.jpg)
បុគ្គលិកផ្នែកសេវាដឹកជញ្ជូនរបស់ក្រុមហ៊ុន Muuve កំពុងដឹកអាហារឲ្យអតិថិជន។ រូបថត សហការី
ភ្នំពេញ: ក្រុមហ៊ុន Muuve ជាក្រុមហ៊ុនដឹកជញ្ជូនអាហារក្នុងស្រុកបានប្រកាសភាពជាដៃគូជាមួយក្រុមហ៊ុនមូលធនវិនិយោគរួម Ooctane គ្រប់គ្រងដោយ WorldBridgeGroup ដើម្បីបំពេញតម្រូវការទីផ្សារនៅកម្ពុជា។ នេះបើតាមនាយកប្រតិបត្តិក្រុមហ៊ុន Muuve។
លោក ប៉ាញ ផានិត្យ នាយកប្រតិបត្តិក្រុមហ៊ុន Muuve បានឲ្យដឹងក្នុងសេចក្តីប្រកាសព័ត៌មានកាលពីថ្ងៃអង្គារថា ក្រុមហ៊ុនលោកចង់ផ្តល់ឲ្យអតិថិជននូវសេវាកម្មដឹកជញ្ជូនម្ហូបអាហារប្រភេទថ្មីនៅកម្ពុជា។ លោកថ្លែងថា៖ «យើងផ្ដោតសំខាន់ទៅលើការផ្ដល់សេវាកម្មអតិថិជនប្រកបដោយភាពងាយស្រួលនៅក្នុងកម្មវិធី App របស់យើងដូចជាការដាក់ទីតាំងនៅលើផែនទីដែលអ្នកចង់ឲ្យយើងដឹកជញ្ជូនអាហារទៅឲ្យគ្រប់ទីកន្លែង។ យើងសង្កេតឃើញថា អតិថិជនពិតជាពេញចិត្តចំពោះព័ត៌មានលម្អិតដូចនេះ ជាពិសេសនៅក្នុងទីក្រុងភ្នំពេញដែលអាសយដ្ឋានពិបាករក»។
លោក សៀ ឫទ្ធី ប្រធានក្រុមហ៊ុន WorldBridgeGroup និយាយថា ការយកចិត្តទុកដាក់របស់ក្រុមហ៊ុន Muuve ចំពោះការផ្តល់សេវាកម្មល្អដល់អតិថិជននូវជម្រើសអាហារជាច្រើនមុខ និងបុគ្គលិកប្រកបដោយទេពកោសល្យ គឺជាអ្វីដែលធ្វើឲ្យពួកគេប្លែកពីក្រុមហ៊ុនដឹកជញ្ជូនអាហារផ្សេងទៀត។ លោកថ្លែងថា៖ «យើងមានសេចក្តីសោមនស្សរីករាយស្វាគមន៍ Muuve ចូលមកកាន់ WorldBridgeGroup ហើយយើងនឹងផ្ដល់ឲ្យពួកគេនូវធនធាន និងបណ្តាញយើងដែលមានដើម្បីគាំទ្រ និងជួយពួកគេ»។
លោក ជួន វឌ្បនៈ សហស្ថាបនិក និងជាប្រធានផ្នែកអភិវឌ្ឍន៍អាជីវកម្មរបស់ក្រុមហ៊ុន Muuve បានឲ្យដឹងថា៖ «ភាពខុសគ្នា និងចំណុចពិសេសរបស់យើងពីសេវាកម្មដឹកជញ្ជូនម្ហូបផ្សេងៗទៀតគឺ យើងផ្តល់ជូននូវសេរីភាពក្នុងការដឹកជញ្ជូនរបស់ដៃគូដឹកជញ្ជូនរបស់យើងដែលយើងហៅគាត់ថា Muuvers។ យើងផ្ដល់ឱកាសសម្រាប់ពួកគេរកប្រាក់ចំណូលបន្ថែមដោយទទួលបានការងារបន្ថែមលើអ្វីដែលពួកគេធ្វើប្រចាំថ្ងៃ»។
លោកបន្តថា៖ «យើងបាននិងកំពុងរិះរកដំណោះស្រាយជួយ Muuvers ក្នុងការស្វែងរកយានជំនិះឲ្យពួកគាត់ប្រើប្រាស់សម្រាប់ដឹកជញ្ជូនអាហារ ប្រសិនបើពួកគេមិនទាន់មានយានជំនិះដរាបណាពួកគាត់ បង្ហាញចំណាប់អារម្មណ៍នៅក្នុងការចូលរួមជាសមាជិកគ្រួសារ Muuver របស់យើង»។
សេចក្តីប្រកាសព័ត៌មានឲ្យដឹងថា Muuve ជាកម្មវិធី App សេវាកម្មកុម្ម៉ង់ និងដឹកជញ្ជូនអាហារដែលមានការគាំទ្រដល់អាជីវកម្មក្នុងស្រុក និងប្រជាជនកម្ពុជាតាមរយៈការផ្តល់ជូននូវបច្ចេកវិទ្យាកម្រិតខ្ពស់សម្រាប់សេវា ដើម្បីសម្រួលដល់របៀបរស់នៅពេលបច្ចុប្បន្ននេះ។ Muuve ត្រូវបានបង្កើតឡើងក្នុងឆ្នាំ ២០១៨ ហើយត្រូវបានក្រសួងប្រៃសណីយ៍ និងទូរគមនាគមន៍ប្រគល់ពានរង្វាន់ «ការចាប់ផ្តើមអាជីវកម្មប្រចាំឆ្នាំ» នៅឆ្នាំ ២០១៩៕LA
