ភ្នំពេញៈ ក្រុមហ៊ុនរ៉ែមាស Mesco Gold ដែលមានមូលដ្ឋាននៅប្រទេស ឥណ្ឌា រំពឹងថានឹងអាចចម្រាញ់មាសនៅប្រទេស កម្ពុជា ជាលើកដំបូងនៅចុងឆ្នាំនេះ ខណៈដែលក្រុមហ៊ុនកំពុងដំឡើងផលិតកម្មចម្រាញ់មាសនៅគម្រោងរ៉ែមាសស្ថិតនៅភូមិស៊ីយ៉ារុងក្នុងខេត្តរតនគិរីរបស់ខ្លួន។
លោកស្រី Rita Singh ប្រធាន និងជានាយិកាក្រុមហ៊ុន Mesco Steel នៅប្រទេស ឥណ្ឌា ដែលជាក្រុមហ៊ុនមេរបស់ Mesco Gold (Cambodia) បាននិងកំពុងបំពេញបេសកកម្មរយៈពេលមួយសប្តាហ៍នៅប្រទេស កម្ពុជា ដែលបញ្ចប់កាលពីម្សិលមិញ សម្រាប់គម្រោងដំឡើងផលិតកម្មចម្រាញ់រ៉ែមាសនេះ។ លោក ហ៊ គីមសាយ អ្នកយកព័ត៌មានរបស់កាសែតភ្នំពេញប៉ុស្តិ៍ បានជួបសម្ភាសជាមួយអ្នកស្រី Rita Singh អំពីដំណើរការ និងការវិវឌ្ឍរបស់គម្រោងផលិតកម្មចម្រាញ់រ៉ែមាសស្ថិតភូមិស៊ីយ៉ារុងនេះ។
១. បន្ទាប់ពីការទិញសិទ្ធិអភិវឌ្ឍ និងយករ៉ែក្នុងគម្រោងរ៉ែមាសនៅភូមិស៊ីយ៉ារ៉ុង ពីក្រុមហ៊ុន Angkor Gold Corp កាលពីឆ្នាំ ២០១៣ តើការងាររបស់លោកស្រីរហូតមកដល់ពេលនេះដូចម្ដេចហើយ?
នៅពេលនេះ យើងបានធ្វើការងារជាច្រើន ហើយយើងជិតនឹងចាប់ផ្ដើមយករ៉ែ។ យើងពិតជាបានចាប់ផ្ដើមវារួចហើយនៅក្នុងលក្ខណៈតូចៗ។ យើងនឹងចាប់ផ្ដើមយករ៉ែនៅ ៧ ខែក្រោយគិតចាប់ពីពេលនេះទៅ។ យើងបានបញ្ជាទិញម៉ាស៊ីនចម្រាញ់មាសពីប្រទេស ចិន និងមួយចំនួនពីអឺរ៉ុប ដើម្បីសាងសង់រោងចក្រចម្រាញ់មាស។ យើងសង្ឃឹមថានឹងចាប់ផ្ដើមផលិតរ៉ែមាសនៅចុងឆ្នាំនេះ អាចនិយាយថានៅក្នុងខែវិច្ឆិកា ឬខែធ្នូ។ យើងនឹងដំណើរការដោយប្រុងប្រយ័ត្នបំផុត ដោយសារតែការយករ៉ែ ដែលជាការយករ៉ែពីក្រោមដី ត្រូវតែប្រុងប្រយ័ត្នបំផុតលើបញ្ហានោះ។
២. តើអ្វីដែលធ្វើឲ្យគម្រោងការផលិតរ៉ែមាសនេះ ត្រូវការរយៈពេលយូរ?
ការយករ៉ែចាំបាច់ត្រូវឆ្លងកាត់នីតិវិធីជាច្រើន។ វាចំណាយរយៈពេលវែង ដើម្បីទទួលបានការអនុញ្ញាត ហើយសូម្បីនីតិវិធីរុករកធម្មតាក៏ត្រូវចំណាយពេលវេលាដែរ។ បន្ទាប់ពីការទទួលបានការអនុញ្ញាតការរុករក យើងចាំបាច់ត្រូវឆ្លងកាត់ការវាយតម្លៃផលប៉ះពាល់បរិស្ថាន (EIA) ហើយបន្ទាប់ពីអាជ្ញាប័ណ្ណ EIA ត្រូវបានផ្ដល់ឲ្យ យើងចាំបាច់ត្រូវមានការយល់ព្រមពីក្រុមប្រឹក្សាអភិវឌ្ឍន៍កម្ពុជា (CDC) លើគម្រោងវិនិយោគរបស់យើង។ ពិតហើយ យើងបានទទួលអាជ្ញាប័ណ្ណរុករករ៉ែកាលពីឆ្នាំ ២០១៦។ ចាប់ពីឆ្នាំ ២០១៦ មក យើងត្រូវសាងសង់អណ្ដូងរ៉ែ។
៣. តើអ្វីជាបញ្ហាប្រឈមដែលលោកស្រីជួបប្រទះ នៅពេលដំណើរការគម្រោងនេះនៅកម្ពុជា?
