញថា វាហាក់ដូចជាលឿនពេកសម្រាប់កម្មករ ខណៈការយល់ដឹងរបស់កម្មករពីធនាគារនៅមានកម្រិតទាប។
លោកថ្លែងថា៖ «កម្មករខ្មែរចង់បើកប្រាក់ខែជាប្រាក់សុទ្ធ ព្រោះពួកគាត់មិនអាចប្រើប្រាស់វានេះភ្លាមៗទេ បើដកប្រាក់តាមរយៈម៉ាស្ទ័រកាត ឬតាមប្រព័ន្ធធនាគារ។ ពួកគេត្រូវការដកប្រាក់ពីធនាគារ និងត្រូវការពិនិត្យមើលសាច់ប្រាក់ដែលផ្ញើទៅគណនីធនាគារឬក៏អត់»។
យោងតាមសេចក្តីប្រកាសព័ត៌មាន ក្រុមហ៊ុន Mastercard កំពុងបង្កើតដំណោះស្រាយឌីជីថល និងការផ្ដល់ការគាំទ្របណ្ដុះបណ្ដាលដើម្បីផ្ដល់ឲ្យកម្មករនូវការគ្រប់គ្រងកាន់តែច្រើន និងតម្លាភាពលើប្រាក់ចំណេញ និងប្រាក់សន្សំ។
តាមទិន្នន័យប្រមូលបានតាមរយៈកម្មវិធី HERfinance របស់គម្រោងអាជីវកម្មទទួលខុសត្រូវសង្គមមានរោងចក្រកាត់ដេរជាច្រើនដែលផ្លាស់ប្តូរទៅប្រាក់ខែតាមប្រព័ន្ធធនាគារសន្សំពេលវេលាបុគ្គលិកបានរហូតដល់ ៥៣% ពីការចំណាយពេលបើកប្រាក់ខែ៕LA
