ភ្នំពេញៈ ធនាគារមេយប៊ែង (Maybank) បានក្លាយជាធនាគារពាណិជ្ជទី ២ នៅកម្ពុជាដែលបានប្រកាសជាផ្លូវការក្នុងការជួយសម្រួលផ្នែកហិរញ្ញវត្ថុដល់អតិថិជនរបស់ខ្លួនដែលបានកំពុងទទួលរងផលប៉ះពាល់ពីការរីករាលដាលនៃជំងឺកូវីដ១៩ នេះ។
កាលពីដើមខែមេសា ឆ្នាំ ២០២០ នេះធនាគារ Campu Bank ដែលជាបុត្រសម្ព័ន្ធរបស់ធនាគារពីប្រទេសម៉ាឡេស៊ីបានប្រកាសជាសាធារណៈក្នុងការរៀបចំឥណទានដល់អតិថិជនខ្លួនដែលរងផលប៉ះពាល់ពីជំងឺកូវីដ ១៩ ផងដែរ។
បើយោងតាមសេចក្តីប្រកាសព័ត៌មានពីធនាគារមេយប៊ែងចេញផ្សាយកាលពីថ្ងៃពុធចាប់តាំងពីមានការរីករាលដាលនៃជំងឺកូវីដ ១៩ ធនាគារបានចាប់ផ្តើមផ្តល់សេវាប្រឹក្សាផ្នែកហិរញ្ញវត្ថុសម្រាប់អតិថិជនរបស់ខ្លួន ដែលរងផលប៉ះពាល់ដោយរោគរាតត្បាតបន្ថែមលើកញ្ចប់ជំនួយហិរញ្ញវត្ថុតាមរយៈការរៀបចំឥណទានឡើងវិញ និងការកំណត់ពេលវេលាឡើងវិញសម្រាប់ការសងឥណទានក៏ដូចជាការផ្អាកការសងប្រាក់កម្ចីជាដើម។
លោក Dato Mohd Hanif Suadi នាយកប្រតិបត្តិនៃធនាគារមេយប៊ែងបានមានប្រសាសន៍ថា ជាមួយនឹងគោលការណ៍ថ្មីៗស្តីពីការរៀបចំឥណទានឡើងវិញចេញដោយធនាគារជាតិនៃកម្ពុជា គឺជាចលករដែលគួរឲ្យកក់ក្តៅមួយក្នុងការរួមចំណែកក្នុងការជួយកាត់បន្ថយបន្ទុកហិរញ្ញវត្ថុដល់អាជីវកម្ម និងអតិថិជនជាបុគ្គលដែលរងផលប៉ះពាល់ពីការរីករាលដាលនៃជំងឺកូវីដ១៩ ជាពិសេសសម្រាប់វិស័យអាទិភាព ៤ ដែលរួមមាន វិស័យទេសចរណ៍ វិស័យកាត់ដេរ វិស័យសំណង់ និងវិស័យដឹកជញ្ជូន។
លោកបានថ្លែងយ៉ាងដូច្នេះថា៖ «យើងបានយល់ច្បាស់ហើយថា ការផ្ទុះឡើងភ្លាមៗនៃវីរុសនេះបានជះឥទ្ធិពលយ៉ាងខ្លាំងដល់អតិថិជនរបស់យើងគ្រប់វិស័យទាំងអស់នៅក្នុងសង្គម ហើយពួកគេពិតជាត្រូវការគម្លាតពេលវេលាខ្លះ សម្រាប់ការបំពេញកាតព្វកិច្ចហិរញ្ញវត្ថុរបស់ពួកគេសម្រាប់ពេលនេះ»។
លោកបានបន្ថែមទៀតថាអាជីវកម្ម និងអតិថិជនបុគ្គលដែលរងផលប៉ះពាល់ចាំបាច់ត្រូវតែយល់ និងអាចទទួលយកបាននូវការប្រាក់ដែលត្រូវបានបង្គរ និងចំនួនទឹកប្រាក់នៃការសងសំណង ឬរយៈពេលនៃការសងបន្ទាប់ពីការពន្យារពេល ហើយត្រូវស្វែងយល់ឲ្យបានហ្មត់ចត់នូវលក្ខខណ្ឌនៃហិរញ្ញប្បទានដែលបានកែសម្រួល។
ការប្រកាសរបស់ធនាគារនេះធ្វើឡើងបន្ទាប់ពីសេចក្តីណែនាំរបស់ធនាគារជាតិនៃកម្ពុជានៅថ្ងៃទី ២៧ ខែមីនា ដល់ធនាគារ និងស្ថាប័នហិរញ្ញវត្ថុទាំងអស់រៀបចំឡើងវិញនូវឥណទានដល់អតិថិជនដែលងាយរងគ្រោះក្នុងវិស័យអាទិភាពចំនួន ៤ រួមមានវិស័យទេសចរណ៍ វិស័យកាត់ដេរ វិស័យសំណង់ និងវិស័យដឹកជញ្ជូន។
លោក Dato Hanif បានថ្លែងថា អតិថិជនដែលរងផលប៉ះពាល់នឹងត្រូវបានស្វាគមន៍ក្នុងការទាក់ទងទៅកាន់មន្ត្រីប្រចាំសាខា ឬប្រធានផ្នែកគ្រប់គ្រងទំនាក់ទំនងអតិថិជន ដើម្បីពិភាក្សាអំពីដំណោះស្រាយដែលអាចធ្វើបាន ដើម្បីជម្នះរាល់បញ្ហាហិរញ្ញវត្ថុដែលពួកគេកំពុងប្រឈមមុខ។
លោកបានថ្លែងបន្តទៀតថា៖ «ការរាតត្បាតនៃជំងឺកូវីដ១៩ គឺជាស្ថានភាពអកុសល ហើយធនាគារបានឆ្លៀតយកឱកាសនេះដើម្បីធ្វើរឿងដ៏ត្រឹមត្រូវស្របតាមបេសកកម្មរបស់យើងក្នុងការផ្តល់សេវាហិរញ្ញវត្ថុប្រកបដោយអរិយភាព។ ធនាគារ មេយប៊ែង ប្តេជ្ញាចិត្តក្នុងការបន្ធូរបន្ថយភាពតានតឹងរបស់អតិថិជនរបស់ខ្លួនក្នុងគ្រាលំបាកនេះ និងដើម្បីអនុញ្ញាតឲ្យពួកគេផ្តោតលើអ្វីដែលសំខាន់បំផុតសម្រាប់ពួកគេគឺក្រុមគ្រួសារ និងសុខភាពរបស់ពួកគេ»៕''