ភ្នំពេញៈ ក្រុមហ៊ុនទូរស័ព្ទចល័ត Metfone បានបញ្ជាក់ពីការប្រើប្រាស់បច្ចេកវិទ្យាបណ្ដាញ 5G របស់ Huawei ទោះបីជាក្រុមហ៊ុនមេរបស់ខ្លួនបដិសេធបច្ចេកវិទ្យារបស់ក្រុមហ៊ុនចិននៅក្នុងប្រទេស វៀតណាមក៏ដោយ។ នេះបើតាមមន្ត្រីជាន់ខ្ពស់ផ្នែកទីផ្សាររបស់ Metfone។
Metfone ជាបុត្រសម្ព័ន្ធរបស់ Viettel Group ជាក្រុមហ៊ុនទូរស័ព្ទចល័តឈានមុខគេរបស់វៀតណាមគ្រប់គ្រងដោយយោធា។
អគ្គនាយកក្រុមហ៊ុន Viettel លោក Le Dang Dung បានឲ្យដឹងនៅក្នុងបទសម្ភាសមួយនៅការិយាល័យកណ្ដាលក្នុងទីក្រុងហាណូយថា ក្រុមហ៊ុននេះនឹងមិនធ្វើការងារជាមួយក្រុមហ៊ុន Huawei សម្រាប់បណ្ដាញ 5G របស់ខ្លួននៅប្រទេស វៀតណាម ទេ។ នេះបើតាមសារព័ត៌មាន Bloomberg ចេញផ្សាយកាលពីថ្ងៃចន្ទ។
លោក Dung បានឲ្យដឹងថា ក្រុមហ៊ុននេះនឹងពង្រាយឧបករណ៍របស់ក្រុមហ៊ុន Ericsson AB នៅទីក្រុងហាណូយ និងបច្ចេកវិទ្យារបស់ Nokia Oyj នៅទីក្រុងហូជីមិញ។
លោកបន្តថាក្រុមហ៊ុន Viettel នឹងប្រើប្រាស់បន្ទះឈីប 5G ពីក្រុមហ៊ុន Qualcomm Inc និងក្រុមហ៊ុនអាមេរិកផ្សេងទៀត។
លោក Dung បានប្រាប់ Bloomberg ថា៖ «យើងនឹងមិនធ្វើការងារជាមួយក្រុមហ៊ុន Huawei នោះទេនៅពេលនេះវាជាបញ្ហារសើបបន្តិចជាមួយក្រុមហ៊ុន Huawei»។
លោកបន្តថា៖ «មានរបាយការណ៍ថា វាមិនមានសុវត្ថិភាពក្នុងការប្រើប្រាស់ Huawei។ ដូច្នេះជំហររបស់ Viettel គឺថាដោយសារព័ត៌មានទាំងអស់នេះ យើងគួរតែដំណើរការជាមួយនឹងក្រុមហ៊ុនដែលមានសុវត្ថិភាព។ ដូច្នេះយើងជ្រើសរើសក្រុមហ៊ុន Nokia និងក្រុមហ៊ុន Ericsson មកពីអឺរ៉ុប»។
វិធានការនេះកំពុងបង្ហាញពីបំណងរបស់វៀតណាមដែលបានក្លាយជាប្រទេសអាស៊ានដំបូងដែលច្រើនចោលបច្ចេកវិទ្យា 5G របស់ Huawei Technologies Inc។
ទោះបីយ៉ាងនេះក្តី Metfone ដែលជាបុត្រសម្ព័ន្ធរបស់ Viettel នៅកម្ពុជាបានបញ្ជាក់ពីការប្រើប្រាស់បច្ចេកវិទ្យារបស់ក្រុមហ៊ុន Huawei ជាធម្មតា។
មន្ដ្រីជាន់ខ្ពស់ផ្នែកទីផ្សាររបស់ក្រុមហ៊ុននេះដែលស្នើសុំមិនបញ្ចេញឈ្មោះ បានប្រាប់ភ្នំពេញ ប៉ុស្តិ៍កាលពីថ្ងៃអង្គារថា លោកមិនច្បាស់អំពីការសម្រេចចិត្តរបស់ក្រុមហ៊ុនមេថានឹងត្រូវបានអនុវត្តចំពោះប្រតិបត្តិការរបស់ខ្លួនទាំងអស់នៅបរទេសនោះទេ។
