.jpg)
ឥណទានផ្នែកកសិកម្មត្រូវបានគ្រឹះស្ថានមីក្រូហិរញ្ញវត្ថុផ្តល់យ៉ាងច្រើនទៅដល់ប្រជាកសិករនៅទីជនបទ។ ហុង មិនា
ភ្នំពេញៈ វិស័យមីក្រូហិរញ្ញវត្ថុ (MFI) បានចូលរួមចំណែកយ៉ាងច្រើនក្នុងការជំរុញកំណើនសេដ្ឋកិច្ចនៅទីជនបទ ខណៈអ្នកនៅក្នុងវិស័យនេះជំរុញឲ្យមានការផ្តល់កម្ចីប្រកបដោយប្រសិទ្ធភាព។ នេះបើយោងតាមការអះអាងរបស់ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា CMA។
នៅក្នុងឱកាសចូលរួមសិក្ខាសាលាស្តីពី «ការអភិវឌ្ឍសេដ្ឋកិច្ចជនបទតាមរយៈវិស័យមីក្រូហិរញ្ញវត្ថុ» កាលពីថ្ងៃម្សិលមិញលោក គា បូរាណ ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជាបាននិយាយថា ជាមួយនឹងប្រាក់កម្ចីជាង ៦,៥ ពាន់លានដុល្លារដែលបញ្ចេញដោយគ្រឹះស្ថានមីក្រូហិរញ្ញវត្ថុគិតត្រឹមឆមាសទី ១ ឆ្នាំ ២០១៩ វិស័យមីក្រូហិរញ្ញវត្ថុកំពុងចូលរួមចំណែកយ៉ាងសកម្មនៅក្នុងដំណើរការអភិវឌ្ឍជនបទនៅប្រទេសកម្ពុជា។
លោកបានបន្តថា បច្ចុប្បន្នប្រតិបត្តិការហិរញ្ញវត្ថុរបស់គ្រឹះស្ថានមីក្រូហិរញ្ញវត្ថុ បានគ្របដណ្តប់ប្រមាណ ៩០ ភាគរយនៃភូមិសរុបទូទាំងប្រទេស។ សម្រាប់ឆ្នាំ ២០១៩ ការផ្តល់ឥណទានអាចនឹងមានកំណើនប្រមាណ ២៥ ភាគរយ។
លោកថ្លែងថា៖ «ជាមួយនឹងភាពរីកចម្រើននេះ អត្រានៃកម្ចីវ័ណ្ឌកររបស់ប្រជាជនខ្មែរក៏មានកម្រិតទាបដែរ»។
ទោះយ៉ាងនេះក្តីលោកបានលើកឡើងថា ការរីកចម្រើននៃវិស័យមីក្រូហិរញ្ញវត្ថុ ក៏អាចធ្វើឲ្យប្រទេសជួបវិបត្តិផងដែរ ប្រសិនបើការផ្តល់ឥណទាន និងការប្រើប្រាស់ត្រូវបានធ្វើឡើងមិនត្រឹមត្រូវ។
ដោយបានលើកឡើងពីបទពិសោធរបស់ប្រទេសមួយចំនួនដូចជា នីហ្សេរីយ៉ា និងបូស្ន៊ី ដែលវិស័យមីក្រូហិរញ្ញវត្ថុរីកចម្រើនខ្លាំងហួសហេតុនោះលោក បូរាណ បានឲ្យដឹងថា ប្រទេសទាំងនោះសុទ្ធតែបានជួបនឹងវិបត្តិឥណទាន។ លោកថ្លែងថា៖ «ក្នុងនាមជាសមាគមយើងខិតខំធ្វើការផ្សព្វផ្សាយ និងផ្តល់ព័ត៌មានដើម្បីបញ្ចៀសនូវហានិភ័យទាំងអស់នោះកើតឡើងនៅកម្ពុជា»។
តាមលោក បូរាណ គិតត្រឹមឆមាសទី ១ ឆ្នាំ ២០១៩ ការសងត្រឡប់នៅក្នុងវិស័យមីក្រូហិរញ្ញវត្ថុនៅកម្ពុជានៅមានភាពល្អប្រសើរដោយឥណទានមិនល្អ ស្ថិតក្នុងអត្រា ១,២ ទៅ ១,៣ ភាគរយតែប៉ុណ្ណោះ។
លោកបន្តថា កម្ចីខូចភាគច្រើនបណ្តាលមកពីកត្តាមួយចំនួនដែលមិនអាចព្យាករបានដូចជា កត្តាធម្មជាតិ និងស្ថានភាពសេដ្ឋកិច្ចគ្រួសារមានការប្រែប្រួលជាដើម។
លោក ហេង បូមករា អគ្គនាយករងត្រួតពិនិត្យធនាគារជាតិនៃកម្ពុជាបាននិយាយថា វិស័យមីក្រូហិរញ្ញវត្ថុនៅកម្ពុជាក្នុងពេលនេះមានកំណើនទាំងប្រាក់បញ្ញើ និងកម្ចី។ កំណើននេះគឺបង្ហាញពីភាពរឹងមាំ និងទំនុកចិត្តរបស់សាធារណជន ខណៈដែលអាជ្ញាធរ និងគ្រឹះស្ថានមីក្រូហិរញ្ញវត្ថុកំពុងធ្វើកិច្ចការរួមគ្នាជាច្រើនដើម្បីបង្កើតគោលការណ៍ថ្មីគាំពារដល់ប្រជាជន។
លោកថ្លែងថា៖ «ការរួមចំណែករបស់វិស័យមីក្រូហិរញ្ញវត្ថុពិតជាមានសារៈសំខាន់ណាស់នៅក្នុងការលើកកម្ពស់ជីវភាពប្រជាជនកម្ពុជា និងបានចូលរួមចំណែកយ៉ាងសកម្មក្នុងការជំរុញប្រតិបត្តិការហិរញ្ញវត្ថុនៅកម្ពុជាដែលនេះគឺជាជំហានដ៏ល្អមួយដើម្បីឈានទៅរកការអភិវឌ្ឍសេដ្ឋកិច្ចនៅទីជនបទ»។
គិតត្រឹមខែកក្កដា ឆ្នាំ ២០១៩ គ្រឹះស្ថានមីក្រូហិរញ្ញវត្ថុនៅកម្ពុជាមានចំនួន ៨២ ក្នុងនោះគ្រឹះស្ថានមីក្រូហិរញ្ញវត្ថុទទួលប្រាក់កម្ចីមានចំនួន ៧។
របាយការណ៍ប្រចាំឆមាសទី ១ ឆ្នាំ ២០១៩ របស់ធនាគារជាតិនៃកម្ពុជាបានបង្ហាញថា អត្រាការប្រាក់កម្ចីជាប្រាក់រៀល និងដុល្លាររបស់គ្រឹះស្ថានមីក្រូហិរញ្ញវត្ថុស្ថិតក្នុងអត្រា ១៧,៧ ភាគរយ និង ១៦,៩៥ ភាគរយ ក្នុងមួយឆ្នាំ៕LA
