ភ្នំពេញៈ ក្រុមហ៊ុនទូរគមនាគមន៍ Metfone ដែលគ្រប់គ្រងដោយយោធារបស់វៀតណាម បានបង្ហាញប្រាក់ចំណូលរួមជាង ២,២ ពាន់លានដុល្លារក្នុងអំឡុងពេលប្រតិបត្តិការរយៈពេល ១០ ឆ្នាំរបស់ខ្លួននៅក្នុងប្រទេស កម្ពុជា ជាមួយនឹងប្រាក់ចំណេញ ៣០០ លានដុល្លារ។ នេះបើតាមកាសែត Vietnam News។
ប្រព័ន្ធព័ត៌មានគ្រប់គ្រងដោយរដ្ឋរបស់ប្រទេស វៀតណាម មួយនេះ បានដកស្រង់សម្តីលោក Lê Đăng Dũng ប្រធានស្ដីទីក្រុមហ៊ុន Viettel ជាក្រុមហ៊ុនមេរបស់ក្រុមហ៊ុន Metfone ក្នុងអំឡុងពេលប្រារព្ធពិធីប្រតិបត្តិការរយៈពេល ១០ ឆ្នាំរបស់ក្រុមហ៊ុន Metfone នៅកម្ពុជា កាលពីសប្ដាហ៍មុន ដែលបាននិយាយថា ត្រឹមចុងឆ្នាំ ២០១៨ ក្រុមហ៊ុន Metfone បានជួយរកចំណូលឲ្យ Viettel ជិត ២៥០ លានដុល្លារ ឬជិត ៦ ដងខ្ពស់ជាងទុនវិនិយោគរបស់ខ្លួននៅកម្ពុជា។
លោកបានឲ្យដឹងថា ក្រុមហ៊ុន Viettel ចាត់ទុកបេសកកម្មថ្មីរបស់ក្រុមហ៊ុន Metfone ជាការធ្វើទំនើបកម្មសេដ្ឋកិច្ចជាមួយបច្ចេកវិទ្យាទំនើប ដែលរួមមាន ប្រព័ន្ធ 5G បញ្ញាសិប្បនិម្មិត និងទិន្នន័យអ៊ីនធឺណិត។
លោក Dũng បានថ្លែងថា៖ «បន្ទាប់ពីរយៈពេល ១០ឆ្នាំ នៃការអភិវឌ្ឍ យើងបានដឹងពីទិសដៅរបស់ក្រុមហ៊ុន Metfone ក្នុងការធ្វើជាក្រុមហ៊ុនឈានមុខគេ ក្នុងការបង្កើត សេដ្ឋកិច្ចឌីជីថល និងសង្គមនៅក្នុងប្រទេស កម្ពុជា»។
ក្រុមហ៊ុន Metfone បានរាយការណ៍ថា ខ្លួនបានរួមចំណែកបង់ពន្ធ ៥០០ លានដុល្លារដល់រដ្ឋាភិបាលកម្ពុជា និងបង្កើតការងារដោយផ្ទាល់បានចំនួន ៣ ០០០ នាក់។
ក្រុមហ៊ុន Metfone បានចាប់ផ្ដើមផ្ដល់សេវានៅកម្ពុជា កាលពីថ្ងៃទី ១៩ ខែកុម្ភៈ ឆ្នាំ ២០០៩។ Metfone បានប្រកាសថា បន្ទាប់ពីរយៈពេល ២ ឆ្នាំនៃប្រតិបត្តិការនៅកម្ពុជា ខ្លួនគ្រប់គ្រងទីផ្សារ ៤៨ ភាគរយ។
លោក អ៊ឹម វុត្ថា អ្នកនាំពាក្យនិយតករទូរគមនាគមន៍កម្ពុជា (TRC) បានឲ្យដឹងកាលពីម្សិលមិញថា អាជីវកម្មទូរគមនាគមន៍កម្ពុជាកំពុងរីកចម្រើន ហើយភាពជោគជ័យរបស់ប្រតិបត្តិករទូរគមនាគមន៍បានរួមចំណែកដល់ប្រាក់ចំណូលរដ្ឋាភិបាលតាមរយៈពន្ធ តម្លៃអាជ្ញាប័ណ្ណប្រចាំឆ្នាំ និងប្រាក់ចំណូលមិនមែនពន្ធផ្សេងទៀត។
លោកបន្ថែមថា ការអភិវឌ្ឍរបស់វិស័យនេះ បានរួមចំណែកក្នុងការជំរុញឲ្យវិស័យផ្សេងទៀត ដូចជាការអប់រំ អាជីវកម្ម ដោយសារតែវាផ្ដល់ការទំនាក់ទំនងកាន់តែងាយស្រួល និងធ្វើឲ្យជីវិតប្រជាជនកាន់តែងាយស្រួល។
លោកថ្លែងថា៖ «និន្នាការសេដ្ឋកិច្ចនៅពេលអនាគតនឹងត្រូវពឹងផ្អែកលើឌីជីថល ដូច្នេះយើងជឿជាក់ថា ក្រុមហ៊ុននេះ នឹងប្រើប្រាស់ប្រាក់ចំណេញនេះ ដើម្បីវិនិយោគកាន់តែច្រើន លើហេដ្ឋារចនាសម្ព័ន្ធហើយនឹងជួយកាន់តែច្រើនដល់ការបង្កើនសេដ្ឋកិច្ចក្នុងស្រុក»។
តួលេខបានពីក្រសួងប្រៃសណីយ៍ និងទូរគមនាគមន៍ ដែលបានចេញផ្សាយកាលពីខែមុនបានឲ្យដឹងថា រហូតមកដល់ចុងឆ្នាំ ២០១៨ ចំនួនស៊ីមកាតចុះបញ្ជី ដែលបានផ្ដល់ដោយប្រតិបត្តិករទូរស័ព្ទចល័តចំនួន ៦ បានកើនឡើងដល់ ១៩,៣ លានស៊ីមកាត។ ចំនួននេះបានកើនឡើងជិត ៤ ភាគរយបើធៀបនឹងកាលពីចុងឆ្នាំ ២០១៧។ ចំនួននេះស្មើនឹង ១២០ ភាគរយនៃចំនួនប្រជាជនសរុបរបស់ប្រទេស កម្ពុជា ជាង ១៦ លាននាក់៕ LA