.jpg)
ក្រុមហ៊ុនរ៉ែមាស Mesco Gold កំពុងដំឡើងផលិតកម្មចម្រាញ់រ៉ែមាសនៅគម្រោងរ៉ែមាស ក្នុងខេត្តរតនគិរី។ ANANTH BALIGA
ភ្នំពេញៈ ក្រុមហ៊ុនរ៉ែមាសមានមូលដ្ឋាននៅប្រទេស ឥណ្ឌា Mesco Gold ដែលទទួលបានសិទ្ធិធ្វើអាជីវកម្មរ៉ែមាសនៅកម្ពុជា រំពឹងថានឹងអាចធ្វើការចម្រាញ់រ៉ែមាសនៅកម្ពុជាជាលើកដំបូងនៅចុងឆ្នាំនេះ ខណៈក្រុមហ៊ុនកំពុងដំឡើងផលិតកម្មចម្រាញ់រ៉ែមាសនៅគម្រោងរ៉ែមាស ភូមិស៊ីយ៉ារុង ក្នុងខេត្តរតនគិរី។ នេះបើយោងតាមការបញ្ជាក់របស់តំណាងក្រុមហ៊ុន Mesco មកកាន់ភ្នំពេញ ប៉ុស្តិ៍។
អ្នកស្រី Rita Singh ប្រធាន និងជានាយិកាក្រុមហ៊ុន Mesco Steel នៅឥណ្ឌា ដែលជាក្រុមហ៊ុនមេរបស់ Mesco Gold (Cambodia) កំពុងមានបេសកកម្មមួយសប្តាហ៍នៅកម្ពុជាសម្រាប់គម្រោងដំឡើងផលិតកម្មចម្រាញ់រ៉ែមាស ហើយបានបញ្ជាក់ភ្នំពេញប៉ុស្តិ៍កាលពីថ្ងៃអង្គារថា Mesco Gold បានយករ៉ែមាស មកចម្រាញ់ជាមាសក្នុងទ្រង់ទ្រាយតូចរួចហើយដើម្បីធ្វើតេស្តលើរ៉ែនេះ ហើយលទ្ធផលបានបង្ហាញពីផលវិជ្ជមាន។ ក្រុមហ៊ុនបានសម្រេចដំឡើងផលិតកម្មចម្រាញ់រ៉ែមាសជាលក្ខណៈស្តង់ដារដើម្បីដំណើរការអាជីវកម្មនេះ។
អ្នកស្រីបានថ្លែងថា៖ «យើងបានកុម៉្មង់ទិញម៉ាស៊ីនរួចហើយដើម្បីដំឡើងរោងចក្រកែច្នៃដែលគ្រឿងម៉ាស៊ីនទាំងនោះនាំចូលមកពីចិន និងខ្លះទៀតកុម៉្មង់មកពីអឺរ៉ុប។ យើងសង្ឃឹមថានឹងចាប់ផ្តើមផលិតកម្មចម្រាញ់មាសនៅប្រហែលអំឡុងខែវិច្ឆិកា ឬខែធ្នូ»។
អ្នកស្រីបន្តថា៖ «ពេលយើងដំណើរការ [ផលិតកម្មចម្រាញ់] យើងនឹងយករ៉ែមាស ៥០០ តោនដើម្បីធ្វើការចម្រាញ់ចេញជាមាសក្នុងមួយថ្ងៃ (យើងបានទទួលសិទិ្ធចម្រាញ់រ៉ែមាសត្រឹមបរិមាណប៉ុនហ្នឹងក្នុងមួយថ្ងៃ) អ៊ីចឹងយើងនឹងធ្វើការចម្រាញ់ ហើយនឹងរង់ចាំមើលថា តើយើងនឹងអាចបានមាសសុទ្ធប៉ុន្មានពីរ៉ែនេះ»។
យោងតាមការបញ្ជាក់របស់ Rita Singh ទិន្នផលមាសច្រើន ឬតិច វាអាស្រ័យលើគុណភាពរ៉ែ។ អ្នកស្រីបន្តថា រ៉ែមាសមួយតោន អាចចម្រាញ់ជាមាសបានពី ២ ទៅ ៣ ក្រាម។