ប៉ុន្តែលោកបានឲ្យដឹងថា យោងតាមផែនការក្រុមហ៊ុន Metfone នឹងដំណើរការសាកល្បង 5G របស់ខ្លួនក្នុងភាពជាដៃគូជាមួយក្រុមហ៊ុន Huawei Technologies Co Ltd នៅខែក្រោយ។
លោកថ្លែងថា៖ «ក្រុមហ៊ុន Metfone នឹងចាប់ផ្ដើមសាកល្បង 5G ដែលប្រើប្រាស់បច្ចេកវិទ្យារបស់ក្រុមហ៊ុន Huawei នៅថ្ងៃទី ៥ ខែកញ្ញាខែក្រោយ»។
លោក អ៊ឹម វុត្ថា អ្នកនាំពាក្យនិយតករទូរគមនាគមន៍កម្ពុជា (TRC) បានឲ្យដឹងថា កម្ពុជាគឺជាទីផ្សារសេរី ដូច្នេះក្រុមហ៊ុនជាច្រើនមានជម្រើសសម្រាប់អាជីវកម្មរបស់ពួកគេ។ លោកថ្លែងថា៖ «យើង កម្ពុជា មិនហាមឃាត់បច្ចេកវិទ្យារបស់ប្រទេសណាមួយនោះទេ វាអាស្រ័យលើប្រតិបត្តិករខ្លួនឯងក្នុងការជ្រើសរើសបច្ចេកវិទ្យាណាមួយ»។
លោកបន្ថែមថា បច្ចុប្បន្នឧបករណ៍របស់ក្រុមហ៊ុន Huawei ត្រូវបានមើលឃើញថាមានភាពពេញនិយមក្នុងចំណោមប្រជាជនកម្ពុជា បន្ទាប់ពីទូរស័ព្ទ iPhone និងទូរស័ព្ទ Samsung ។
លោកបញ្ជាក់ថា៖ «យើងជាប្រទេសអ្នកប្រើប្រាស់ យើងមិនមែនជាប្រទេសផលិតនោះទេ ដូច្នេះការដណ្តើមគ្នារវាងបណ្ដាប្រទេសផលិតគឺជារឿងរបស់ពួកគេ»។
ក្រុមហ៊ុន Smart Axiata Co Ltd ជាប្រតិបត្តិករទូរស័ព្ទចល័តឈានមុខគេរបស់កម្ពុជាកាលពីខែកក្កដាសាកល្បងបណ្តាញ 5G ក្នុងភាពជាដៃគូជាមួយក្រុមហ៊ុន Huawei Technologies Co Ltd ដែលសេវានេះនឹងអាចដំណើរការបណ្ដាញទូរស័ព្ទចល័តនៅចុងឆ្នាំនេះ។
វៀតណាមកំពុងចូលរួមដោយស្ងៀមស្ងាត់ជាមួយរដ្ឋបាលលោក ត្រាំ ដែលបានហាមឃាត់ក្រុមហ៊ុន Huawei មិនឲ្យទិញបច្ចេកវិទ្យាអាមេរិកដោយសារតែការបារម្ភសន្ដិសុខជាតិ។
សេចក្ដីសម្រេចចិត្តរបស់ប្រទេសនេះក្នុងការចៀសវាងក្រុមហ៊ុន Huawei គឺខុសពីប្រទេសផ្សេងទៀតក្នុងតំបន់ដូចជាហ្វីលីពីន ថៃ ម៉ាឡេស៊ី និងកម្ពុជា ដែលបើកចំហក្នុងការប្រើប្រាស់បច្ចេកវិទ្យារបស់ Huawei។
រដ្ឋាភិបាលកម្ពុជាកាលពីខែមេសាបានចុះហត្ថលេខាលើអនុស្សរណៈនៃការយោគយល់គ្នាជាមួយ Huawei ជាក្រុមហ៊ុនបច្ចេកវិទ្យាឈានមុខគេរបស់ប្រទេសចិនក្នុងការបង្កើតបណ្ដាញ 5G នៅក្នុងប្រទេស កម្ពុជា៕LA