បញ្ហាសម្រាប់ពួកយើងក្នុងប្រតិបត្តិការអាជីវកម្មនៅទីនេះមាន ២។ ទី១ គឺជាបញ្ហាដែលយើងចាំបាច់ត្រូវបណ្ដុះបណ្ដាលបុគ្គលិក។ យើងបានបញ្ជូនអ្នកជំនាញជនជាតិឥណ្ឌាឲ្យមកបណ្ដុះបណ្ដាលបុគ្គលិកនៅទីនេះ ហើយយើងកំពុងគិតថា យើងនឹងបញ្ជូនបុគ្គលិកមួយចំនួនទៀតទៅបណ្ដុះបណ្ដាលនៅប្រទេសឥណ្ឌាសម្រាប់ការងារឯកទេស។ បញ្ហាទី២ គឺអំពីការទទួលបានហិរញ្ញប្បទាន។
នៅពេលនេះ នៅពេលយើងនិយាយទៅកាន់ធនាគារឥណ្ឌា ពួកគេនិយាយថា ប្រទេស កម្ពុជា មានហានិភ័យខ្លាំងណាស់។ ដូច្នេះការទទួលបានហិរញ្ញប្បទានគឺជាបញ្ហាដ៏ធំមួយ។ ការទទួលបានមូលនិធិពីធនាគារកម្ពុជា ក៏មានការពិបាកផងដែរ។ ពួកគេមិនផ្ដល់ហិរញ្ញប្បទានលើគម្រោងនេះទេ ជាពិសេសគម្រោងយករ៉ែ។ ដូច្នេះមូលនិធិទាំងអស់ដែលយើងមានសម្រាប់ធ្វើការងារនៅទីនេះ គឺជាប្រាក់ផ្ទាល់ខ្លួនរបស់យើង។ យើងបានចំណាយចំនួនប្រហែល ២៥ លានដុល្លារហើយ។
៤. វាជាមូលនិធិវិនិយោគដ៏ធំមួយ។ តើលោកស្រីនឹងទទួលបានប្រយោជន៍ធំប៉ុនណាពីការវិនិយោគនេះ?
វាស្មុគស្មាញខ្លាំងណាស់។ យើងកំពុងធ្វើការយករ៉ែពីក្រោមដី ដែលមានការពិបាកបំផុត។ យើងត្រូវចុះទៅក្រោមដីជម្រៅ ១០០ ម៉ែត្រ។ ត្រូវ ប្រុងប្រយ័ត្នពីសុវត្ថិភាព ហើយយើងត្រូវតែចាត់វិធានការជាច្រើនដំណាក់កាល។ វាពិបាក ដោយសារតែវាមិនមែនគ្រាន់តែចូលទៅក្រោមដី ហើយយករ៉ែមាសចេញមកនោះទេ។ រ៉ែស្ថិតនៅក្នុងថ្ម។ វាត្រូវការការចម្រាញ់ ដើម្បីយកមាសទាំងនោះចេញមក។
មានមាសប្រហែលពី ២ ទៅ ៣ ក្រាមនៅក្នុងថ្ម ១ តោន។ ខ្ញុំមិនដឹងថា តើការយករ៉ែនឹងទទួលបានជោគជ័យឬអត់នោះទេ។ ប៉ុន្តែខ្ញុំគ្រាន់តែមានសុទិដ្ឋិនិយមថា វានឹងជោគជ័យ។ នៅពេលយើងចាប់ផ្ដើមចម្រាញ់យកមាស យើងនឹងត្រូវជីករ៉ែ ៥០០ តោនក្នុង ១ ថ្ងៃ។ នោះគឺការអនុញ្ញាតដែលយើងទទួលបាន។ តើយើងនឹងទទួលបានមាសប៉ុន្មាននោះ វាអាស្រ័យលើមាសដែលមាននៅក្នុងរ៉ែ។
៥. តើកម្ពុជានឹងទទួលបានអត្ថប្រយោជន៍យ៉ាងដូចម្តេច ពីអាជីវកម្មរបស់ក្រុមហ៊ុនរបស់លោកស្រី?
ក្រុមហ៊ុនយើងបង់ពន្ធសួយសារអាករដល់រដ្ឋាភិបាល។ យើងបង់ពន្ធរួមទាំងពន្ធនាំចេញ និងអាករលើតម្លៃបន្ថែម (VAT) និងពន្ធលើប្រាក់ចំណេញផងដែរ៕ LA