ភ្នំពេញៈ ភ្នាក់ងារវាយតម្លៃចំណាត់ថ្នាក់ឥណទាន Moody''s Investors Service Inc បានរក្សាការព្យាកររបស់ខ្លួនសម្រាប់កំណើនសេដ្ឋកិច្ចកម្ពុជាសម្រាប់ឆ្នាំនេះនៅក្នុងអត្រាជាមធ្យម ៥,៥ ភាគរយ។ នេះបើយោងតាមសេចក្តីប្រកាសក្រុមហ៊ុននេះកាលពីថ្ងៃអង្គារ។
Moody បានឲ្យដឹងថា អត្រានេះត្រូវបានគាំទ្រដោយសេចក្ដីសម្រេចចិត្តពេលថ្មីៗរបស់គណៈកម្មការអឺរ៉ុប (EC) ក្នុងការព្យួរប្រព័ន្ធអនុគ្រោះពន្ធ ១ ភាគ ៥ នៃការនាំចេញរបស់កម្ពុជាទៅទីផ្សារអឺរ៉ុប ខណៈផលប៉ះពាល់អវិជ្ជមាននឹងអាចកើតឡើងលើវិស័យទេសចរណ៍ពីការរីករាលដាលនៃវីរុស Covid-19 ជាជំងឺដែលបណ្ដាលឡើងដោយវីរុសកូរ៉ូណាថ្មី។
Moody ក៏បានរក្សាការផ្ដល់ចំណាត់ថ្នាក់ឥណទានរបស់កម្ពុជាក្នុងកម្រិត B2 ជាមួយនឹងចក្ខុវិស័យប្រកបដោយស្ថិរភាព។
ការព្យាករឆ្នាំ ២០២០ របស់ភ្នាក់ងារវាយតម្លៃឥណទានពិភពលោកមួយនេះបានខុសគ្នាពីការព្យាកររបស់រដ្ឋាភិបាលកម្ពុជាដែលថានឹងមានកំណើនសេដ្ឋកិច្ច ៦,៥ ភាគរយ ខណៈធនាគារអភិវឌ្ឍន៍អាស៊ី និងធនាគារពិភពលោកក្នុងរង្វង់ ៦,៨ ភាគរយ។
រួមផ្សំជាមួយនឹងការព្យួរផ្នែកខ្លះនៃ EBA ការបង្កើនប្រាក់ឈ្នួលប្រចាំខែអប្បបរមារបស់កម្ពុជា និងការដាក់សម្ពាធធៀបនឹងសមត្ថភាពប្រកួតប្រជែងដែលនឹងកាត់បន្ថយភាពទាក់ទាញរបស់ខ្លួន ដោយសារតែមូលដ្ឋានផលិតនឹងរារាំងការវិនិយោគផ្ទាល់ពីបរទេស (FDI) ថ្មីៗ។ នេះបើយោងតាម Moody។
Moody បន្តថា៖ «លំហូរចូល FDI ប្រកបដោយនិរន្តរភាព ដោយយ៉ាងហោចណាស់មានសារៈសំខាន់ក្នុងការផ្ដល់មូលនិធិមួយផ្នែកដល់ឱនភាពគណនីចរន្តដែលកើនឡើង។ FDI និងការវិនិយោគក្នុងស្រុកក្នុងវិស័យកាត់ដេរ និងស្បែកជើងជាកត្តាជំរុញដ៏សំខាន់មួយនៃកំណើនសេដ្ឋកិច្ចនៅពេលថ្មីៗរបស់កម្ពុជា។
Moody បានបញ្ជាក់ថា៖ «EU គឺជាទីផ្សារនាំចេញឈានមុខគេរបស់ប្រទេសកម្ពុជា និងជាអតិថិជនធំជាងគេសម្រាប់សម្លៀកបំពាក់ និងវាយនភណ្ឌរបស់ខ្លួន ដែលធ្វើឲ្យមានការផ្លាស់ប្តូរឥណទានអវិជ្ជមាន»។
ការព្យួរមួយផ្នែកដែលមិនទាន់ត្រូវបានផ្ដល់សច្ចាប័នដោយសភា និងក្រុមប្រឹក្សាអឺរ៉ុប គឺគ្រោងនឹងចាប់ផ្ដើមអនុវត្តនៅថ្ងៃទី ១២ ខែសីហា បន្ទាប់ពីបានសម្រេចកាលពីថ្ងៃទី ១២ កុម្ភៈ។
ភ្នាក់ងារនេះបានបន្តថា កាលពីឆ្នាំ ២០១៩ រដ្ឋាភិបាលបានបង្កើនប្រាក់ឈ្នួលប្រចាំខែអប្បបរមា សម្រាប់កម្មករកាត់ដេរ និងស្បែកជើងពី ១៧០ ដុល្លារ កាលពីឆ្នាំ ២០១៨ ដល់ ១៨២ ដុល្លារ និងពី ១៥៣ ដុល្លារ កាលពីឆ្នាំ ២០១៧។ រដ្ឋាភិបាលគ្រោងនឹងបង្កើនប្រាក់ឈ្នួលដល់ ២៥០ ដុល្លារ ត្រឹមឆ្នាំ ២០២៣។
ផ្ទុយទៅវិញដៃគូប្រកួតប្រជែងក្នុងតំបន់ ដូចជាប្រទេសបង់ក្លាដែស និងវៀតណាមទទួលអត្ថប្រយោជន៍ពីទំហំសេដ្ឋកិច្ចក្នុងការផលិតសម្លៀកបំពាក់ច្រើនជាងកម្ពុជា និងការចំណាយលើកម្លាំងពលកម្មកាន់តែទាប។
ឧស្សាហកម្មវាយនភណ្ឌ និងកាត់ដេររួមចំណែក ១១ ភាគរយ នៃ GDP របស់ប្រទេសកម្ពុជា និងជាកត្តាជំរុញមួយនៃកំណើនដ៏សំខាន់របស់សេដ្ឋកិច្ច។ ប្រហែល ៤៥ ភាគរយ នៃការនាំចេញសរុបរបស់ខ្លួនកាលពីឆ្នាំ ២០១៨ គឺទៅអឺរ៉ុបដែលជិត ៩៦ ភាគរយបានទទួលអត្ថប្រយោជន៍ពីការអនុគ្រោះពន្ធនាំចូលពាណិជ្ជកម្ម EBA។
ផ្អែកលើការគណនារបស់ Moody ដែលប្រើប្រាស់ស្ដង់ដាពន្ធនាំចូលរបស់អឺរ៉ុប ពន្ធជាមធ្យមស្ថិតក្នុងអត្រា ១២ ភាគរយ សម្រាប់សម្លៀកបំពាក់ និង ១៦ ភាគរយ សម្រាប់ស្បែកជើងដែលការព្យួរ ២០ ភាគរយ នៃ EBA នេះនឹងធ្វើឲ្យកម្ពុជាខាតបង់ប្រមាណជាង ១០០ លានដុល្លារ។
Moody ឲ្យដឹងថា៖ «ដោយសារការអភិវឌ្ឍទាំងនេះ និងទំនងជាផលប៉ះពាល់អវិជ្ជមានលើទេសចរណ៍ និងការប្រើប្រាស់ ព្រោះការរីករាលដាលវីរុសកូរ៉ូណា ការព្យាករកំណើនរបស់យើងសន្មតក្នុងចំនួនមធ្យម ៥,៥ ភាគរយ ក្នុងឆ្នាំ ២០២០ ធៀបនឹង ៧ ភាគរយ កាលពីឆ្នាំ ២០១៩»៕LA
Sangeetha Amarthalingam