Mesco Gold (Cambodia) បានទទួលការអនុញ្ញាតដើម្បីប្រតិបត្តិការអាជីវកម្ម រួមមានការវាយតម្លៃលើផលប៉ះពាល់បរិស្ថាន និងសង្គម ដោយក្រសួងបរិស្ថាន ទទួលបានអាជ្ញាប័ណ្ណអាជីវកម្មរ៉ែពាណិជ្ជកម្ម និងទទួលបានការអនុម័តគម្រោងវិនិយោគមានលក្ខណសម្បត្តិគ្រប់គ្រាន់ ពីក្រុមប្រឹក្សាអភិវឌ្ឍន៍កម្ពុជា។
Mesco Gold (Cambodia) បានទិញសិទ្ធិដើម្បីអភិវឌ្ឍអណ្ដូងរ៉ែ និងរុករករ៉ែនៅភូមិស៊ីយ៉ារុងពីក្រុមហ៊ុនរុករករ៉ែរបស់ប្រទេស កាណាដា Angkor Gold Corp កាលពីឆ្នាំ ២០១៣ ក្នុងកិច្ចព្រមព្រៀងលក់មានតម្លៃ ១,២ លានដុល្លារ។ ក្រុមហ៊ុន Angkor Gold Corp ប៉ាន់ប្រមាណថា រ៉ែនៅក្រោមដីនៅក្នុងភូមិស៊ីយ៉ារុងទាញយករ៉ែមាសរហូតដល់ ១០ ឆ្នាំ ដែលអាចផលិតមាសបាន ១០ ០០០ អោសន៍ក្នុងមួយឆ្នាំ។
លោក យស មុនីរ៉ាត់ អ្នកនាំពាក្យក្រសួងរ៉ែ និងថាមពល បានបញ្ជាក់កាលពីថ្ងៃពុធថា ក្រុមហ៊ុន Mesco បានទទួលការអនុញ្ញាតចាំបាច់ទាំងអស់ដើម្បីប្រតិបត្តិការអាជីវកម្មនេះ។ លោកបន្ថែមថា វានឹងជាក្រុមហ៊ុនដំបូង ក្នុងការផលិតរ៉ែមាសនៅកម្ពុជា ប៉ុន្តែវានៅតែជាគម្រោងរ៉ែមាសទ្រង់ទ្រាយមធ្យម ហើយប្រាក់ចំណូលបានពីផលិតកម្មនេះនៅមានកម្រិតនៅឡើយសម្រាប់កម្ពុជា។
លោកបន្តថា ការវាយតម្លៃបរិស្ថាន និងផលប៉ះពាល់សង្គម (ESIA) របស់ក្រុមហ៊ុន Mesco គ្របដណ្ដប់លើផ្ទៃដីសរុប ១២ គីឡូម៉ែត្រក្រឡា ប៉ុន្តែអាជ្ញាប័ណ្ណរុករករ៉ែគ្របដណ្ដប់លើការផលិតលើផ្ទៃដី ១គីឡូម៉ែត្រក្រឡាប៉ុណ្ណោះ។
លោកបន្ថែមថា រដ្ឋាភិបាលបានចំណូលពីសួយសារអាករ ពន្ធ និងថ្លៃជួលដីសម្រាប់គម្រោងនេះ ដែលវានឹងផ្តល់ការងារ និងបង្កើនសកម្មភាពសេដ្ឋកិច្ចផងដែរ។
លោកថ្លែងថា៖ «ក្នុងពេលឆាប់ៗ យើងនឹងរកប្រាក់ចំណូលបានពីរ៉ែមាស ប្រេង ដូច្នេះយើងកំពុងចាប់ផ្ដើមជាបណ្ដើរៗ ក្នុងការទទួលអត្ថប្រយោជន៍ពីការវិនិយោគនេះ»។
Emerald Resources ដែលជាក្រុមហ៊ុនចុះបញ្ជីនៅប្រទេស អូស្ដ្រាលី នៅពីក្រោយគម្រោងរ៉ែមាសអូរខ្វាវក្នុងខេត្តមណ្ឌលគិរី ត្រូវបានរំពឹងថា នឹងចាប់ផ្ដើមគម្រោងរ៉ែមាសទ្រង់ទ្រាយធំលើកដំបូងរបស់ខ្លួន នៅដើមឆ្នាំ ២០២០ បន្ទាប់ពីការទទួលបានអាជ្ញាប័ណ្ណរុករករ៉ែឧស្សាហកម្មកាលពីខែកក្កដា៕LA
