The Phnom Penh Post Search

Search form

Logo of Phnom Penh Post newspaper Phnom Penh Post - Maybank បើក​សាខា​ទី ១២




Maybank បើក​សាខា​ទី ១២

Maybank បើក​សាខា​ទី ១២

121231_12a
អ្នកធ្វើដំណើរបើកបរកាត់សាខាធនាគារ Maybank ដែលមានទីតាំងតាមបណ្តោយផ្លូវក្រមួនស ហេង ជីវ័ន

ភ្នំពេញៈ ធនាគារ​ម៉ាឡេស៊ី Maybank ដែល​ជា​ធនាគារ​ធំ​មួយ​នៅ​កម្ពុជា​កាល​ពី​ថ្ងៃ​សុក្រ​បាន​បើក​សាខា​ទី​១២​របស់​ខ្លួន​នៅ​តំបន់​សេដ្ឋកិច្ច​ពិសេស​ភ្នំពេញ​ដើម្បី​ចាប់​យក​ទីផ្សារ​ឧស្សាហកម្ម និង​ពាណិជ្ជកម្ម​ដែល​កំពុង​រីក​ចម្រើន​នៅ​តាម​ជាយ​ក្រុង​។

លោក Lee Tien Poh អគ្គ​នាយក​ប្រតិបត្តិ​ធនាគារ Maybank ប្រចាំ​នៅ​កម្ពុជា​បាន​និយាយ​ថា ការ​បើក​សាខា​នៅ​តំបន់​សេដ្ឋកិច្ច​ពិសេស​ភ្នំពេញ​គឺ​ចំ​ពេល​ដើម្បី​ចាប់​យក​កាលានុវត្តភាព​ទី​ផ្សារ ដែល​កំពុង​តែ​ងើប​ឡើង​ស្រប​តាម​យុទ្ធ​សាស្ត្រ​អភិវឌ្ឍ​ទីក្រុង​របស់​កម្ពុជា​សម្រាប់​រាជធានី​ភ្នំពេញ និង​តំបន់​ជុំវិញ​ទីក្រុង​ដែល​ត្រូវ​បាន​ចាត់​ទុក​ថា​ជា​មជ្ឈ​មណ្ឌល​ពិសេស​ទី​ពីរ​។

លោក​បាន​និយាយ​ថា៖​«យើង​មាន​គោល​បំណង​បម្រើ​ឧស្សាហកម្ម​ដែល​ស្ថិត​នៅ​ក្នុង​តំបន់​សេដ្ឋកិច្ច​ពិសេស​ភ្នំពេញ​ដែល​នឹង​ត្រូវ​ការ​សេវាកម្ម​ប្រតិបត្តិការ​ធនាគារ​ដូចជា​ហិរញ្ញប្បទាន​ពាណិជ្ជកម្ម និង​ការ​គ្រប់​គ្រង​ប្រាក់​សុទ្ធ​។ យើង​ជឿ​ថា​តម្រូវ​ការ​សេវា​បែប​នេះ កំពុង​តែ​កើន​ឡើង​ដើម្បី​បម្រើ​ជូន​វត្តមាន​សហ​គ្រាស​ដែល​ត្រូវ​នាំ​ចូល​វត្ថុ​ធាតុ​ដើម និង​នាំ​ចេញ​ទំនិញ​សម្រេច​»។

លោកស្រី អ៊ុក ម៉ាលី ទេសាភិបាល​រង​ធនាគារ​ជាតិ​នៃ​កម្ពុជា​បាន​និយាយ​ថា សាខា​ថ្មី​នេះ នឹង​ជួយ​ពង្រឹង​សមត្ថភាព​ធនាគារ​ក្នុង​ការ​ស្វែង​រក​ប្រាក់​ចំណូល​បន្ថែម និង​ទាក់​ទាញ​អតិថិជន​ដែល​អ្នក​ប្រើ​ប្រាស់​គណនី​សន្សំ​កាន់​តែ​ច្រើន​។

លោកស្រី​ថា៖ «បើ​ទោះ​ជា​វិស័យ​ធនាគារ​នៅ​ក្នុង​ប្រទេស​កម្ពុជា មាន​ការ​វិវត្ត​ទៅ​មុខ​និង​រីក​ចម្រើន​គួរ​ឲ្យ​កត់​សម្គាល់​ទាំង​បរិមាណ និង​ទំហំ​ប្រតិបត្តិការ​ក៏​ដោយ ក៏​ធនាគារ​ជាតិ​នៃ​កម្ពុជា​នៅ​តែ​បន្ត​ព្យាយាម​ពង្រឹង​ធ្វើ​យ៉ាង​ណា​ដើម្បី​ឲ្យ​វិស័យ​ធនាគារ​មាន​ភាព​រឹង​មាំ និង​ស្ថិរភាព​»។

លោកស្រី​បន្ថែម​ថា នៅ​ដំណាច់​ខែ​ឧសភា ឆ្នាំ​២០១២ ការ​ផ្តល់​កម្ចី​សរុប​ក្នុង​ប្រព័ន្ធ​ធនាគារ បាន​កើន​ឡើង​៣១,៧៨​ភាគ​រយ​ដែល​បាន​ផ្តល់​ឲ្យ​ទៅ​អតិថិជន​ចំនួន​១,៦​លាន​នាក់​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន ខណៈ​ពេល​អ្នក​ដាក់​ប្រាក់​បញ្ញើ​បាន​កើន​ឡើង​២៧,៦៧​ភាគ​រយ​ដល់​ចំនួន​១,៩​លាន​នាក់។ ទ្រព្យ​សកម្ម​សរុប​របស់​ធនាគារ Maybank កើន​ដល់​៣៤៩ ៩៨​លាន​ដុល្លារ​អាមេរិក ពោល​គឺ​កើន​ឡើង​៦១,៣៤​ភាគ​រយ​បើ​ប្រៀប​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន​។

យោង​តាម​លោកស្រី អ៊ុក ម៉ាលី​បាន​ឲ្យ​ដឹង​ទៀត​ថា ធនាគារ Maybank មាន​គម្រោង​ពង្រីក​សាខា​១០​បន្ថែម​ទៀត​នៅ​រាជធានី​ភ្នំពេញ​នៅ​ដំណាច់​ឆ្នាំ​២០១៤​ខាង​មុខ​៕ CC

អត្ថបទគួរចាប់អារម្មណ៍