ភ្នំពេញៈ ក្រុមហ៊ុន Nagacorp ដែល​ជា​ប្រតិបត្តិករ​កាស៊ីណូ និង​សណ្ឋាគារ NagaWorld នៅ​កណ្តាល​ទីក្រុង​ភ្នំពេញ​បាន​បោះ​មូលបត្រ​បំណុល​លក់​ជា​លើក​ដំបូង​នៅ​ក្រៅ​ប្រទេស ដើម្បី​ប្រមូល​ដើមទុន​បន្ថែម ៣០០ លាន​ដុល្លារ សម្រាប់​ពង្រីក​អាជីវកម្ម​ល្បែង និង​ការកែលម្អ​បន្ទប់​សណ្ឋាគារ​នៅ​ភ្នំពេញ​។

តាម​សេចក្តី​ជូន​ដំណឹង Nagacorp ដែល​បាន​ចេញ​ផ្សាយ​នៅ​ផ្សារហ៊ុន​ក្រុង​ហុងកុង Nagacorp បាន​សម្រេច​កិច្ចព្រមព្រៀង​ទិញ-លក់​មូលបត្រ​បំណុល​ជាមួយ​ក្រុមហ៊ុន​ ២ ​គឺ ក្រុមហ៊ុន Credit Suisse (Hong Kong) Ltd និង​ក្រុមហ៊ុន Morgan Stanley ក្នុង​គម្រោង​បោះផ្សាយ​លក់​មូលបត្រ​បំណុល​ដែល​មាន​ទឹកប្រាក់​សរុប ៣០០ លាន​ដុល្លារ​។

មូលបត្រ​បំណុល​ដែល​បោះ​លក់​ដោយ​ក្រុមហ៊ុន Nagacorp នឹង​មាន​រយៈពេល​ ៣ ​ឆ្នាំ​រហូត​ដល់​ថ្ងៃទី​ ២១ ខែ​ឧសភា ឆ្នាំ​ ២០២១ ដោយ​មាន​អត្រា​ការប្រាក់ ៩,៣៧ ភាគរយ​ក្នុង​មួយ​ឆ្នាំ​។ បន្ទាប់ពី​កាត់​ថ្លៃ​ជើងសា និង​ចំណាយ​ផ្សេងៗ ក្រុមហ៊ុន Nagacorp អាច​ប្រមូល​បាន​ដើមទុន​សុទ្ធ​ពី​ការបោះផ្សាយ​លក់​មូលបត្រ​បំណុល ២៩០ លាន​ដុល្លារ​។

សេចក្តី​ជូនដំណឹង​របស់ Nagacorp បញ្ជាក់​ថា​៖ «​ក្រុមហ៊ុន​គ្រោង​ប្រើប្រាស់​ដើមទុន​សុទ្ធ​ដែល​ប្រមូល​បាន​នេះ​ទៅ​គាំទ្រ​ដល់​កំណើន​អាជីវកម្ម​ល្បែង​របស់​យើង ជាពិសេស​ទីផ្សារ​ល្បែង​សម្រាប់​ភ្ញៀវ VIP និង​ធ្វើការ​កែលម្អ​បន្ទប់​សណ្ឋាគារ​នៅ Naga 1»​។

ក្រុមហ៊ុន​ចុះ​បញ្ជី​នៅ​ទីក្រុង​ហុងកុង​មួយ​នេះ​មាន​អាជ្ញាប័ណ្ណ​ផ្ដាច់មុខ​ក្នុង​ការ​ប្រតិបត្តិការ​កាស៊ីណូ​នៅក្នុង​ទីក្រុង​ភ្នំពេញ​។ ក្រុមហ៊ុន​នេះ​បាន​ចាប់ផ្ដើម​ប្រតិបត្តិការ NagaWorld ដែល​នាពេល​នេះ​ត្រូវ​បាន​គេ​ហៅថា Naga 1 ដែល​បាន​បើក​ដំណើរការ​កាលពី​ឆ្នាំ ២០០៦​។

អគារ Naga1 ពេល​នេះ​ត្រូវ​បាន​ភ្ជាប់​ជាមួយ Naga 2 ដែល​ត្រូវ​បាន​បើក​ដំណើរការ​កាលពី​ខែ​តុលា​ឆ្នាំ​មុន​។ Naga 1 និង Naga 2 បាន​ភ្ជាប់​គ្នា​នាពេល​នេះ​ដែល​ត្រូវ​បាន​គេ​ហៅថា NagaWorld Complex ហើយ​ត្រូវ​បាន​ភ្ជាប់​តាមរយៈ​ហាង​ក្រោម​ដី ឬ NagaCity Walk​។

កាលពី​ឆ្នាំ​ ២០១៧ ក្រុមហ៊ុន NagaCorp បាន​រាយការណ៍​ពី​ប្រាក់​​ចំណេញ​រហូត​ដល់ ២៥៥ លាន​ដុល្លារ​ក្នុង​នោះ​ចំណូល​ដុល​មាន​រហូត​ដល់​ទៅ ៩២៦ លាន​ដុល្លារ​។ ក្រុមហ៊ុន NagaCorp ត្រូវ​បាន​រាយការណ៍​ថា បាន​បង់ពន្ធ​តែ ៨,១២ លាន​ដុល្លារ​ក្នុង​ឆ្នាំ ២០១៧​។

យោង​តាម​កម្រិត​ដែល​មូលបត្រ​បំណុល​បាន​បោះផ្សាយ​នៅ​ផ្សារហ៊ុន​ហុងកុង មូលបត្រ​បំណុល​ត្រូវ​បាន​​រំពឹង​ថា នឹង​ផ្តល់​ចំណាត់ថ្នាក់​ក្នុង​កម្រិត B1 ពី​ក្រុមហ៊ុន Moody និង កម្រិត B ពី Standard & Poor​។

លោក Han Kyung Tae អគ្គនាយក​ក្រុមហ៊ុន Yuanta Securities (Cambodia) បាន​លើក​ឡើង​កាលពី​ម្សិលមិញ​ថា មូលបត្រ​បំណុល​ដែល​នឹង​ត្រូវ​បោះផ្សាយ ហើយ​ត្រូវ​ចាត់​ថ្នាក់​ក្នុង​កម្រិត B1 ដោយ​ក្រុមហ៊ុន Moody នឹង​ក្លាយ​ជា​ចំណាត់ថ្នាក់​ល្អ​ជាង​មួយ​ពិន្ទុ ធៀប​នឹង​ចំណាត់ថ្នាក់​ឥណទាន​របស់​ប្រទេស​កម្ពុជា​។

លោក Han Kyung Tae បាន​លើក​ឡើង​ថា​៖ «​វា​បាន​បង្ហាញ​ថា​ក្រុមហ៊ុន​នៅក្នុង​ប្រទេស​កម្ពុជា​អាច​ទទួល​បាន​ចំណាត់ថ្នាក់​ឥណទាន​ល្អ​ជាង​ប្រសិន​បើ​មូលបត្រ​បំណុល​របស់​ពួកគេ​ត្រូវ​បាន​បោះផ្សាយ​លក់​ជា​រូបិយប័ណ្ណ​បរទេស ឧទាហរណ៍​ដូចជា​ប្រាក់​ដុល្លារ​»៕ LA