.jpg)
ក្រុមការងារចុងភៅ សេង ហុកហេង រៀបចំបើកទូកុងតឺន័រផ្ទះបាយចល័ត។ សហការី
ភ្នំពេញៈ ផ្ទះបាយចល័ត ឬ Mobile Kitchen ដ៏ទំនើបមួយត្រូវបានដាក់ឲ្យដំណើរការជាផ្លូវការហើយកាលពីចុងខែសីហាមុន ដោយចុងភៅ សេង ហុកហេង ខណៈផ្ទះបាយចល័តនេះកំពុងទទួលបាននូវការចាប់អារម្មណ៍ជាច្រើនពីសំណាក់អ្នកមានបំណងរៀបចំពិធីផ្សេងៗ។
ផ្ទះបាយចល័តដែលមានតម្លៃប្រមាណ ៥ ម៉ឺនដុល្លារ និងមានសមត្ថភាពបម្រើអាហារភ្ញៀវចំនួន ២០០ នាក់ក្នុង ១ កម្មវិធីនេះត្រូវបានរៀបចំឡើងនៅក្នុងទូកុងតឺន័រមួយដែលមានកម្ពស់ ៤,៤ ម៉ែត្រ បណ្តោយ ៦,៨ ម៉ែត្រ និងទទឹង ២,៤ ម៉ែត្រ (អាចពង្រីកដល់ ៦,៨ ម៉ែត្រ)។
ផ្ទះបាយចល័ត មានបំពាក់នូវឧបករណ៍ដែលមានបច្ចេកវិទ្យាទំនើបៗជាច្រើនដូចជា ចង្ក្រានខ្យល់ប្រើឧស្ម័នហ្គាស ដែលផ្តល់កម្តៅខ្លាំងចំនួន ២ ចង្ក្រានខ្ទះត្នោត ៤ ចង្ក្រានអេឡិចត្រូនិក ធុងស្តុកទឹកសម្រាប់ប្រើប្រាស់ក្នុងផ្ទះបាយ ម៉ាស៊ីនបូមទឹក និងខ្យល់ចេញ-ចូល ម៉ាស៊ីនបូមទឹកកខ្វក់ចេញ កន្លែងលាងបន្លែ ទូក្លាស្សេ ទូចំហុយ និងសម្ភារបង្ការគ្រោះអគ្គិភ័យ ជាដើម។
លោក ទូច រដ្ឋា នាយកគ្រប់គ្រងចុងភៅ សេង ហុកហេង បានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ជាទូទៅនៅពេលត្រូវការធ្វើម្ហូបទទួលភ្ញៀវក្នុងពិធីអ្វីមួយ គេតែងធ្វើរោងចុងភៅដើម្បីចម្អិនម្ហូបអាហារ ប៉ុន្តែឆ្លងកាត់បទពិសោធបម្រើសេវាកម្មនេះជាច្រើនឆ្នាំរួចមកចុងភៅ សេង ហុកហេង បាននាំមកនូវការផ្លាស់ប្តូរថ្មី ១ ទៀតគឺផ្ទះបាយចល័តដែលត្រូវបានរៀបចំក្នុងទូកុងតឺន័រតែម្តង។ ផ្ទះបាយចល័តនេះត្រូវបានដាក់ឲ្យដំណើរការកាលពីថ្ងៃទី ២២ ខែសីហា ឆ្នាំ ២០២០។
លោកបន្តថា ការរៀបចំផ្ទះបាយក្នុងទូកុងតឺន័របែបនេះ មិនត្រឹមតែមានភាពងាយស្រួលសម្រាប់ការចល័តប៉ុណ្ណោះទេ ប៉ុន្តែអ្វីដែលមានលក្ខណពិសេសនោះ គឺភាពឆាប់រហ័ស និងស្តង់ដាអនាម័យខ្ពស់ផងដែរ។
លោកថ្លែងថា៖ «ផ្ទះបាយចល័តនេះ គឺជានវានុវត្តន៍ថ្មីមួយ (គំនិតច្នៃប្រឌិតខ្ពស់) ដើម្បីធ្វើទំនើបកម្ម និងជាការចាប់ផ្តើមធ្វើឲ្យប្រសើរឡើងនូវបរិយាកាស និងលក្ខខណ្ឌការងារក្នុងកន្លែងធ្វើជាចុងភៅចល័ត»។
លោកបន្ថែមថា ផ្ទះបាយចល័តមិនត្រឹមតែមិនត្រូវការទីតាំងសង់រោងប៉ុណ្ណោះទេ ប៉ុន្តែវាថែមទាំងមិនបង្កឲ្យមានជាសំណល់ផ្សេងៗ និងសំរាមនៅរាយប៉ាយនៅទីតាំងក្បែរៗនោះទៀតផង។ លោកបន្តថា៖ «ផ្ទះបាយចល័តមិនបានធ្វើឲ្យប៉ះពាល់ដល់បរិស្ថាននៅជុំវិញកន្លែងរៀបចំពិធីឡើយ»។
បច្ចុប្បន្នផ្ទះបាយចល័តនេះក៏ត្រូវបានអតិថិជនជួលឲ្យទៅបម្រើសេវាកម្មម្ហូបអាហារនៅតាមបណ្តាខេត្តផងដែរ។ នេះបើតាមលោក រដ្ឋា។
លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ដែលបានទៅទស្សនាផ្ទះបាយចល័តរបស់ចុងភៅ សេង ហុកហេង កាលពីពេលថ្មីៗនេះបានទទួលស្គាល់ថា ផ្ទះបាយក្នុងកុងតឺន័រនេះពិតជាល្អ និងមានគុណភាពអនាម័យខ្ពស់កម្រិតស្តង់ដា។
យោងតាមលោក រដ្ឋា ជាមួយនឹងផែនការផ្តល់នូវផ្ទះបាយដ៏ទំនើប និងមានអនាម័យខ្ពស់ដល់ប្រជាជនខ្មែរ ព្រមជាមួយនឹងការវិវឌ្ឍរបស់សង្គមនោះ ចុងភៅ សេង ហុកហេង ក៏មានផែនការនឹងបន្ថែមផ្ទះបាយទំនើបនេះចំនួន ៥ ទៀតផងដែរ៕ LA
