ភ្នំពេញៈ ក្រុមហ៊ុន MVL TADA (Cambodia) Co., Ltd មានគម្រោងបញ្ចេញថវិកាដំបូងប្រមាណ ២០ លានដុល្លារ វិនិយោគលើការសាងសង់រោងចក្រដំឡើងម៉ូតូកង់ ៣ (តុក តុក) ដែលដំណើរការដោយអគ្គិសនីនៅក្នុងប្រទេសកម្ពុជា នាចុងឆ្នាំ ២០២០ ឬដើមឆ្នាំ ២០២១ ខាងមុខ ដើម្បីបំពេញតម្រូវការប្រើប្រាស់ក្នុងស្រុក និងទីផ្សារក្នុងតំបន់ផងដែរ។
គម្រោងនេះត្រូវបានលើកមកបង្ហាញក្នុងឱកាសនៃការជួបពិភាក្សាគ្នារវាងលោក ឡុង ឌីម៉ង់ ឯកអគ្គរាជទូតកម្ពុជានៅប្រទេសកូរ៉េខាងត្បូង ជាមួយនឹងលោក Kay Woo ស្ថាបនិកក្រុមហ៊ុន MVL នៅក្នុងប្រទេសកូរ៉េខាងត្បូង កាលពីថ្ងៃចន្ទ។
MVL TADA (Cambodia) Co., Ltd គឺជាក្រុមហ៊ុនបុត្រសម្ព័ន្ធរបស់ក្រុមហ៊ុនដែលមានមូលដ្ឋានក្នុងប្រទេសកូរ៉េខាងត្បូង MVL និងបានចុះបញ្ជីនៅកម្ពុជា កាលពីដើមឆ្នាំ ២០១៩។
លោក ឡុង ឌីម៉ង់ បានប្រាប់ភ្នំពេញប៉ុស្តិ៍កាលពីថ្ងៃអង្គារថា ក្រុមហ៊ុន TADA កំពុងចាប់អារម្មណ៍យ៉ាងខ្លាំងពីភាពរីកចម្រើនរបស់ប្រទេសកម្ពុជា ពិសេសនារយៈពេលប៉ុន្មានឆ្នាំចុងក្រោយនេះ ខណៈផលិតផលផ្នែកសេវាកម្ម (TADA App) របស់ក្រុមហ៊ុនក៏កំពុងទទួលបាននូវភាពជោគជ័យយ៉ាងខ្លាំងផងដែរ។
លោកបានបន្តថា ជាមួយនឹងភាពជោគជ័យទីផ្សារនេះ ក្រុមហ៊ុនក៏មានបំណងពង្រីកការវិនិយោគរបស់ខ្លួនលើការសាងសង់រោងចក្រដំឡើងម៉ូតូកង់៣ នៅកម្ពុជាផងដែរ។
លោកប្រាប់ថា៖ «ក្រុមហ៊ុនកំពុងធ្វើការវិវឌ្ឍខ្លួនពីសេវាកម្មទៅកាន់ការសាងសង់រោងចក្រដំឡើងម៉ូតូកង់៣ដំណើរការដោយអគ្គិសនី នៅកម្ពុជាតែម្តងនាពេលឆាប់ៗនេះ»។
លោកលើកឡើងថា ក្នុងនាមពលរដ្ឋខ្មែរ លោកពិតជារីករាយណាស់ដែលកម្ពុជាកំពុងទទួលបាននូវកំណើននៃអ្នកចូលមកបណ្តាក់ទុនជាបន្តបន្ទាប់ ខណៈកម្ពុជាជាប្រទេសដែលមានភាពទាក់ទាញច្រើនសម្រាប់ការវិនិយោគ។
លោក ជីម ប៉ូលី ប្រធានគ្រប់គ្រងទូទៅនៃក្រុមហ៊ុន MVL TADA (Cambodia) Co., Ltd បានប្រាប់ភ្នំពេញប៉ុស្តិ៍ថា បន្ទាប់ពីទទួលបានជោគជ័យលើការដាក់ឲ្យប្រើប្រាស់ (App) សេវាកក់យានយន្តជំនិះធ្វើដំណើរនៅកម្ពុជារួចមក នៅពេលនេះក្រុមហ៊ុនគ្រោងនឹងពង្រីកការវិនិយោគទៅលើការសាងសង់រោងចក្រដំឡើងម៉ូតូកង់៣ដំណើរការដោយថាមពលអគ្គិសនីបន្ថែមទៀត។
លោកបន្តថា ការសិក្សារបស់ក្រុមហ៊ុនទៅលើទីតាំងសម្រាប់សាងសង់រោងចក្រដំឡើងម៉ូតូកង់៣ និងស្ថានីយបញ្ចូលអគ្គិសនីដល់យានយន្តទាំងអស់ បានបញ្ចប់ស្ទើរទាំងស្រុងហើយ ដោយអាចនឹងចាប់ផ្តើមនៅចុងឆ្នាំនេះ។
លោកប្រាប់ថា៖ «ក្រុមហ៊ុនមានគម្រោងបើកដំណើរការរោងចក្រដំឡើងម៉ូតូកង់៣ដំណើរការដោយថាមពលអគ្គិសនីនៅចុងឆ្នាំនេះ ឬយ៉ាងយូរត្រឹមដើមឆ្នាំក្រោយ ហើយការប្រកាសដាក់លក់នៅលើទីផ្សារនឹងធ្វើនៅមុនដំណាច់ឆមាសទី ១ ឆ្នាំ ២០២១ ខាងមុខ»។
ទោះបីយ៉ាងណាលោក ប៉ូលី បានបដិសេធក្នុងការផ្តល់ព័ត៌មានពីទីតាំងដែលគ្រោងនឹងសាងសង់រោងចក្រថ្មីនោះ។
លោកបានបន្ថែមថា គម្រោងនេះមិនត្រឹមតែចូលរួមចំណែកក្នុងការបង្កើតការងារថ្មីៗបន្ថែមប៉ុណ្ណោះទេ ប៉ុន្តែវាក៏នឹងចូលរួមចំណែកក្នុងការធ្វើឲ្យតម្លៃម៉ូតូកង់៣មានតម្លៃទាបជាងមុន ការចំណាយតិច ព្រមជាមួយនឹងការចូលរួមជួយដល់កិច្ចការពារបរិស្ថានផងដែរ។
បច្ចុប្បន្នក្រុមហ៊ុន MVL ក៏កំពុងមានប្រតិបត្តិការនៅក្នុងប្រទេសវៀតណាម និងសិង្ហបុរីផងដែរ។ នេះបើយោងតាមលោក ប៉ូលី៕ LA