ភ្នំពេញ៖ ធនាគារ Mizuho Bank របស់ប្រទេស ជប៉ុន កាលពីសប្តាហ៍មុនបានឲ្យដឹងថា ខ្លួនបានរៀបចំកិច្ចព្រមព្រៀងគម្រោងហិរញ្ញប្បទានជាលើកដំបូងនៅកម្ពុជា ដោយនឹងផ្ដល់ហិរញ្ញប្បទានទៅដល់គម្រោងបណ្តាញបញ្ជូនអគ្គិសនីរបស់ក្រុមហ៊ុន Cambodian Transmission Limited (CTL)។
សេចក្ដីប្រកាសព័ត៌មានចេញផ្សាយកាលពីថ្ងៃពុធបានឲ្យដឹងថា ធនាគារ Mizuho Bank បានសហការជាមួយធនាគារ ING Bank NV ផ្ដល់កម្ចីចំនួន ៥៥ លានដុល្លារ សម្រាប់គម្រោងបញ្ជូនថាមពលនៅកម្ពុជា ដើម្បីឆ្លើយតបនឹងតម្រូវការអគ្គិសនីដែលកំពុងកើនឡើង។
សេចក្ដីប្រកាសព័ត៌មាននេះបន្តថា គម្រោងនេះតភ្ជាប់អនុស្ថានីយ ២ ដែលមានទីតាំងនៅភាគខាងជើងទីក្រុងភ្នំពេញ និងខេត្តកំពង់ចាម ជាមួយនឹងខ្សែថាមពលសរុប ២៣០ គីឡូវ៉ុល ដែលមានប្រហែលសរុបជាង ១០០ គីឡូម៉ែត្រ។ «ការអភិវឌ្ឍសេដ្ឋកិច្ចរបស់ប្រទេស កម្ពុជា បានជំរុញឲ្យមានកំណើនតម្រូវការការផ្គត់ផ្គង់ថាមពលប្រកបដោយស្ថិរភាព។ វិស័យថាមពលនៅពេលនេះ គឺជាវិស័យដ៏សំខាន់នៅក្នុងគោលនយោបាយសេដ្ឋកិច្ច»។ នេះបើតាមសេចក្ដីប្រកាសព័ត៌មាន។
ធនាគារទាំង ២ បានចុះកិច្ចព្រមព្រៀងកាលពីថ្ងៃទី ១២ ខែមីនា លើកម្ចីរយៈពេល ១០ ឆ្នាំទៅឲ្យក្រុមហ៊ុន CTL។
ខ្សែបញ្ជូនថាមពលនៅកម្ពុជា គ្រប់គ្រងទាំងមូលដោយក្រុមហ៊ុនបុត្រសម្ព័ន្ធ HNG Capital Sdn Bhd ដែលបានចាប់ផ្ដើមគម្រោងបញ្ជូនថាមពលទៅតំបន់ជាយទីក្រុងភ្នំពេញ ស្ថិតនៅក្រោមកិច្ចព្រមព្រៀងរយៈពេល ២៥ ឆ្នាំ ដែលខ្លួនបានចុះហត្ថលេខាជាមួយនឹងអគ្គិសនីកម្ពុជា ដែលជាក្រុមហ៊ុនថាមពលអគ្គិសនីគ្រប់គ្រងដោយរដ្ឋកាលពីខែសីហា ឆ្នាំ ២០១៣។
សេចក្ដីប្រកាសព័ត៌មាននេះបន្តថា៖ «ហិរញ្ញប្បទានកម្ចីថ្មីរបស់យើងដល់គម្រោងនេះ គឺសហការផ្ដល់ហិរញ្ញប្បទានជាមួយធនាគារ ING Bank N.V និងត្រូវបានគាំទ្រការធានាហានិភ័យនយោបាយរយៈពេល ១០ ឆ្នាំ ពីទីភ្នាក់ងារធានាការវិនិយោគពហុភាគី (MIGA) របស់ធនាគារពិភពលោក បន្ថែមលើការធានាពីរដ្ឋាភិបាលកម្ពុជាលើរយៈពេលនៃគម្រោងនេះ»។
សេចក្ដីប្រកាសព័ត៌មានបន្ថែមថា នេះក៏ជាការធានាលើកដំបូងរបស់ MIGA នៅកម្ពុជា។
លោក វិចទ័រ ហ្សូនា អ្នកនាំពាក្យក្រសួងរ៉ែ និងថាមពល បានឲ្យដឹងកាលពីលើកមុនថា តម្រូវការអគ្គិសនីនឹងកើនឡើងជាមធ្យមពី ១៦ ទៅ ១៨ ភាគរយប្រចាំឆ្នាំ ទោះបីជាវាបានកើនឡើង ២៥ ភាគរយ កាលពីឆ្នាំមុនធៀបនឹងឆ្នាំ ២០១៨ ក៏ដោយ។ លោកបន្តថា ប្រទេស កម្ពុជា នៅពេលបច្ចុប្បន្នអាចផលិតថាមពលអគ្គិសនីបានប្រហែលពី ៧០-៨០ ភាគរយ នៃការប្រើប្រាស់ថាមពលអគ្គិសនីក្នុងស្រុកសរុប។
កម្ពុជាផលិតអគ្គិសនី ១១ ២៦១ គីឡូវ៉ាត់ម៉ោង កាលពីឆ្នាំមុនកើនឡើង ២១ ភាគរយ បើធៀបនឹង ៩ ៤២៧ គីឡូវ៉ាត់ម៉ោង កាលពីឆ្នាំ ២០១៨។ នេះបើយោងតាមក្រសួងរ៉ែ៕ LA